Lurot-piny Apar Wiye Aryo

Jo Icrael guweko Got Cinai ci guwoto i dye tim me Paran nio wa i kabedo ma kilwongo ni Kadec. Ki kunnu, Jehovah owaco bot Moses ni: ‘Cwal co 12, dano acel ki i kaka acel acel, wek gucit ka roto lobo Kanaan, lobo ma abimiyo bot jo Icrael.’ Pi meno, Moses oyero co 12 ci owaco botgi ni: ‘Wucit i lobo Kanaan kuca, wek wunen ka ce lobone ceko cam nyo pe ceko. Wunen ka jo ma gibedo iye gitego nyo gigoro dok ka gibedo i kema nyo i gangi ma girumo ki cel matego.’ Lurot piny 12, ma i kine tye iye Yocwa ki Kaleb gugwarre ci gucito Kanaan.

I nge nino 40, lurot piny-nyi gudwogo ki nyig olok, oduru, ki pomegranat. Lurot-piny gumiyo ripot ni: ‘Lobo meno obedo lobo maber, ento jo ma gibedo iye jo matego, gangigi bene girumo woko ki cel matego.’ Ci Kaleb owacci: ‘Watwero loyogi woko. Wacitu iye cutcut!’ Tika ingeyo gin mumiyo Kaleb oloko kumeno? Pien en ki Yocwa onongo gigeno Jehovah. Ento lurot-piny apar mukene ca guwacci: ‘Pe! Jo ma kunnu komgi pek dok gidongo, calo twoni oluma! Wan wanen calo otwongo mamwa ki i wanggi.’

Lok man obalo cwiny jo Icrael mada. Gucako nguru kun giwaco ni: ‘Wek wayeru laditwa mo mapat wek wadok cen i lobo Ejipt. Pingo omyero wacit i kabedo man wek ginekwa woko?’ Yocwa ki Kaleb gubako doggi ni: ‘Pe wujem i kom Jehovah, dok pe wulwor. Jehovah bigwokowa.’ Ento jo Icrael pud gukwero winyo lokgi woko. Onongo bene gimito neko Yocwa ki Kaleb woko!

Ngo ma Jehovah otimo? En owaco bot Moses ni: ‘I nge neno jami ducu ma atimo pi jo Icrael, pud gikwero winyo doga. Pi meno, gibibedo i dye tim pi mwaka 40, wang ma guto gutum woko. Lutinogi keken, kacel ki Yocwa ki Kaleb aye gibidonyo i lobo ma aciko pire.’