Rakab Obedo ki Niye i Kom Jehovah

Go ni watye i boma me Jeriko. Boma man tye i lobo me Kanaan, ka ma danone gipe ki niye i kom Jehovah. Dako mo ma nyinge Rakab bene bedo i boma man.

I kare ma Rakab onongo pud anyaka matidi, en owinyo lok i kom kit ma Moses obaro i Nam Makwar kun telo wi jo Icrael me a woko ki i lobo Ejipt. En bene owinyo kit ma Jehovah okonyo kwede jo Icrael me loyo lweny i kom lumonegi. Man dong en owinyo ni jo Icrael gugony cok ki boma me Jeriko!

Otyeno mo acel, jo Icrael gucwalo lurotpiny aryo i boma meno. Lurotpiny meno gucito i ot pa Rakab. En ojologi i ode. I dyewor meno, kabaka me Jeriko oniang ni lurotpiny gudonyo i boma dok gucito i ot pa Rakab. Pi meno kabaka ocwalo co me cito ka gamogi. Rakab okano lurotpiny magi i wi ode ci owaco ki co ma kabaka ocwalo ni: ‘Lurotpiny gubedo kany ento dong gua woko. Ka wuringo i korgi cutcut, ci wutwero makogi!’ Ingeyo ngo mumiyo Rakab ogwoko lurotpiny magi?— Pien en obedo ki niye i kom Jehovah dok ongeyo ni Jehovah bimiyo lobo me Kanaan bot jo Icrael.

Ma peya lurotpiny magi gua ki i ot pa Rakab, gin gucikke bot Rakab ni en ki lupacone pe gibito i nino ma kibituro boma me Jeriko. Ingeyo ngo ma guwacci en otim?— Gin guwacce ni: ‘Gam tol makwar man, ci itwe i wang diricani ki woko. Ka itimo man, ci jo ma gitye i oti ducu gibibwot.’ Rakab otimo gin ma lurotpiny guwacce kikome. Dong ingeyo gin mutimme lacen?—

I nge nino manok, jo Icrael gucako dorre kun gilworo boma me Jeriko laling ling. Pi nino abicel jo Icrael gubedo ka dorre ma gilworo boma kicel nino acel acel. Ento i nino me abirone, gin gudorre gulworo boma me Jeriko tyen abiro kulu. Ci gin ducu gudange ki dwan malongo. Jehovah omiyo cel me boma ducu opoto woko piny. Ento ot ma wang diricane kitweyo iye tol makwar-ri pe opoto! In mono itwero nenone i cal-li?— Kilaro Rakab ki jo me ode ducu!

Ngo ma itwero pwonyone ki bot Rakab?— Rakab obedo ki niye i kom Jehovah pi jami mabeco ma owinyo i kom Jehovah. In bene itye ka pwonyo jami mapol mabeco i kom Jehovah. Tika itye ki niye i kom Jehovah calo Rakab?— Wageno ni itye kwede!