Yonacan Obedo Dano ma Lagen dok Cwinye Tek

Yonacan, wod pa Kabaka Caulo madit loyo, obedo lalweny ma cwinye tek. Daudi owaco ni Yonacan onongo dwir makato ocur dok tek makato labwor. I nino mo acel Yonacan oneno lumony 20 pa jo Piliciti i wi cere. En owaco bot awobi ma tingo jami lwennye ni: ‘Wabilwenyo i komgi keken ka Jehovah omiyowa lanyut. Ka jo Piliciti guwaco ni wacit malo botgi, ci wabingeyo ni myero walweny i komgi.’ Jo Piliciti gudange ni: ‘Wubin malo botwa ka lweny!’ Pi meno, co aryo-ni guito cere ci guloyo mony pa jo Piliciti woko.

Kit macalo Yonacan obedo wod pa Caulo madit loyo, en onongo myero odok kabaka i nge to pa wonne. Ento, Yonacan ongeyo ni Jehovah oyero Daudi me leyo kaka Caulo macalo kabaka me Icrael. Kadi bed kit meno, en pe obedo lanyeko. Yonacan ki Daudi gudoko lurem macok. Ngat acel acel okwonge me gwoko lawote. Yonacan omiyo bot Daudi jorre, pala lucwanne, atumme, ki del pyere macalo lanyut me liremgi.

I kare ma Daudi onongo tye ka ngwec woko ki bot Caulo, Yonacan owoto bote ci owacce ni: ‘Bed ma cwinyi tek. Jehovah oyeri me bedo kabaka. Kadi wa wora ngeyo.’ Imito bedo ki larem maber calo Yonacan?

Tyen mapol, Yonacan oketo kwone ka mading me konyo lareme. En ongeyo ni Kabaka Caulo mito neko Daudi, pi meno en owaco bot wonne ni: ‘Ka ineko Daudi, nongo itimo bal; en pe otimo bal mo i komi.’ Caulo iye owang matek adada i kom Yonacan. Lacen i nge mwaki mogo, Caulo ki Yonacan guto kacel i dog lweny.

I nge to pa Yonacan, Daudi oyenyo wod pa Yonacan ma nyinge Mepibocet. I kare ma Daudi onongo Mepibocet, owaco bote ni: ‘Kit macalo woru obedo larema macok adada-ni, abigwoki pi kwoni ducu. Ibibedo i gang kalla dok ibicamo i wi mejana nino ducu.’ Daudi wiye pe owil i kom lareme Yonacan matwal.