Kinyuto Laloc ma Pe Nen me Lobo-ni

I NINO mo acel, Yecu owaco bot lwak ni: “Lalo lobo man gibibole woko.” Lacen, en omedo ni ‘lalo lobo man pe tye ki twer i koma’ dok ni “laloc me lobo man dong gingolle kop woko.” (Jon 12:31; 14:30; 16:11) Yecu mono onongo tye ka lok i kom anga?

Ka waneno gin ma en onongo tye ka wacone i kom “lalo lobo man,” ngene kene ni Yecu onongo pe tye ka lok i kom Wonne, Lubanga Jehovah. Ci dong, anga mono ma tye “lalo lobo man”? I yo ango ma “gibibole woko,” dok “gingolle kop”?

“Lalo Lobo Man” Onyutte

Kit macalo latim bal muywek pol kare wakke pi tekone-ni, Larac-ci bene otimo kumeno i kare ma en otemo Yecu, Wod pa Lubanga. I nge nyuto “ker ducu” me lobo-ni bot Yecu, Catan owacce ni: “Abimiyi twer man ducu ki deyo man ducu, pien gityeko miyo bota, atwero miyo bot ngat ma an amito. Pi meno, ka iwora, ci jami magi ducu bibedo meri.”​—Luka 4:5-7.

Ci dong, waromo niang atematema meno nining ka ce Larac-ci obedo lanyut me gin marac, kit ma jo mogo giwaco kwede-ni? Tika tam mo marac aye obedo ka temo Yecu? Ka tye kumeno, ci kiromo wacone nining ni “bal mo pe i kome”? (1 Jon 3:5, Baibol pa Katoli) Ma ka kwero ni Larac-ci pe tye ki twero i kom dano, Yecu omoko atir ka maleng ni Larac-ci aye tye ka ‘loyo lobo man,’ dok bene owaco ni Larac-ci ‘laneko’ dok “loko lok goba.”—Jon 14:30; 8:44.

I nge mwaki 60 ma Larac-ci otemo iye Kricito, lakwena Jon opoyo wi Lukricitayo i kom teko ma Larac-ci tye kwede me doro dano, kun waco ni “lobo ducu tye i te loc pa Larac.” Jon bene owacci Larac-ci tye “labwol dano ma i wi lobo ducu.” (1 Jon 5:19; Niyabo 12:9) Ada, Baibul owacci cwiny mo ma pe nen aye tye ka ‘loyo lobo man.’ Ento en tye ka doro dano i rwom ma rom mene?

Lalo Lobo-ni Miyo Twero Bot Jo ma En Loyo Kwedgi

I kare ma ocoyo pi lweny ma Lukricitayo gitye iye pi niyegi, lakwena Paulo otito ka maleng lamonegi ma pud dong rac loyo. En owaco atir ni: “Wan pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo.” (Jo Epeco 6:12) Pi meno, lweny man kato kero pa dano woko, dok lwenye pe tye i kom dano ma tye ki “kom ki remo,” ento i kom “dul mony mogo maraco me cwiny.”

Ka kiwacci “dul mony mogo maraco me cwiny,” nongo pe kitye ka waco lanyut mogo me gin maraco, ento cwec me cwiny ma gitek dok kitgi raco. Pi meno, Larac-ci obedo ka nyuto tekone kun tiyo ki lumalaika mukene ma bene gujemo calo en, ci guweko “kabedogi woko” i polo.​—Juda 6.

Buk pa lanebi Daniel onyuto kit ma ‘lalo lobo-ni’ obedo ka doro kwede lobo cakke wacon adada. Lanebi Daniel obedo ka kumo pi cabit adek kulu pi Lujudaya luwote ma gudwogo cen i Jerucalem ki i opii i lobo me Babilon i mwaka 537 ma kare man pudi. Lamalaika ma Lubanga ocwalo me cuko cwiny lanebi-ni, otito gin mumiyo egalle. En owaco ni: “Lamalaika ma rwot me ker me Percia ogenga woko pi nino ma romo pyeraryo wiye acel kulu.”​—Daniel 10:2, 13.

Nga ma obedo “lamalaika ma rwot me ker me Percia”? Lamalaika ma Lubanga ocwalo-ni onongo pe tye ka lok i kom Kabaka Ciro me Percia, ma onyuto cwak i kom Daniel ki lutugi-ni. Ento, i yo ango ma laloc ma dano ma mwa-ni cako jemo kwede i kom cwec me cwiny pi cabit adek, kun lamalaika acel keken oneko lulweny matego 185,000 kulu i dyerwor acel? (Icaya 37:36) Lamalaika mager ma ‘rwot me ker me Percia-ni’ obedo lawang Larac-ci, ma kimiye twero me loyo Ker me Percia. Ka imedde ki kwano lok man, inongo ni lamalaika pa Lubanga owaco ni myero dok kong elweny i kom lamalaika ma “rwot me Percia” ki “rwot pa jo Grik.”​—Daniel 10:20.

Ngo ma watwero mokone ki i lok man? Waromo moko ni “gin ducu ma loyo wi lobo” gitye ento pe ginen, lumalaika maraco ma ginywako i loyo lobo-ni kun laditgi Catan Larac-ci, aye telo wigi. Nicakke wacon nio wa i kare mitigi tye kwene?

Laloc me Lobo Man Nyuto Akemone i Kom Dano

I Niyabo, buk me agikki me Baibul, lakwena Jon otito kit ma Yecu ma en aye Mikael lamalaika madit-ti, oloyo kwede Larac-ci kacel ki jogine dok bene otito pi adwogi marac ma ryemogi ki i polo bikelo. Wakwano ni: “Wubineno can malit atika, pien Ladot dong olor obino woko piny botwu ma tye ki akemo madwong, pien ngeyo ni karene tye manok!”​—Niyabo 12:9, 12.

Larac-ci onyuto akemone nining? Lutim bal mapol gitute me timo gin mo keken ma twere me bwot ka jami odoko gwa. I yo acel-lu, Catan ki jogine gumoko tamgi wek kityekgi kacel ki lobo-ni ki dong jo ducu ma gibedo iye. Pien ngeyo ni etye ki kare manok, Larac-ci obedo ka tic ki gin acel ma pire tek me doro dano—biacara madongo—me ilo malo miti marac ma pe jukke me cat ki wil, ma tyeko lonyo ma Lubanga ocweyogi dok balo kabedo murumowa i lobo ducu, dok man keto kwo pa dano ka mading.​—Niyabo 11:18; 18:11-17.

Cakke wacon i tekwaro pa dano, miti ma Catan tye kwede me loc onen i lok me dini ki tim me wibye. I buk me Niyabo, kinyuto ni lee cung pi loc me wibye ma Larac-ci omiye “twero madit.” Bene loko i kom wat me lewic ma tye i kin lutela wibye ki me dini ma obedo timo abor i yo me cwiny. (Niyabo 13:2; 17:1, 2) Tam kong i kom dic, bedo opii, lweny madongo, ki lweny i kin kaka ma otero cencwari mapol dok oneko dano milion madwong ata. Tika ngat mo ada romo wacci jami maraco ki malik ma gubalo tekwaro pa dano-ni gubedo jami mabeco ma dano myero gutim? Nyo kece gubino macalo adwogi me tic pa cwiny maraco ma pe ginen?

Baibul onyuto atir ngat ma obedo ka tic ki luloc kacel ki loc matego me lobo-ni. Kadi bed gingeyo nyo pe, dano ginyuto kit pa lalocgi kacel ki cwiny ma en tye kwede me ‘loyo nyo balo’ lobo. Ento dano gibideno can pi kare ma romo mene ite loc pa Larac-ci?

Larac-ci Dong Kicok Nginyone

Jami ma Yecu otimogi i cencwari me acel oyuto ni cokcok-ki kibinginyo Larac-ci kacel ki jogine ducu. I kare ma lupwonnye pa Yecu gutito kit ma giryemo kwede jogi, Yecu owaccigi ni: “Yam aneno Catan kun poto piny nia ki i polo macalo lutkot.” (Luka 10:18) Lok magi nyutu ni, Yecu onongo cwinye yom ni ebiloyo lalo lobo-ni i kare me anyim ka ce en Yecu edok i polo macalo Mikael lamalaika madit. (Niyabo 12:7-9) Kwano matut lok pa lunebi me Baibul nyuto ni loc man otimme i polo i 1914.a

Cakke i mwaka meno, Larac-ci ngeyo ni karene dong odong manok ma peya kinginye. Kadi bed ni ‘lobo ducu tye i te locce,’ dano milion mapol i kare-ni pe guye ni en ologi itutene me agikki-ni. Baibul okonyogi me ngeyo nga ma en obedo ki dong ryekone. (2 Korint 2:11) Gin ginongo cuko cwiny ki i lok ma Paulo ocoyo bot Lukricitayo luwote ni: “Lubanga won kuc binyoto Catan woko oyotoyot piny i te tyenwu.”b​—Jo Roma 16:20.

Cokcok-ki Larac-ci kibinginyone woko! Ite loc pa Kricito, jo ma kitgi atir gibiloko lobo doko paradic. Tim gero, adegadega, ki dong woro me jami bibedo pe. Baibul waco ni: “pe dong gibipo pi jami macon.” (Icaya 65:17) Pud dong bibedo me kwe cwiny pi jo ma gua woko ki ite twero pa laloc ma pe nen me lobo-ni!

[Lok ma tye piny]

[Boro buk i pot karatac 9]

I te loc pa Kricito, jo ma kitgi atir gibiloko lobo doko paradic