Lok me Cako Bute me 3

I nge Pii Aluka, Baibul oloko i kom jo manok keken ma gutiyo pi Jehovah. I kin jo magi onongo tye iye Abraim, ma kilwongo ni larem Jehovah. Pingo kilwonge ni larem Jehovah? Ka in lanyodo, kony latinni me niang ni Jehovah tye ki miti madit i kome dok mito konye. Watwero bedo agonya me penyo pi kony ki bot Jehovah kun walubo lanen pa Abraim ki jo mukene ma gubedo lugen, calo Lot ki Yakobo. Watwero bedo ki gen matek ni Jehovah bicobo cikkene ducu.