Yat ma Lyel Mac

Moses obedo i Midian pi mwaka 40. En onyomo dok onywalo lutino. Nino mo acel ma en tye ka kwayo romine cok ki Got Cinai, en oneno gin mo me aura. Yat mo onongo tye ka lyel mac, kun pe wang! Ma Moses ongak ka neno pingo yat meno pe tye ka wang, en owinyo dwan mo ki i yat-ti kun waco ni: ‘Moses! Pe inyik cok kany. Luny war woko ki i tyeni pien kabedo ma icung iye-ni leng.’ Jehovah aye onongo tye ka lok kun tiyo ki malaika.

Lworo omako Moses, ci oumo wange woko ki bongo. Dwan meno owacci: ‘Aneno can pa jo Icrael. Abilarogi ki i cing jo Ejipt dok abikelogi i lobo maber. In aye ibitelo wi jona me kwanyogi ki i Ejipt.’ Pe itamo ni man omiyo Moses obedo ki ur?

Moses openyo ni: ‘Ka jo-ni gupenya ni anga ma ocwala, abigamogi ningo?’ Lubanga ogamo ni: ‘Waccigi ni Jehovah, Lubanga pa Abraim, Lubanga pa Icaka, ki Lubanga pa Yakobo ocwala botwu.’ Moses odok iye ni: ‘Ka gukwero winyo lokka kono?’ Jehovah omiyo bot Moses lanyut ni Ebikonye. En owaco bot Moses ni obol odoone piny i ngom. odoo-ni olokke odoko twol! I kare ma Moses omako twol ki tung yibe, ci dok olokke odoko odoo. Jehovah owaco ni: ‘Ka itimo tango man, ci binyuto ni an aye acwali.’

Moses ogamo ni: ‘An pe aloko maber.’ Jehovah ocikke bote ni: ‘Abiwacci gin ma myero ilokki, dok abicwalo omeru Aron boti me konyi.’ Kit ma en onongo ngeyo ni Jehovah tye kacel kwede, Moses okwanyo dakone ki lutino awobene ci gudok cen i Ejipt.