Malaika pa Jehovah Ogwoko Kejekia

Ker me Aciria oturo ker me kaka apar me Icrael woko. I nge meno, Cenakerib, kabaka me Aciria, onongo mito turo ker me kaka aryo me Juda. En ocako mayo boma ducu me Juda ki acel acel. Ento boma ma en onongo mito mayo loyo aye Jerucalem. Gin ma Cenakerib pe ongeyo aye ni Jehovah tye ka gwoko Jerucalem.

Kejekia, kabaka me Juda, oculo Cenakerib cente madwong adada wek pe otur Jerucalem. Kadi bed Cenakerib ogamo cente-ni, en pud dok ocwalo monnye me lweny i kom Jerucalem. Dano ma i Jerucalem gubedo ki lworo matek pien guwinyo ni jo Aciria dong gubino cok. Ento Kejekia owaco botgi ni: ‘Pe wulwor. Jo Aciria gire gitek, ento Jehovah bimiyo wabedo tek loyogi.’

Cenakerib ocwalo lakwenane, Larabcake, i Jerucalem me yeto lwak ma kunnu. Larabcake ocung cok ki dog cel me boma ci oredo ni: ‘Jehovah pe twero konyowu matwal. Pe wuwek Kejekia obwolwu. Pe tye lubanga mo ma twero larowu ki i cingwa.’

Kejekia olego Jehovah ni otitte gin ma myero etim. Jehovah ogamo ni: ‘Pe ibed ki lworo pi lok ma Larabcake owaco. Cenakerib pe bimayo Jerucalem.’ I nge meno, Cenakerib dok ocwalo waraga mogo bot Kejekia. Lok ma i waraga man owaco ni: ‘Mine i cinga. Jehovah pe twero lari.’ Kejekia olego ni: ‘Ai, Jehovah, larwa ki i cinge, wek jo ducu gunge ni in keni aye Lubanga me ada.’ Jehovah owaco bote ni: ‘Kabaka me Aciria pe bidonyo i Jerucalem. Abigwoko boma-na.’

Cenakerib obedo ki gen ni Jerucalem bibedo mere. Ento i dyewor acel, Jehovah ocwalo malaika ka ma lumony gugony iye i nge cel me Jerucalem. Malaika-ni oneko mony 185,000! Oteka lweny pa Kabaka Cenakerib ducu guto woko. Ki lewic en odok cen wa i gange. Jehovah ogwoko Kejekia ki Jerucalem, kit ma en onongo ocikke kwede. Ket kong ni in onongo ibedo i Jerucalem, tika onongo ibigeno Jehovah?