Gabriel Olimo Maliam

Elicabet onongo tye ki watte mo ma nyinge Maliam, ma bedo i boma me Najaret i Galilaya. Maliam onongo tye ka yubbe me nyomme ki Yucepu, ma obedo lapa bao. I kare ma Elicabet dong tye ki ic me dwe abicel, malaika Gabriel olimo Maliam. En owacci: ‘Itye maber Maliam? Jehovah mari tutwal.’ En pe oniang lok pa Gabriel. Gabriel dok owacce ni: ‘Ibiyac ci ibinywalo latin laco, dok myero icak nyinge ni Yecu. En biloc macalo Kabaka. Kerre birii nakanaka.’

Maliam owaco ni: ‘Ento an pud peya kinyoma. Ci acako nywalo latin nining?’ Gabriel owaco ni: ‘Pe tye gin mo ma loyo Jehovah. Cwiny maleng bibino i komi, ci ibinywalo latin laco. Watti Elicabet bene oyac i wi tiyone.’ Ci Maliam ogamo ni: ‘An anyaka ma latic pa Jehovah. Wek otimme i koma kit ma iwaco-ni kikome.’

Maliam ocito i boma mo ma tye i kor got ka limo Elicabet. I kare ma Maliam omote, Elicabet owinyo ka latin ma i iye otinge ki yomcwiny. Elicabet opong ki cwiny maleng, ci owacci: ‘Maliam, Jehovah omari ki mar mapat. Obedo mot madit atika ni min Rwoda obino ka lima.’ Maliam owaco ni: ‘Apako Jehovah ki cwinya ducu.’ Maliam obedo ki Elicabet pi dwe adek, ka dong odok cen gang i Najaret.

I kare ma Yucepu oniang ni Maliam oyac, en omoko tamme me pokke woko ki Maliam. Ento lamalaika onen bote i lek ci owacci: ‘Pe ilwor nyomo Maliam. En pe otimo gin mo marac.’ Pi meno Yucepu otero Maliam macalo dakone.