Jehovah Ogwoko Yekocapat

Yekocapat, kabaka me Juda, omuko keno tyer ki cal apaya pa Baal ma i lobo Juda. En onongo mito ni dano gunge cik pa Jehovah. Pi man en ocwalo rwodi ki Lulevi i kabedo ducu me Juda ka pwonyo dano ki cik pa Jehovah.

Rok ma orumogi onongo gilworo lweny i kom Juda pien gingeyo ni Jehovah tye ki jone. Gin bene gukelo mic bot Kabaka Yekocapat. Ento jo Moab, Ammon, ki jo ma a ki i lobo Ceir gubino ka lweny i kom Juda. Yekocapat onongo ngeyo ni emito kony pa Jehovah. En oguro co, mon ki lutino ducu i Jerucalem. Ki i nyimgi, en olego kun waco ni: ‘Ai Jehovah, labongo in pe watwero loyo lweny. Tittiwa gin ma myero watim.’

Jehovah ogamo lega pa Yekocapat kun wacci: ‘Pe wulwor. An abikonyowu. Wun wubed i kabedowu, wucung iye mot, wunen kit ma abilarowu kwede.’ Jehovah olarogi nining?

Orwone odiko con, Yekocapat oyero luwer ci owaco botgi ni gutel nyim lulweny. Gudore me a ki i Jerucalem me cito i dog lweny i kabedo ma kilwongo ni Tekoa.

I kare ma luwer onongo gitye ka pako Jehovah ki dwan malongo dok ki yomcwiny, Jehovah olwenyo pi jone. En onyweno wi jo Ammon ki Moab mumiyo gucako lweny i kingi kengi, guneke ma pe tye ngat mo ma obwot i kingi. Ento Jehovah ogwoko jo Juda, lumonygi, ki lulamdog. Jo ducu me lobo ma orumo Juda guwinyo gin ma Jehovah otimo, ci gungeyo ni Jehovah pud tye ka gwoko jone. Jehovah laro jone nining? En larogi i yo mapol. En pe mito kony mo ki bot dano.