Latin Yecu

Yucepu ki Maliam onongo gibedo i Najaret kacel ki Yecu ki lutino awobegi ki anyiragi mukene. Yucepu onongo pito jo me ode ki tic macalo lapa bao, dok en opwonyogi lok i kom Jehovah ki Cikke. Jo me ode onongo gicito i kacokke kare ki kare pi woro Lubanga dok gicito Jerucalem mwaka ki mwaka pi kwer me Kato.

I kare ma Yecu tye mwaka 12, jo ganggi guwoto wot mabor me cito Jerucalem kit ma gitimo kwede mwaka ducu. Boma man onongo opong ki dano ma gubino ka kwero kwer me Kato. Lacen, Yucepu ki Maliam gucako wot me dok gang, kun gitamo ni Yecu tye i kin lwak. Ento i kare ma guyenye i kin wadigi, pe gunonge.

Gudok cen i Jerucalem, ci pi nino adek gubedo ka yenyo wodgi. I agikkine, gucito ka yenye i ot pa Lubanga. Gunongo Yecu kunnu, ma obedo i kin lupwonye kun winyo pwonygi dok penyo peny matego. Lupwonye magi guuro niang pa Yecu mada mumiyo gucako penye lapeny. Lagam ma en obedo ka miyo ocungo wigi woko. Onongo gitwero neno ni en niang Cik pa Jehovah.

Yucepu ki Maliam onongo gubedo ki par madit. Maliam owaco ni: ‘Latin, wabedo ka yenyi ka weng! Ibedo kwene?’ Yecu ogamo ni: ‘Pe wungeyo ni myero abed kany i ot pa Abana?’

Yecu odok ganggi i Najaret kacel ki lunyodone. Yucepu opwonyo Yecu tic me payo bao. In itamo ni Yecu obedo awobi ma kite tye nining? Ka Yecu woto ki dongo, en omedde i ryeko kun nongo pwoc ki bot Lubanga ki dano.