Yecu Odoko Meciya

Jon onongo obedo ka tito kwena ni: ‘Ngat ma dit kata tye ka bino i ngeya.’ I kare ma Yecu onongo tye ki mwaka 30, en oa ki i Galilaya obino i Kulu Jordan, ka ma Jon obedo ka batija dano iye. Yecu onongo mito ni Jon obatija en, ento Jon owaco ni: ‘An pe myero abatija in. In aye myero ibatija an.’ Yecu owaco bot Jon ni: ‘Jehovah mito ni in aye ibatija an.’ Pi meno gudonyo i Kulu Jordan, ci Jon oluto Yecu i te pii.

I kare ma Yecu okatti woko ki i pii, en olego. I cawa meno cutcut, polo oyabbe, ci cwiny maleng pa Lubanga obino piny macalo akuri ci opye i kome. Jehovah oloko ki i polo ni: “In aye Woda ma amaro, ma cwinya yom i komi.”

I kare ma cwiny pa Jehovah obino i kom Yecu, en odoko Kricito nyo Meciya. En onongo dong twero cako tic ma Jehovah ocwale me timone i wi lobo.

Cutcut i nge batijane, Yecu owoto i tim ci obedo kunnu pi nino 40. I kare ma en odwogo, ocito ka neno Jon. I kare ma Jon oneno Yecu bino tung bote, Jon owacci: ‘Man aye Latin Romo pa Lubanga ma bikwanyo bal me lobo.’ Ma en owaco man, Jon oweko dano ongeyo ni Yecu aye Meciya. Tika ingeyo gin mutimme i kom Yecu i kare ma en onongo tye i tim? Kong dong wanenu.