4 Lubanga Tye ki Apokapoka Tika Man Tye Lok Ada?

Gin ma gwok nyo iwinyo: “Lubanga aye loyo lobo-ni, dok jami ducu ma timme-ni gitimme pi mitine. Kit ma lobo-ni opong ki apokapoka, ngolo kop alenga, ki dic-ci nen calo Lubanga aye tye i nge jami ma gitye ka timme-ni.”

Gin ma Baibul pwonyo: Pe Lubanga aye kelo jami maraco ma tye ka timme i lobo-ni. Baibul loko i kom Jehovah ni: “Ticce ducu cobbe kakare; gin ducu ma en tiyo tye atir.”​—Nwoyo Cik 32:4.

Lubanga lakica bot dano ducu, kadi wa jo ma pe gupore pi kicane. Me laporre, “en miyo cengnge tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene.” (Matayo 5:45) En tero dano me rangi del kom ki tekwaro mapat pat ducu marom labongo apokapoka, kit ma kinyuto kwede i Tic pa Lukwena 10:34, 35 ni: “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”

Ci dong, ngo ma tye ka kelo ngolo kop alenga? Jo mapol giyero me timo jami maraco, dok pe gilubo lanen pa Lubanga ka odok i timo jami matir. (Nwoyo Cik 32:5) Ki bene, Baibul nyuto ni Lubanga oye ni lamone, Larac-ci, olo lobo-ni.a (1 Jon 5:19) Ento, cokcok-ki Lubanga bikwanyo twero me loyo lobo-ni woko ki bote. En dong oketo yub me “turo tic pa Catan woko.”​—1 Jon 3:8.

Kit ma ngeyo lok me ada konyi kwede: Iromo bedo ki ur ka iwinyo ripot i kom camucana, dic ki ngolo kop alenga ma tye ka medde ameda-ni. Ngeyo gin ma tye ka kelo jami magi bikonyi me niang gin mumiyo piny tye marac ki dok pingo tute pa dano me yubo lobo wek obed kabedo maber-ri pe tye ka nyako nyige. (Jabuli 146:3) Ma ka dyero cawa ki keroni me kelo alokaloka ma pe birii i lobo-ni, iromo bedo ki gen matir pi kare me anyim kun ijenge i kom cikke pa Lubanga.​—Niyabo 21:3, 4.

Niang gin mumiyo jami maraco tye bikonyowa tutwalle ka kwo tye matek. Ka pe kiterowa i yo mupore, waromo kok calo latic pa Lubanga, Kabakuk, ma okok ni: “Cik dong odoko goro dok gin ma konnye pe, ngolo kop atir bene dong pe.” (Kabakuk 1:4) Lubanga pe omiyo pwod bot Kabakuk pi kokone-ni. Ento, Lubanga ojingo cwiny Kabakuk ni etyeko keto nino me yubo jami ducu wek obed atir dok okonyo Kabakuk me nongo yomcwiny i kare me peko. (Kabakuk 2:2-4; 3:17, 18) I yo acel-lu, keto gen i kom Lubanga ni en bikwanyo jami maraco woko ducu twero konyi me weko cwinyi kacel ki wi bedo mupye mot i lobo man ma opong ki apokapoka-ni.

[Lok ma tye piny]

[Boro buk i pot karatac 7]

Tika Lubanga aye tye i nge deno can ki ngolo kop alenga?

[Ka ma cal oa ki iye i pot karatac 7]

© Sven Torfinn/Panos Pictures