‘Wek Pe Wudony I Atematema Mo’
‘Wuki wuleg Lubanga, wek pe wudony i atematema mo.’—MATAYO 26:41.
LYETONE onongo dong gwa—kato kit mo kene ma onongo yam kiketo i kome. Yecu Kricito, Wod pa Lubanga, onongo dong cok ki agikki me kwone i lobo. Yecu oniang ni cok dong kibimake, kingolo kop me to i wiye, dok kibigure i kom wir. En ongeyo ni tamme ma emoko ki tic mo keken ma ebitimo obigudo nying Wonne. Yecu bene ongeyo ni kwo pa dano onongo dong tye ma olege alega i moko tam ki tic. Me kemme ki peko magi ducu, gin ango ma en dong otimo?
2 Yecu kacel ki lupwonnyene gucito i poto me Gececemane. Kabedo meno onongo Yecu maro mada. Ki kunnu, en onyike cen manok ki bot lupwonnyene. Ka en tye kene, olokke bot Wonne ma i polo pi nongo teko, kun onyo tam ma i cwinye ducu i lega matek tutwal—pe tyen kicel keken ento tyen kidek. Kadi bed onongo en pe ki roc, Yecu pe otamo ni etwero kanyo lyeto meno pire kene.—Matayo 26:36-44.
3 I kare-ni, wan bene watye i lyeto. I acakki me brocuwa man, waneno lanyut ma cimo ni wan dong watye ka kwo i kare me agikki me yub man maracci. Atematema ki cwercwiny me lobo pa Catan-ni tye ka medde ameda. Tam amoka ki tic pa ngat mo keken i kinwa ma waco ni etye ka tic pi Lubanga gudo nyinge dok miyo ngat acel acel twero kwo i lobo manyen pa Lubanga nyo pe. Wamaro Jehovah. Wamito ‘ciro can wa i agikki’—agikki me kwowa nyo agikki me jammi me yub me kareni, mo keken ma okwongo bino. (Matayo 24:13) Ento waromo bedo ki tam ni man pe mito gale kun nongo wakiyo piny nining?
4 Pien en onongo ngeyo ni lupwonnyene—me kare macon ki ma i kare-ni—onongo bene gibibedo i lyeto, Yecu ociko ni: ‘Wuki wuleg Lubanga, wek pe wudony i atematema mo.’ (Matayo 26:41) Man niange ni ngo botwa i kare man? Kit atematema ango ma itye ka limo-ne? Dok i yo ango ma itwero ‘kiyo kwede piny’?
Atematema me Timo Ngo?
5 Wan ducu nino ki nino wabedo ki atematema me moko i “owic pa Catan.” (2 Temceo 2:26) Baibul cikowa ni Catan oketo wange, tutwalle i kom luwor Jehovah. (1 Petero 5:8; Niyabo 12:12, 17) Pi tyen lok ango? Pe ni me rwenyo kwowa mere. Kace wato labongo kwanyo niyewa i kom Lubanga nongo pe obedo loyo lweny ki bot Catan. Adada Catan ngeyo ni, i kare Ne kikome, Jehovah biloyo teko pa to ki cero jo muto.—Luka 20:37, 38.
6 Catan mito balo gin mo madok ber kato wa kwowa me kare-ni—niye-wa i kom Lubanga. Catan tye ka mito nyuto ni eromo jukowa woko ki i woro Jehovah tutwal. Dong ka kitwero bitowa me turo niyewa—me weko pwonyo lok me kwena maber nyo me weko lubo kwo ma pore pi Lukricitayo—meno nongo obedo loyo lweny ki bot Catan! (Jo Epeco 6:11-13) Pi meno “Labit dano” keto atematema i niyewa.—Matayo 4:3.
7 Catan tiyo ki ‘ryeko me bwola’ i yo mapat pat. (Jo Epeco 6:11) En romo temowa ki jammi me kom, lworo, akalakala, nyo yenyo kwo. Ento yo acel ma en nongo tic kwede yot aye tur cwiny. Pien obedo laryeko ma tiyo ki kare mo keken ma onen, en ngeyo ni tur cwiny twero miyo wadoko goro, ma poto-wa doko yot. (Carolok 24:10) Tutwalle i kare ma nongo cwinywa “onyonge woko,” en dong tugi temowa wek wa-il cingwa woko.—Jabuli 38:8.
8 Kit ma agikki woto ki nyiko cokki, jammi ma kelo tur cwiny nen calo tye ka nya medde ameda, dok wan pe watwero loyo ki iye. (Nen bok pi “Jammi Mogo ma Kelo Tur Cwiny.”) Labongo paro ngo ma okelo, tur cwiny twero dwoko tekowa. ‘Wilo kare matye me timo tic me cwiny’—matye iye kwano Baibul, bedo i cokke pa Lukricitayo, ki tic me pwony—twero bedo tek ka watye ki olo i komwa, i tamwa, ki cwinywa. (Jo Epeco 5:15, 16) Wi opo ni Labita-ni mito ni i aa woko. Ento man pe obedo kare me dok cen nyo me bedo ki tam me gale ma lubbe ki kare ma watye ka kwo iye ni! (Luka 21:34-36) In itwero kanyo atematema ki bedo ma ikiyo piny nining? Nen kong tam angwen ma twero miyo kony ma iromo jemo kwede i kom abita kun nongo imedde ki kiyo piny.
‘Wumedde ki Lego Lubanga’
9 Jenge i kom Jehovah i lega. Po i kom lanen pa Yecu i poto me Gececemane. I kare ma en tye i lyeto me tam matek, ngo ma en otimo? En olokke bot Jehovah pi nongo kony, olego matek ma “omiyo kwok ocorre i kome macalo remo ma ton cwer i ngom.” (Luka 22:44) Tam kong pire. Yecu onongo ngeyo Catan maber. Yecu onongo obedo ka neno ki i polo kit atematema ducu ma Catan tiyo kwede i yelle-ne me bolo lutic pa Lubanga. Ento, Yecu pe otamo ni obedo gin ma yot ki bote me loyo ki i atematema mo keken ma Labita-ni oromo temme kwede. Ka Wod pa Lubanga ma pe ki bal mo owinyo ni mitte me lega pi nongo kony ki teko pa Lubanga, ci dong mitte botwa ma romene!—1 Petero 2:21.
10 Wi opo ni, inge cuko cwiny lupwonnyene ni ‘gumedde ki lega,’ Yecu owaco ni: ‘Cwiny kikome mito, ento kom aye goro.’ (Matayo 26:41) Kom pa anga-gi ma Yecu onongo tye ka lok iye ni? I ada meno pe kom en; pien pe onongo tye gin mo ma goro ki i kome me dano ma onongo tye labongo rocci. (1 Petero 2:22) Ento man pe onongo kit ma lupwonnyene gitye kwede. Gin onongo gitye ki bal alaka dok ki miti me timo bal, onongo gimito kony tutwal me loyo i kom atematema. (Jo Roma 7:21-24) En aye gin ma omiyo en ocuko iye cwinygi—ki dok Lukricitayo ma bilubo nge-gi—me lega pi nongo kony ki i atematema. (Matayo 6:13) Jehovah jolo lega ma kit meno. (Jabuli 65:2) I yo ango? I yo aryo olo twal.
11 Mukwongo, Lubanga konyowa me ngeyo atematema. Atematema pa Catan bedo calo owic ma nongo giketo i wang yo kama piny col iye. Ma ka pe inenogi, ci iromo moko iye cut. Kun tiyo ki Baibul ki bukke ma kigoyo me kwano Baibul, Jehovah menyo dero maleng i kom owic pa Catan, miyo wangeyo kit me we-ne ki i atematema meno. Pi mwaki ma okato angec mapol bukke ma kigoyo dok ki yub me gure madito wa ki mogo matino obedo ka poyo wiwa pi rac pa jammi calo lworo dano, tim tarwang, woro me jammi me kom, ki atematema mukene pa Catan. (Carolok 29:25; 1 Jo Korint 10:8-11; 1 Temceo 6:9, 10) In pe cwinyi yom ni Jehovah poyo wiwa i kom yo pa Catan? (2 Jo Korint 2:11) Lok me ciko dano kit meno obedo lagam me lega pi loyo atematema.
12 Me aryo, Jehovah gamo legawa ki miyowa teko me kanyo atematema. Lokke waco ni: “Lubanga . . . pe biye ni gibitwu matek makato ma wuromo cirone, ento i kare ma Catan tye ka bitowu, Lubanga bimiyowu yo ma myero wubwot kwede.” (1 Jo Korint 10:13) Lubanga pe biweko atematema mo kato kare woko ma nongo pe watwero bedo ki teko i yo me cwinywa me loyone—ka wamedde ki jenge i kom En. En miyo yo ma myero ‘wabwot kwede nining’? En ‘miyo Cwiny Maleng makato bot jo ma lege.’ (Luka 11:13) Cwiny meno twero konyo wa me po i kom pwony madito me Baibul ma romo jingowa me cung matek pi timo gin ma tye atir dok konyowa me moko tam me ryeko. (Jon 14:26; Yakobo 1:5, 6) Twero konywa bene me nyuto kit moni ma nongo wamito-ni me loyo lweny i kom tim mogo maraco. (Jo Galatia 5:22, 23) Cwiny pa Lubanga bene twero miyo luworo luwotwa me doko jo ma ‘kweyo cwiny tutwal.’ (Jo Kolocai 4:11) In pe itye ki pwoc pien Jehovah jolo lega-ni pi kony i yo me mar ma kit meno?
Nyut Ryeko i Jammi ma Igoyo i Wii
13 Me medde ki kiyo piny, mito wanyut ryeko i jammi ma wagoyo i wiwa. Pi ayelayela ma diyowa i kwo, wan ducu cawa mukene waol woko. Ento myero wiwa opo ni Lubanga pe ociko ni wabibedo labongo peko mo keken i yub man macon-ni. Kadiwa i kare me coyo Baibul, lutic pa Lubanga gurwatte ki peki, calo auna una, can, kumo, ki two.—Tic pa Lukwena 8:1; 2 Jo Korint 8:1, 2; 1 Jo Tecalonika 5:14; 1 Temceo 5:23.
14 I kare-ni, wan bene watye ki peko ma okemowa. Waromo limo auna una, par ma dok i kom cente, lweny ki kumo, two nyo limo peko i yo mo mukene. Ka nene Jehovah onongo obed ka gwokowa i peko ducu ma timme ki tango, kono pe meno dong omiyo kare ki Catan me yeto Jehovah? (Carolok 27:11) Jehovah gire weko ni gibit dok gitem luticce, kare mukene nio wa i to atura ki i cing lujemo.—Jon 16:2.
15 Dong gin ango ma Jehovah ocikke pire? Kit ma waneno kwede i angec, en ocikke me miyo-wa teko ma rwatte ki atematema mo keken ma oromo bino, teke ka waketo genwa ducu i kome. (Carolok 3:5, 6) Kun tiyo ki lokke, ki Cwiny maleng, en gwokowa i yo me cwiny ki dok dulle, ma konyo me gwoko wat maber i kin wan ki en. Wat ma kit meno ka pe oballe, kadi bed wato, waromo loyo. Pe tye gin mo—kadiwa to—ma twero juko Lubanga ki i miyo bakacic bot luticce ma lugen. (Jo Ibru 11:6) Dok i lobo manyen, ma dong tye cokki, Jehovah pe obituro cobo cikkene ducu mamwonya me onyo tanga-ne i kom jo ma marre.—Jabuli 145:16.
Po i Kom Lok Madito Matye
16 Me kanyo nio wa i agikki, omyero wiwa opo i kom lok madito matye ma omiyo Lubanga oye ni tim maraco obed tye. Ka kare mukene peko nen dong calo pe larre ma wawinyo ni omyero dong wa a woko ki bot Jehovah, myero wiwa opo ni Catan opyem i kom twero mamalo twal pa Jehovah. Lagoba-ni bene okelo akalakala i kom luwor Lubanga ka gigwoko gene i ada. (Yubu 1:8-11; 2:3, 4) Lok madito magi ki yo ma Jehovah okwanyo me cobone dit loyo ngat mo keken ki i kinwa. I yo ma nining?
17 Peko ma Lubanga oweko tutunu-ni, omiyo kare ki jo mukene me jolo lok me ada. Tam kong i kom man: Yecu olimo can wek wan wanong kwo. (Jon 3:16) Pe omyero wami pwocwa pi gin meno? Ento mono, watye ma watere me ciro can pi kare mo manok wek jo mukene bene gunong kwo? Me kanyo nio wa i agikki, omyero kong waniang ni ryeko pa Jehovah dwong loyo mewa mabor ata. (Icaya 55:9) En bigiko tim maraco woko i kare ma nongo dong rwatte me cobo lok madito magi matwal dok pi ber bedowa me labed naka. Adada, tika dok tye yo mo mukene? Pe tye kit ngolo kop alenga mo ki bot Lubanga!—Jo Roma 9:14-24.
“Wunyik Cok bot Lubanga”
18 Me medde ki bedo ki tam ma pe me gale, mitte ni wabed cok ki Jehovah. Wi pe owil ni Catan tye ka yelle ki tekone ducu me balo wat maber matye i kinwa ki Jehovah. Catan mito-ni wayee ni agikki pe bibino, ki dok ni konnye pe me pwonyo lok me kwena maberri nyo me kwo ma rwatte ki cik me Baibul. Ento “en lagoba, dok won goba.” (Jon 8:44) Myero wamok matek me ‘jemo i kom Catan.’ Wat i kinwa ki Jehovah pe omyero wanen calo gin ma konnye pe. Baibul cuku cwinywa ki mar madit ni: “Wunyik cok bot Lubanga, ci en bene binyiko cok botwu.” (Yakobo 4:7, 8) Ci dong iromo nyiko cok bot Jehovah nining?
19 Lwodo lok kun nongo iwoto ki lega, pire tek. Ka lyeto me kwo pe dong larre, ony peko-ni bot Jehovah. Ka icimo kom peko-ni kikome ci bibedo yot me neno lagam ma mege pi kwacci. Lagam-me pe oromo bedo kit ma nongo i tamo kwede, ento ka miti-ni tye me woro en ki me gwoko gene-ni bote, ci en bimiyi kony wek ilo kanyo peko. (1 Jon 5:14) Ka ibedo ka neno tira-ne i kwoni, ci ibinyiko cok ki en. Kwano ki lwodo lok i kom kit ki yo pa Jehovah kit ma kinyuto kwede i Baibul, ducu obedo gin ma pire tek. Kit lwodo lok ma kit meno konyi me ngeyo en maber; tugu cwinyi dok medo mari matut i kome. (Jabuli 19:14) Dok mar meno ma pe gin mukene, bikonyi me jemo i kom atematema ki bene me bedo ma ikiyo piny.—1 Jon 5:3.
20 Me bedo cok ki Jehovah, pire tek bene ni wabed cok ki luworo luwotwa. Kibinyammo man i dul me agikki me brocuwa man.
PENY I KOM LOK MA KINENO
• Ngo ma Yecu otimo i kare ma en tye i lyeto magwar ma onongo dong cok ki agikki me kwone i wi lobo, dok ngo ma en owaco ni lupwonnyene gutim? (Para. 1-4)
• Pingo Catan oketo wange i kom luwor Jehovah, dok i yo ma nining ma en temowa kwede? (Para. 5-8)
• Me loyo atematema, pingo myero wamedde ki lega kare ducu (Para. 9-12), Nyuto ryeko i jammi ma igoyo i wii (Para. 13-15), ki ‘nyiko cok ki Lubanga’ (Para. 18-20)?
[Bok i pot karatac 25]
Jammi Mogo ma Kelo Tur Cwiny
Yot-kom ki tiyo. Ka watye ki two ma pe cang nyo ka tiyo dong okeliwa goro woko, waromo bedo ki cwercwiny pien nongo dong pe watwero tiyo tic pa Lubanga matek.—Jo Ibru 6:10.
Balle pa cwiny. Cwinywa twero balle ka wanongo adwogi manok i tutewa me pwonyo Lok pa Lubanga.—Carolok 13:12.
Bedo ki tam ni konywa pe. Bedo ka tero ngat moni marac pi mwaki malac, miyo en oromo tamo ni pe kimare kadiwa Jehovah bene.—1 Jon 3:19, 20.
Wang cwiny. Ka omego otimo jammi ma wango cwiny lawote, miyo cwinye twero balle ma romo juko wa o i cokke pa Lukricitayo nyo wot i pwony.—Luka 17:1.
Aunauna. Jo mukene ma pe ginywako niyeni giromo dagi, wano komi, nyo nywarri.—2 Temceo 3:12; 2 Petero 3:3, 4.
[Cal ma tye i pot karatac 26]
Yecu wacciwa me ‘medde ki lego Lubanga’ pi nongo kony i lweny ki atematema