Yecu Otimo Tango Mapol

Yecu obino i lobo ka tito kwena maber me Ker pa Lubanga. Me nyuto gin ma Yecu bitimone macalo Kabaka, Jehovah omiyo bote cwiny maleng me timo tango. En onongo twero cango two mo keken. Ka mo keken ma en ocito iye, lutwo gubino bote pi nongo kony, ci en ocango gin ducu. Oyabo wang lutowang, luding it gucako winyo lok, jo ma gitwoyo two akweya kom gucako wot, dok oryemo cen maraco woko ki i kom dano. Kadi bed gugudo dog bongone keken, onongo gicang woko. Lwak dano mapol gulubo kor Yecu ka mo keken ma en ocito iye. Kadi wa i kare ma Yecu onongo mito bedo kene, en pe oryemo dano woko.

I nino mo acel, dano gukelo laco ma twoyo two akweya kom i ot ka ma Yecu obedo iye. Ento ot onongo opong adada ma pe gitwero donyo iye. Pi meno, gumuko wi ot ci gucwalo kabuto ma latwo obuto iye piny bot Yecu. Ci Yecu owaco bot laco-ni ni: ‘A malo iwot paco.’ I kare ma en otimo meno, dano ducu gubedo ki ur.

I nino mukene, i kare ma Yecu tye ka donyo i caro mo, ludobo apar gucung ki ka mabor ci gudange ni: ‘Yecu, konywa ba!’ I kare ca, onongo pe kiye ni ludobo gubin cok ki jo mukene. Yecu owaco bot ludobo magi ni gucit i ot pa Lubanga, pien Cik pa Jehovah waco ni ludobo myero gutim meno i nge lonnye. I kare ma gitye ka cito, komgi olony. Ladobo acel ka oneno ni ecang woko, odwogo cen bot Yecu me pwoye kun pako Lubanga. I kin co apar-ri, ladobo acel eni keken aye opwoyo Yecu.

Dako mo ma dong otwoyo two malit pi mwaka 12 kulu onongo mito cang. En olibbe ki i nge Yecu i kin lwak ci ogudo dog bongone. Cutcut, twone ocang woko. I kare ma meno otimme, Yecu openyo ni: “Anga ma oguda?” Lworo omako dako-ni matek, ento en obino bot Yecu otitte lok ada. Yecu okweyo cwinye kun wacce ni: ‘Nyara, wot ki kuc.’

Ladit mo ma nyinge Yairo obako doge bot Yecu ni: ‘Bin i oda! Nyara matidi cok to woko.’ Ento ma Yecu peya oo i ot pa Yairo, anyaka-ni oto woko. I kare ma Yecu oo, en oneno dano mapol ma gubino ka kumo ki jo me ot pa Yairo. Yecu owaco botgi ni: ‘Wuwek koko; latin-ni onino anina.’ Ka dong en omako cing anyaka-ni ci owaco ni: “Nyako, a malo!” En oa malo oyotoyot, ci Yecu owaco bot lunyodone ni gumine cam. Go kong kit ma lunyodone guwinyo kwede!