Yecu Ocero Lajaro

Yecu onongo tye ki lureme adek macok kwede adada ma gibedo i Betania. Gin aye Lajaro ki lumegine aryo Maliam ki Marita. Nino mo acel, i kare ma Yecu tye loka kulu Jordan, Maliam ki Marita gucwalo kwena man bote: ‘Lajaro kome lit adada. Rune ibin oyotoyot!’ Ento Yecu pe ocito cutcut. En okuro pi nino aryo ci owaco bot lupwonnyene ni: ‘Wacitu Betania. Lajaro onino, acito kunnu wek acicoye woko.’ Lukwenane guwaco ni: ‘Ka Lajaro onino woko, meno bikonye me cang.’ Ci Yecu otito botgi atir ni: “Lajaro dong oto.”

I kare ma Yecu oo Betania, Lajaro onongo dong orii i lyel pi nino angwen. Dano mapol onongo gubino ka kweyo cwiny Marita ki Maliam. I kare ma Marita owinyo ni Yecu obino, en orune ka rwatte kwede. Marita owaco bote ni: “Rwot, kono nene itye kany, kono omera pe oto.” Yecu owaco bote ni: ‘Omeru bicer. In iye man Marita?’ En owaco ni: ‘Angeyo ni en bicer i kare me nicer.’ Yecu owaco bote ni: “An nicer ki kwo.”

Ka dong Marita ocito bot Maliam ci owacce ni: ‘Yecu oo.’ Maliam ongweco bot Yecu, ci lwak gulubo kore. En opoto piny ka tyen Yecu, ma tye ka koko matek. Ci owaco ni: “Rwot, kono nene itye kany, kono omera pe oto.” Yecu oneno cwer cwiny pa Maliam ci en bene ocako koko. I kare ma lwak guneno pig wange, guwaco ni: ‘Nen kit ma Yecu onongo maro kwede Lajaro.’ Ento jo mukene gupenye kekengi ni: ‘Pingo en pe olaro kwo pa lareme?’ Ngo ma Yecu otimo i ngeye?

Yecu ocito i lyel, ma obedo boro ma kiloro doge ki twon got madit. En ociko ni: ‘Kwanyu got woko.’ Marita owacci: ‘Ento dong ori nino angwen kulu! Kome nongo dong ngwe.’ Ento, kiloro got-ti woko, ci Yecu olego ni: ‘Aba, apwoyi pien dong iwinya. An angeyo con ni iwinya kare ducu, ento awaco lok man pi lwak wek guye ni in yam iora.’ Ci odange ki dwan malongo ni: “Lajaro, katti woko!” Gin mo me aura otimme: Lajaro okatti woko, ma kome pud giriyo ki bongo. Yecu owaco ni: “Wugonye, wuweke ociti.”

Dano mapol ma guneno tango man guketo niye i kom Yecu. Ento jo mukene i kingi gucito bot Luparicayo, ci gutito botgi gin mutimme. Cakke i nino meno, Luparicayo onongo gimito neko Yecu kacel ki Lajaro. Juda Iskariote, ma onongo tye i kin lukwena apar wiye aryo-ni, ocito i wi mung bot Luparicayo ci openyo ni: ‘Wubicula cente adi ka akonyowu me mako Yecu?’ Gumoko me culle lim ryal 30, ci Juda ocako yenyo kare maber ma eromo miyo kwede Yecu i cing Luparicayo.