Anga Ma Pire Tek Loyo I Kwoni?

“In keni aye Ngat Mamalo Loyo i wi lobo-ni ducu.”​—JAB. 83:18, NW.

1, 2. Ka odok i lok me larre pi ngat acel acel, pingo ngeyo nying Jehovah keken pe romo?

TWERO bedo ni acakki ni me neno nying Jehovah obedo i kare ma kinyuto boti ki i Jabuli 83:18. Man nen calo oweko ibedo ki ur i kare ma ikwano lok man: “Wek dano gunge ni, in ma nyingi Jehovah, in keni aye Ngat Mamalo Loyo i wi lobo-ni ducu.” Dong cakke i kare meno, ibedo ka tic ki wang Baibul acel-lu labongo akalakala me konyo jo mukene wek gunge Lubangawa ma lamar-ri, Jehovah.​—Rom. 10:12, 13.

² Kadi bed pire tek ni dano myero gunge nying Jehovah, ngeyo nyinge keken pe romo. Nen kong kit ma laco Jabuli onyutu kwede lok mukene ma pire tek wek walarre i kare ma en waco ni: “In keni aye Ngat Mamalo Loyo i wi lobo-ni ducu.” Ada, Jehovah aye Ngat ma pud dong pire tek loyo i polo ki lobo lung. Macalo Lacwe jami ducu, en tye ki twero me waco ni cwec ducu myero gumine ite locce. (Yabo 4:11) Dong pi tyen lok mupore, mitte ni myero wapenye kekenwa ni, ‘Anga ma pire tek loyo i kwona?’ Pire tek ni myero wangi matut lagamwa pi lapeny man!

Pyem ma Obedo Tye i Poto me Eden

3, 4. Otwere nining bot Catan me bwolo Kawa, dok adwogine obedo ningo?

³ Tyen lok mumiyo lapeny man pire tek twero nen ka maleng i gin mutimme i poto me Eden. Ki i poto kunnu, lamalaika ma lajemo, ma lacen odoko Catan Larac-ci obwolo dako mukwongo Kawa, wek en Kawa oket mitine obed mukwongo i kom cik pa Jehovah ni pe kicam nyig yat moni. (Acak. 2:17; 2 Kor. 11:3) En oye bwola man ma onyutu ni en pe ki woro i kom twero me loc pa Jehovah. Kawa pe oneno Jehovah calo Ngat ma pire tek loyo i kwone. Ento otwere nining bot Catan me bwolo Kawa?

⁴ Catan otiyo ki ryeko mukane i lokke gin ki Kawa. (Kwan Acakki 3:1-5.) Mukwongo, Catan pe otiyo ki nying Jehovah. En olwongo mere keken ni “Lubanga.” Ka iporo ki laco buk me Acakki, en otiyo ki nying Jehovah i tyeng mukwongo i cura meno. Me aryone, ma ka lok i kom ‘cik’ pa Lubanga, Catan openyo gin ma Lubanga ‘owaco.’ (Acak. 2:16) I yo magi mukane-ni, Catan nen calo otemo cayo kit ma cik man pire tek kwede. Me adek-ke, kadi bed en onongo tye ka lok bot Kawa, en otiyo ki nyig lok me “wu” ma tere ni jo mapol. Itimo meno, Catan nen calo otemme me kelo awaka i cwiny Kawa, wek Kawa owiny ni en kara pire tek​—calo iwacci en aye obedo lalok pire kene ki pi cware. Adwogine kono? Kawa nen calo okwanyo kare me lok pi gin aryo ducu kun waco ki twol ni: “Watwero camo nyig yadi ducu ma tye i poto-ni.”

5. (a) Catan obwolo Kawa wek cwinye obed ka pyete i kom gin ango? (b) Kawa onyutu gin ango i kare ma en ocamo nyig yat ma kicikogi ni pe gucam-mi?

⁵ Catan bene onyweno lok ada woko. En onongo tye ka waco ni pe opore pi Lubanga me gengo Adam ki Kawa ni ‘pe gucam nyig yat ducu ma tye i poto-ni.’ Ingeye, Catan omiyo Kawa obedo ka tam i kome kekene ki dong kit ma etwero yubo rom me kwone wek ebed “calo Lubanga.” Motmot Catan oweko cwiny Kawa opyette i kom yat-ti ki nyige ma ka tamo pi watte gin ki Ngat ma omiyo bote jami ducu-ni. (Kwan Acakki 3:6.) Tye me cwercwiny ni i kare ma en ocamo nyig yat man, Kawa onyutu ni Jehovah pe tye ngat ma pire tek loyo i kwone.

Pyem ma Obedo Tye i Kare pa Yubu

6. Catan okelo akalakala i kom rekod me gwoko genne pa Yubu nining, dok kimiyo kare bot Yubu me timo gin ango?

⁶ Inge Cencwari mapol, Yubu ma obedo laco ma lagen-ni onongo kare me nyutu Anga ma pire tek loyo i kwone. I kare ma Jehovah onyutu bot Catan rekod me gwoko genne pa Yubu, Catan odok iye ni: “Itamo ni Yubu lworo Lubanga nono?” (Kwan Yubu 1:7-10.) Catan pe opyem ni Yubu onongo pe obedo lawiny. Ma ka meno, en okelo akalakala i kom tyen lok ma miyo Yubu tiyo pi Jehovah. En odoto Yubu i yo me ryeko, ni Yubu tiyo pi Lubanga pe pi mar ento pi jami ma en mito ki bot Lubanga. Yubu aye onongo twero nyutu ni adot man obedo goba, dok bene kimiye kare me timone.

7, 8. Atematema ango ma Yubu olwenyo kwede, dok diyo cwinye-ni onyutu gin ango?

⁷ Jehovah oye ni Catan okel pekki mapol i kom Yubu, ma man bino mukene dok tuc. (Yubu 1:12-19) Yubu odok nining i alokaloka magi ducu mutimme i kwone-ni? Kiwaco botwa ni en “pe obalo, pe owaco ni Lubanga otimo rac.” (Yubu 1:22) Ento Catan pe oling. En bene omedde ni: “Del pi del! Gin ducu ma dano tye kwede en bimiyo pi kwone.”a (Yubu 2:4) Catan owacci ka Yubu odeno can, ci Yubu bimoko tamme ni Jehovah pe tye Ngat ma pire tek loyo i kwone.

⁸ Two mo marac adada obalo del kom Yubu dok dakone bene oketo lyeto i kom ni oyet Lubanga ci oto woko. I ngeye, jo adek ma gubino ka kweyo cwinye i yo me gobagoba guwaco ni en otimo bal. (Yubu 2: 11-13; 8:2-6; 22:2, 3) Ento i can magi ducu, Yubu ogwoko gennene. (Kwan Yubu 2:9, 10.) En onyutu ni Jehovah aye Ngat ma pire tek loyo i kwone kun diyo cwinye. Yubu bene onyutu ni twere bot dano ma tye ki roc me miyo lagam mo olo twal pi adot me goba pa Larac-ci.​—Por ki Carolok 27:11.

Lagam Maber ma Yecu Omiyo

9. (a) Catan otemo bito Yecu ki miti me kom nining? (b) Yecu odok i atematema man ningo?

⁹ I nge kare mo manok ma Yecu nongo Batija, Catan otemo bito Yecu me lubu miti me paro pire kene ma ka keto Jehovah macalo Ngat ma pire tek loyo i kwone. Catan otemo Yecu tyen adek. Mukwongo, en otemo tic ki miti me kom, kun temo Yecu me loko godi odok kwon. (Mat. 4:2, 3) Yecu onongo orii kec pi nino pyerangwen dok bene kec onongo tye ka neke matek adada. Pi meno, Larac-ci openye me tic ki tekone i yo ma pe opore me cobo peko me kec ma neke-ni. Yecu odok iye ningo? Pe calo Kawa, Yecu oketo cwinye i Lok pa Jehovah dok cutcut okwero atematema man.​—Kwan Matayo 4:4.

10. Pingo Catan odiyo cwinye me waco bot Yecu ni opot piny ki i wi labila me ot pa Lubanga?

¹⁰ Catan otemo bito Yecu wek ocob mitine kekene. En owaco bot Yecu ni opot piny kimalo ki i wi labila me ot pa Lubanga. (Mat. 4:5, 6) Ngo ma onongo Catan mito cobone? Catan onongo tye ka waco bot Yecu ni ka ce en opoto piny ci pe owane, meno binyutu ada ni Yecu tye “wod pa Lubanga.” Catan onongo mito ni Yecu oket tamme mukato kare woko i kome kekene, watim me wakke. Catan onongo ngeyo ni ngat moni twero ye me donyo i pyem mo marac pi awaka ki nongo woro ki bot jo mukene. Catan otiyo ki ginacoya i yo ma pe atir, ento Yecu onyutte ni Etye ki ngec muromo i kom Lok pa Jehovah. (Kwan Matayo 4:7.) Yecu onyutu ni Jehovah aye Ngat ma pire tek loyo i kwone.

11. Pingo Yecu okwero mic pa Larac-ci me ker ducu me lobo-ni?

¹¹ I tutene me agikki, Catan onyuto bot Yecu ker ducu me lobo-ni. (Mat. 4:8, 9) Yecu okwero mic man cutcut. En oniang ni ye ker me lobo-ni rom ki kwero twero me loc pa Jehovah​—twero pa Lubanga me bedo Ngat Mamalo Twal. (Kwan Matayo 4:10.) Tyen aryo magi ducu Yecu onyutu ginacoya ma nying Jehovah kikome tye iye.

12. Tam mene matek ma onongo mitte ni Yecu omoki i kare ma ticce onongo cok gik i lobo, dok ngo ma wapwonyo ki i kom kit ma en odok kwede imoko tam meno?

¹² I kare ma ticce onongo cok gik i lobo, onongo mitte ni Yecu omok tam mo ma tek adada. I kare ducu ma en pwonyo dano, onongo en dong onyutu mitine me miyo kwone calo ginkok. (Mat. 20:17-19, 28; Luka 12:50; Jon 16:28) Ento en onongo bene oniang ni kibiketo adot me goba kun kingolo kop i wiye ite cik pa Lujudaya calo ngat ma balo nying Lubanga. Lok man ni en labal nying Lubanga-ni aye owango cwinye adada ma lubbe ki tone. En olego ni: “Wora, ka ce imito, kwany kikopo man woko ki i koma.” Dok en omedde ni: “Ento pe kit macalo an amito.” (Mat. 26:39) Kit ma Yecu ogwoko ki gennene nio wa ito, onyutu labongo akalakala mo keken anga ma obedo Ngat ma pire tek loyo i kwone!

Lagamwa i Kom Pyem Man

13. Pwony ango ma dong wanongo ki bot Kawa, Yubu ki Yecu Kricito?

¹³ Ngo ma dong watyeko pwonyone? Kitung bot Kawa wapwonyo ni jo ma gimine i miti me kom nyo awaka, ginyutu-ni Jehovah pe tye Ngat ma pire tek loyo i kwogi. Ento ka iporo ki pa Yubu, kit ma en ogwoko kwede gennene, wapwonyo ni kadi wa dano ma gitye ki roc-ci gitwero nyutu-ni giketo Jehovah bedo mukwongo kun gideno can wa i agikki​—kadi bed gin ma tye ka kelo can meno pe giniang iye maber. (Yak. 5:11) Me agikkine, lanen pa Yecu pwonyowa ni myero waye cac pa dano dok pe waket piwa obed tek mukato kare woko. (Ibru 12:2) I yo ango ma watwero keto pwony magi i tic?

14, 15. Kit ma Yecu odok kwede i atematemane pat ki pa Kawa nining, dok i yo ango ma watwero lubo kwede lanen pa Yecu? (Lok i kom cal ma tye piny kanyi.)

¹⁴ Myero pe iwek atematema omi wi owil i kom Jehovah. Kawa oweko tamme okemme ki atematema ma onongo en tye iye. En oneno ni nyig yat meno “ber me acama, dok nen mwonya bene, dok yat meno ber.” (Acak. 3:6) Pat tutwal ka iporo ki kit ma Yecu odok kwede i atematema adek-ki! Tyen adek magi ducu, en pe omiyo wiye owil ki i adwogi ma bino pi atematema magi. En otiyo ki Lok pa Lubanga dok bene otiyo ki nying Jehovah.

¹⁵ Ngo ma waketo cwinywa iye ka watye ka rwatte ki atematema me timo gin ma cwero cwiny Jehovah? Ka wamedde kiketo cwinywa i kom atematema, mitiwa marac bene medde ameda. (Yak. 1:14, 15) Myero watim gin mo oyotoyot me kwanyo woko miti meno, kadi bed timo meno pe yot tutwal ma nen calo kwanyo dul komwa mo woko. (Mat. 5:29, 30) Kit macalo Yecu otimo kwede-ni, omyero waket cwinywa i kom adwogi ma bino pi jami ma watimogi​—kit ma gigudo kwede watwa ki Jehovah. Omyero wiwa opo i kom Lokke, kit ma Baibul waco kwede. Man aye yo acel keken ma watwero nyutu kwede ni Jehovah aye Ngat ma pire tek loyo i kwowa.

16-18. (a) Ngo ma twero weko cwinywa tur woko marac atika? (b) Ngo ma bikonyowa me ciro can kare mogo ma nongo kwo tek?

¹⁶ Omyero pe iwek pekki mukemo in omi kiniga omaki i kom Jehovah. (Car. 19:3) Ka wamedde ki nyiko cok ki agikki me lobo man marac-ci, jo pa Jehovah ma ginongo peko ma bino pi can ma poto atura kacel ki can mukene tye ka medde ameda. I Kare man me agikki-ni, myero pe wagen ni wabinongo gwok mo i yo me tango. Man rom aroma ki pa Yubu, cwinywa twero tur ka warwenyo jowa me amara nyo wadeno can mapat pat wan kikomwa.

¹⁷ Yubu pe oniang pingo Jehovah oye ni jami magi gubed ka timme, dok bene i kare mukene wan pe watwero niang pingo jami maraco timme. Twero bedo ni wawinyo pi utmegiwa ma lugen ma oyengyeng onekogi calo mutimme i lobo Haiti, nyo ma guto pi can ma poto atura. Nyo gwok wangeyo ngat mo ma gwoko gennene ma odeno can nyo oto woko i awano mo marac atika. Nyo bene wan kikomwa watwero nongo ni watye i kwo matek nyo pi lok me ngolo kop alenga. Pekowa-ni twero miyo wabako dogwa ni: ‘Pingo Jehovah. Pingo timme i koma? Gin ango marac ma atimo?’ (Kab. 1:2, 3) Ngo ma bikonyowa i kare ma kit man?

¹⁸ Omyero wagwokke pe me cako tamo ni jami ma kit meno gubedo lanyut ni Jehovah pe tye ki cwak i komwa. Yecu onyutu ka maleng lok ada man i kare ma en tye ka lok pi can mo mutimme i karene ca. (Kwan Luka 13:1-5.) Peko mogo mapol gibino pi adwogi me “kare kacel ki jami ma gitimme atura ata.” (Latit. 9:11, NW) Ento labongo paro pi kwene ma peko moni tye ka a ki iye, watwero cirone ka ce waciko wangwa bot “Lubanga ma kweyo cwiny dano ducu.” En bimiyo botwa teko me medde ameda nio wa i agikki.​—2 Kor. 1:3-6.

19, 20. Ngo ma okonyo Yecu me ciro tim mogo me lewic, dok ngo ma romo konyowa me cirone bene?

¹⁹ Pe iwek awaka nyo lewic odok gin ma iketo tammi iye mukwongo. Mwolo ma Yecu tye kwede okonye me ‘miyo kwone ducu ci okwanyo kit me opii.’ (Pil. 2:5-8) Yecu ociro tim mogo me lewic kun jengo kwone i kom Jehovah. (1 Pet. 2:23, 24) Itimo man, Yecu oketo miti pa Lubanga obedo mukwongo, dok adwogine obedo ni kikete i kabedo me dit ma malo twal. (Pil. 2:9) En kit kwo acel-lu aye ma Yecu omiyo me aluba bot lupwonnye.​—Mat. 23:11, 12; Luka 9:26.

²⁰ I kare mukene jami ma gitemo niyewa kelo lewic. Ento, omyero wabed ki gen calo pa Lakwena Paulo ma owacci: “Man en gin mumiyo aneno can kit macalo atye ka nenone wa i kare-ni, ento lewic pe maka gira, pien angeyo ngat ma aye, dok bene ageno atir ni, en twero gwoko gin ma omiyo i cinga nio i Nino maca.”​—2 Tem. 1:12.

21. Kadi bed dano gitamo pigi kengi i lobo-ni, ngo ma imoko i cwinyi me timone?

²¹ Baibul otito ni i karewa-ni dano bibedo ka “maro komgi kengi.” (2 Tem. 3:2) Pi meno, pe wabedo ki ur ka watye i kin dano ma gitamo pigi kengi. Omyero pe wawek kodi kit meno ocidwa! Ma ka meno, kadi bed wakemme ki atematema, watye ka ciro pekki mapol, nyo kitimo gin ma keliwa lewic, wan ducu ki acel acel myero wamok i cwinywa me nyutu-ni Jehovah aye Ngat ma pire tek loyo i kwowa!

[Lok ma tye piny]

Ngo ma Wapwonyo ki i . . .

• kit ma Catan obwolo kwede Kawa?

• kit ma Yubu odok i peko ma opoto i kome?

• kom gin ma onongo pire tek loyo bot Yecu?

[Cal ma tye i pot karatac 21]

Yecu okwero mic pa Catan dok oketo tamme me tiyo miti pa Jehovah

[Cal ma tye i pot karatac 22]

Miyo caden i kema inge oyengyeng i lobo Haiti

[Cal ma tye i pot karatac 22]

Ka watye i peko, watwero keto genwa i kom “Lubanga ma kweyo cwiny dano ducu”