Jehovah Odiyo Cwinye i kom Yona

Jo ma gibedo i boma madit me Aciria ma kilwongo ni Nineve, onongo kitgi raco adada. Jehovah owaco bot lanebine Yona ni ocit i Nineve wek ocikgi ni gulok kitgi woko. Ento Yona oringo woko ka ma tye tung kilong me Nineve. En odonyo i mel ma woto i Tarcic ci gukwang gucito woko.

I kare ma meli-ni tye i dye nam, yamo ocako kodo magwar ma pii twagge tutwal, ci lukwang mel lworo omakogi matek. Gulego bot lubangegi kun gipenyo ni: ‘Ngo ma tye ka timme?’ I agikkine, Yona owaccigi ni: ‘An aye abalo. Atye ka ngwec woko ki i timo gin ma Jehovah owacca ni atim. Wutinga wubola i nam, ci nam bikwe woko piwu.’ Lukwang mel onongo pe gimito bolo Yona i nam, ento en odiyogi matek ni gubole. I kare ma gubole i nam, twagge pa nam otugi kwe woko cut.

Yona otamo ni ebito woko. I kare ma en tye ka lwiny i te pii, olego bot Jehovah. Ci Jehovah ocwalo rec madit. Rec-ci omwonyo Yona woko, ento pe oneke. Ki i i rec, Yona olego ni: ‘Acikke ni abibedo lawiny boti i kare ducu.’ Jehovah ogwoko Yona maber i i rec pi nino adek ci omiyo rec-ci ongoko Yona woko i wi tera ka ma otwo.

Kit ma Jehovah olaro Yona, onongo dong tyen lokke ni pe mitte ni en ocit i Nineve? Pe. Jehovah dok owaco bot Yona ni ocit i Nineve. Yona dong obedo lawiny. En ocito kunnu ci ociko jo ma kitgi raco magi ni: ‘I nino 40 keken, kibijwero Nineve woko.’ Ka dong gin mo ma Yona pe otamo iye otimme​—jo Nineve guwinyo lok ci guloko yogi woko. Kabaka me Nineve owaco bot jone ni: ‘Wukok matek bot Lubanga, dok wungut i kom balwu. Anga ma ngeyo ka Lubanga bitimowa kica.’ I kare ma Jehovah oneno ni jo-ni gungut i kom balgi, en pe ojwero Nineve.

Cwiny Yona owang matek ni Jehovah pe ojwero boma man. Tam kong: Jehovah odiyo cwinye dok onyuto kica bot Yona, ento Yona onongo pe tye atera me nyuto kica bot jo me Nineve. Me ka meno, en oa woko ki i boma man owoto obedo i te tipo pa keno ci okun woko. I kare ma keno-nu oner woko, kiniga omako Yona matek. Pi meno Jehovah owacce ni: ‘In iparo pi keno ma otwi kene-ni makato jo me Nineve. Anyuto botgi kica, dok gubwot.’ Pen lokke tye ningo? Jo me Nineve onongo pigi tek loyo gin ma twi atwiya.