Kabaka Mukwongo me Icrael

Jehovah onongo omiyo lungolkop me telo jo Icrael, ento guwaco ni gimito kabaka. Guwaco bot Camuel ni: ‘Rok murumowa ducu gitye ki kabaka. Wan bene wamito kabaka.’ Lok meno pe oyomo cwiny Camuel, pi man en olego bot Jehovah. Jehovah owacce ni: ‘Lwak pe gukwero in. Ento gukwero an. Wac botgi ni gitwero bedo ki kabaka, ento kabaka meno bimito jami mapol ki botgi.’ Kadi bed kit meno, lwak gurido lok ni: ‘Pe waparo. Wamito ni kabaka aye olowa!’

Jehovah owaco bot Camuel ni laco mo ma nyinge Caulo aye bibedo kabakagi mukwongo. I kare ma Caulo ocito ka limo Camuel i Rama, Camuel owiro Caulo me bedo kabaka kun onyo moo i wiye.

Lacen, Camuel olwongo jo Icrael kacel me nyuto botgi kabakagi manyen. Ento guyenyo Caulo kwe pe gumedo ki nongo kome. Ingeyo pingo? Pien en onongo okanne i kin jami. I kare ma dong gunongo Caulo, guome ci guweko ocung i dye lwak. Caulo onongo nen mwonya dok odongo mabor makato dano ducu. Camuel owaco ni: ‘Wunen ngat ma Jehovah oyero-ni.’ Dano gudange ki woo ni: ‘Kabaka obed kwo nakanaka!’

I acakkine, Kabaka Caulo onongo winyo lok pa Camuel dok woro Jehovah. Ento lacen kite olokke woko. Me labolle, onongo pe obedo tic pa kabaka me tyero gitum awanga. I nino mo acel, Camuel owaco bot Caulo ni kong okur wang ma eo, ento Camuel pe obino cutcut. Pi man, Caulo otyero gitum awanga en kikome. Camuel odok iye nining? En owaco bot Caulo ni: ‘Onongo myero pe itur cik pa Jehovah.’ Caulo tika onongo pwony ki i bal ma en otimo?

Lacen, i kare ma Caulo ocito ka lweny i kom jo Amalek, Camuel ociko Caulo ni pe owek ngati mo keken odong makwo. Ento Caulo pe oneko kabakagi, Agag. Jehovah owaco bot Camuel ni: ‘Caulo obarre woko ki ka lubo kora, dok pe ocobo cikka.’ Camuel cwinye ocwer matek, ci owaco bot Caulo ni: ‘Kit macalo in ikwero winyo lok pa Jehovah, en biyero kabaka mukene.’ I kare ma Camuel olokke me cito, Caulo omake ci dog kanyi pa Camuel oyec woko. Ci Camuel owaco bot Caulo ni: ‘Jehovah dong oyeco ker pa Icrael woko ki boti.’ Jehovah onongo bimiyo kerre bot ngat ma marre dok winyo doge.