Ti Pi Jehovah Ki Cwinyi Ducu
“Aco in woda Culeman, aciki ni myero ibed ame ingeyo Obanga a pappi, kun itio bange kede cunyi ducu.”—1 TEKWARO 28:9, Baibul me leb Lango.
MI LAGAM PI LAPENY MAGI:
Cwiny ma kiloko iye i Baibul-li obedo gin ango?
Wan watwero ngiyo cwinywa nining?
Watwero tic pi Jehovah ki cwinywa ducu nining?
1, 2. (a) Dul kom mene ma pol kare kiloko iye makato mukene-ni ducu i Baibul ento te lokke pat? (b) Pingo mitte mada ni myero waniang tyen lok me cwiny-nyi kit ma kitiyo kwede i yo mapat-ti?
LOK PA LUBANGA loko i kom dul kom dano ento nongo tyen lokke tye mapat. Me labolle Daudi owaco ni: ‘Mi wanggi ocor woko, wek pe gunen piny; mi pyergi onyongnge obed ka myel amyela nakanaka.’ Baibul bene loko i kom jami mogo ma Jehovah dagi ma i kingi tye iye, “tyen ma ringo oyot i gin marac.” Jehovah owaco ni, “Nen, in Cion dong atyeko goro nyingi woko ki coc i cinga.” Dok lanebi Jeremia owaco ni, “wuwiny lok man, wun luming ki jo ma wiwu oding, ma wangwu tye, ento pe wuneno, ma itwu tye, ento pe wuwinyo.”—Jab. 69:23, Car. 6:16-19, Baibol pa Katoli; Ic. 49:16; Jer. 5:21.
2 Tye kono ni dul kom mo acel kiloko iye i Baibul makato dul kom mo keken ento i yo mapat. Dul kom man Anna oloko iye i legane ni: ‘Cwinya yom pien in Rwot [Jehovah] ilara.’ (1 Cam. 2:1) Ki lok ada, jo ma gucoyo Baibul gutiyo ki nyig lok ni cwiny-nyi tyen ma romo alip ki wiye dok tyen lokke ducu nongo patpat. Mitte adada ni myero waniang gin ma cwiny obedo, pienni Baibul waco ni cwiny aye gin ma bwolo dano dok omyero wagwoki.—Kwan Jeremia 17:9.
CWINY MA KILOKO IYE I BAIBUL-LI OBEDO GIN ANGO?
3. Wan watwero niang te lokke me cwiny ma ki loko i iye i Baibul-li nining? Mi lapor.
3 Kadi bed Baibul pe tito te lok me “cwiny” kit ma dikconari tito kwede, Baibul miniwa kare me niang te lok man. I yo ango? Me labolle, tam kong i kom yat mo ma pote oluk adada. Ka icung itere, ibineno pote manok keken ento nongo pe itwero neno kit ma yat meno kulu nen kwede. Ka icung ki ka mabor bor manok ci ibineno yat-ti ducu. I yo acel-lu bene, omyero wanen kabedo mapol ma kitiyo iye ki nyig lok ni “cwiny” dano i Baibul wek waniang gin ma obedo. Kit ma kitiyo kwede i Baibul-li, cwiny dano mono obedo gin ango?
4. (a) “Cwiny” cung pi gin ango? (b) Lok pa Yecu ma kicoyo i Matayo 22:37 te lokke ngo?
4 Jo ma gucoyo Baibul gutiyo ki lok ni “cwiny” me cung pi kit ngat moni ma pe nen ki woko. Man kwako mitiwa, tamwa, cwiny ma watye kwede, kerowa, nwang cwiny ma watye kwede, ki dong yub ma watye kwede. (Kwan Nwoyo Cik 15:9; Carolok 13:12; Icaya 10:7.) Buk mo acel nyuto ni cwiny man obedo “gin ma ngat moni obedo i yo ducu nikwanyo kome ma nen ki woko.” Ento i kine mukene, “cwiny” kitiyo kwede ma nongo te lokke pe dit tutwal. Me labolle, Yecu owacci: ‘Mar Jehovah Lubangani ki cwinyi ducu, ki kwoni ducu ki tammi ducu.’ (Mat. 22:37) I wang Baibul eni, “cwiny” tye ka cung pi tam, miti, ki dong kit ma ngat moni winyo kwede ki i cwinye. Kit ma Yecu oloko kwede i kom cwiny, kwo ki dong tam patpat-ti, en onyuto ni pire tek ni wamar Lubanga i tamwa ki dong kit ma wakwo kwede. (Jon 17:3; Ep. 6:6) Ento ka ce ki loko i kom “cwiny” keken, nongo tye ka cung pi kit ngat moni ma pe nen ki woko-ni.
GIN MUMIYO OMYERO WAGWOK CWINYWA
5. Pingo omyero watute me tic pi Jehovah ki cwinywa ducu?
5 Ma lubbe ki cwiny, Kabaka Daudi opoyo wi Solomon ni: “Aco in woda Culeman, aciki ni myero ibed ame ingeyo Obanga a pappi, kun itio bange kede cunyi ducu kede cuny ayom. Pien Rwot [Jehovah] ngiyo cuny jo ducu, en ngeyo ginoro lung ame dano tye ayiko i cunye kede ginoro lung ame en mito.” (1 Tekwaro 28:9) Ada, Jehovah obedo ngat ma Ngiyo cwiny ducu, medo wa ki megwa. (Car. 17:3; 21:2) Gin ma en nongo i cwinywa gudo matek wat i kin wan ki en ki dong anyimwa. Pi meno, watye ki tyen lok mucwiny mumiyo omyero walub tira ma Daudi omiyo-ni kun watute ki kerowa ducu me tic pi Jehovah ki cwinywa ducu.
6. Ngo ma myero wiwa opo iye ma lubbe ki moko tamwa me tic pi Jehovah?
6 Mit komwa i tic pi Jehovah macalo jone-ni nyuto ni ada wan watye ki miti matek me tic pi Lubanga ki cwinywa ducu. Ento wiwa bene po ni lyeto ma a ki i lobo pa Catan-ni kacel ki komwa me bal-li romo gudowa matek adada dok weko pe wacung i tamwa ma wamoko me tic pi Lubanga ki cwinywa ducu. (Jer. 17:9; Ep. 2:2) Me niang ka ce wacung ki tyenwa aryo me tic pi Lubanga dok bene pe wailo cingwa—omyero wangi cwinywa kare ki kare. Watwero timone nining?
7. Gin ango ma nyuto kit ma cwinywa tye kwede?
7 Ngene kene ni pe tye ngat mo ma romo neno gin ma i cwinywa kit ma pe waromo neno kwede i yat-ti. Ento, ma lubbe ki Pwony ma Yecu omiyo i Wi Got, kit ma yat moni nyak kwede nyuto ka ada yat meno kome yot, i yo acel-lu bene kit ma watimo kwede ki jami nyuto kit ma cwinywa tye kwede. (Mat. 7:17-20) Kong dong wanenu tic acel ma kit meno.
YO ACEL MA WAROMO NGIYO KI CWINYWA
8. Lok ma Yecu owaco i Matayo 6:33-ni kubbe ki gin ma tye i cwinywa nining?
8 Con kong i pwonye ma omiyo i wi got, Yecu owaco bot luwiny en gin ma myero gutim me nyuto ni ada gitye ki miti me tic pi Jehovah ki cwinygi ducu. En owaco ni: “Ento kong wukwong keto cwinywu i kom kerre, ki nongo kit ma atir ma en tye kwede, ci jami magi ducu gibimedo botwu.” (Mat. 6:33) Ada, gin ma waketo bedo mukwongo i kwowa nyuto ka ma mitiwa tye iye, tamwa, ki dong pulan ma tye i cwinywa. Ngiyo gin ma waketo mitiwa iye mukwongo tye yo acel me ngiyo ka ce watye ka tic pi Lubanga ki cwinywa ducu.
9. Yecu olwongo co mogo me timo gin ango, dok kit ma gudok iye onyuto gin ango?
9 I nge nino manok keken ma Yecu ocuko ki cwiny lulub kore ni ‘kong gukwong keto cwinygi i kom ker-ri,’ gin mo otimme ma nyuto kit ma cwiny dano moni tye kwede ma lubbe ki gin ma en keto mukwongo i kwone. Luka ma ocoyo Jiri-ni otito gin mutimme kun waco ni, Yecu “ociko wange matek me cito i Jerucalem,” kadi bed en onongo ngeyo gin ma bitimme i kome. I kare ma en kacel ki lukwenane “gitye ka wot i yo,” Yecu orwatte ki co mogo ci owaco botgi ni: ‘Wubin wubed lulub kora.’ Co magi onongo gitye atera me lubo kor Yecu—ento tye jami mogo ma onongo gimito timone. Laco acel ogamo ni: “Ladit, kong iwek aciyik wora.” Ngat acel owacci: “Abilubi, ladit; ento kong iwek acit, acik jo tuwa.” (Luka 9:51, 57-61) Man pud dong onyuto apokapoka madit ma tye i kin tam ma Yecu omoko me timo miti pa Lubanga ki tam magoro ma co magi gitye kwede! Pien guketo mitigi anyim makato pi Ker-ri, gin gunyuto ni pe gimito tic pi Lubanga ki cwinygi ducu.
10. (a) Ngo ma lulub kor Yecu gutimo i kare ma en olwongogi ni gulub kore? (b) Lapor mene ma Yecu omiyo?
10 Pien wapat ki co magi, wan wajolo lwongo pa Yecu me bedo lulub kore dok watye ka tic nino ducu pi Jehovah. I yo ma kit man, wan wanyuto kit ma wawinyo kwede ki i cwinywa i kom Jehovah. Kadi bed watye ka tic matek i tic pa Jehovah, pud mitte ni myero wabed ma wangwa bit me neno jami mogo ma twero balo cwinywa woko. Jami magi gubedo gin ango? I lokke ki co magi ma onongo myero gudok lupwonnyene-ni, Yecu otito gin man marac-ci, kun wacci: “Pe tye dano mo ma mako kweri dyang, ka dok neno ngeye, ma biromo bedo i ker pa Lubanga.” (Luka 9:62) Pwony ango ma wanongo ki i lapor man?
TIKA WAMOKO “MATEK I KOM GIN MABER”?
11. I lapor pa Yecu-ni, gin ango mutimme i kom tic pa lapur-ri, dok pingo?
11 Wek pwony ma tye i lapor ma Yecu omiyo-ni omok i wiwa, kong wanenu lapor mukene ma bikonyowa. Go kong ni latic mo tye i poto ka pur. Ento ma en tye ka pur, en bedo ka tamo mere pi jo me ode, lureme, cam, wer, nyero me yomcwiny, ki dong te yat mo maber me yweyo. En tye ka paro pi jami magi matek adada. I nge puru katala madit dit, miti ma laticci tye kwede pi jami magi me kwo-ni bwoye woko ma weko en dong lokke ka “neno ngeye.” Kadi bed ni tic pud tye mapol wang ma en opito kodi i poto, tamme ngak woko ka mapat dok man balo ticce. Ngene kene ni cwiny laditte bicwer adada pien laticci pe odiyo cwinye.
12. Kubbe ango ma tye i kin lapor ma Yecu omiyo i kom lapur-ri ki Lukricitayo mogo i kare-ni?
12 Nen kong dong kit ma gin acel-lu romo timme kwede i komwa i kare-ni. Lapur-ri romo cung pi Lakricitayo mo keken ma nen calo iwacci tye ki wat macok ki Jehovah ento i adane kara tye ka to i yo me cwiny. Me laporre, kong watamu i kom omego mo ma cwalo cawa malac i ticwa me pwony-nyi. Ento, kadi bed ni en bino i cokke ducu dok cito i ticwa me pwony, cwinye pud bedo ka lwodo yo mogo me kwo ma tye i lobo-ni ma en nongo ni yomo cwinye adada. Dok en bedo ka paro pigi. Motmot, i nge tiyo ticce me pwony pi mwaki mapol, mitine pi jami mogo me lobo-ni cako bwoye woko ma weko en lokke ci cako “neno ngeye.” Kadi bed ni tic mapol pud tye me atima i ticwa me pwony-nyi, en pe ‘omako lok me kwo dong matek,’ dok tamme ngak woko ma weko en pe dong tiyo kit macon-ni pi Lubanga. (Pil. 2:16) Jehovah, “Won poto,” cwinye bicwer ka laticce mo keken pe diyo cwinye.—Luka 10:2.
13. Tic pi Jehovah ki cwinywa ducu kwako gin ango?
13 Pwony man nen ka maleng. Obedo gin maber tutwal ka ce kare ki kare wanywako kacel i tic ma dongo dano calo cito i cokke ki dong tito kwena. Ento timo tic pi Jehovah ki cwinywa ducu pe dong gik kany keken. (2 Tekwaro 25:1, 2, 27) Ka ce Lakricitayo moni pud maro “neno ngeye”—nyo kit kwo ma tye i lobo-ni—man keto wat maber ma tye i kin en ki Lubanga ka mading. (Luka 17:32) Ka ‘wakwero gin marac, wamoko matek i kom gin maber,’ ci wabiromo “bedo i ker pa Lubanga.” (Rom. 12:9; Luka 9:62) Wan ducu omyero wanen ni pe gin mo keken i lobo pa Catan-ni ogengwa me timo jami ma lubbe ki Ker-ri ki cwinywa ducu kadi bedi dong gin meno nen calo ber ma pe wacce.—2 Kor. 11:14; kwan Jo Pilipi 3:13, 14.
BED MA WANGI TWOLO!
14, 15. (a) I yo ango ma Catan tye ka tute kwede wek etur arima ma tye i cwinywa? (b) Mi labol ma nyuto ni kit yo ma Catan tye ka tic kwede-ni rac ma lapore pe.
14 Marwa pi Jehovah aye omiyo wadyere bote. Nicakke i kare meno, polwa dong wanyuto ni wamito ni cwinywa omok liking i kom Jehovah pi mwaki mapol. Ento, Catan gire peya oilo cinge. En pud tye ka mito cwinywa-ni. (Ep. 6:12) Ento en bene ngeyo ni wan pe watwero kwero Jehovah lawang acel. Pi meno en tute me tic ki “lok me lobo man” motmot i yo me ryeko adada wek etur arima ma watye kwede i cwinywa me tic pi Lubanga. (Kwan Marako 4:18, 19.) Pingo yo man ma Catan tiyo kwede-ni cobo mitte-ni maber adada?
15 Me gamo lapeny man, tam kong ni itye ki mucele kikopo apar i cupuria. I kare ma itye ka tito kwena i wang ticwu, latinni ojubo manok otedo ci ocamo. Tika ibingeyo ni mucele-ni mukene kijubo? Nen calo ngeyone bibedo tek. Ka dok orwone i odiko en ojubo makato maca manok. Itamo ni ibingeyone? Kulu, pe ibingeyo! Pingo? Pien mucele-ni tye ka rweny motmot. Ka gin ma kit meno otimme, nongo dong rom aroma ma Catan ocobo mitine woko me dwoko piny arimawa pi tic pi Jehovah. Ka Lakricitayo moni pe obedo ma wange twolo, en twero keng ngeyo alokaloka ma timme motmot i yo ma kit man.—Mat. 24:42; 1 Pet. 5:8.
LEGA PIRE TEK
16. Watwero gwokke ki i kom diro pa Catan nining?
16 Wan watwero gwokke ki i kom diro pa catan kun watiyo pi Jehovah ki cwinywa ducu nining? (2 Kor. 2:11) Lega pire tek adada. Paulo ocuko cwiny Lukricitayo luwote ni, “wucung kun wugengnge kekenwu i roro [ryeko ki bita] pa Catan.” Dok okwayogi bene ni: “Wuleg kare ducu i cwiny ki lega me bako dog.”—Ep. 6:11, 18; 1 Pet. 4:7.
17. Pwony ango ma wanongo ki i lega pa Yecu-ni?
17 Wek wacung matek i kom Catan, omyero walub lanen pa Yecu ka odok i lok me lega, pien man onyuto mitine matut me tic pi Jehovah ki cwinye ducu. Me labolle, nen kong gin ma Luka ocoyo ma lubbe ki kit ma Yecu olego kwede i dyewor ma onongo peya kineke: “Ka kun onongo tye ki kumo twatwal, omedde ki lega matek.” (Luka 22:44) Yecu onongo gire con lego ki cwinye ducu, ento man ma dong en okemme ki atematema madit loyo i kwone i kare ma tye i lobo-ni, en olego “matek” dok Lubanga ogamo legane-ni. Labol pa Yecu-ni nyutiwa ni lega tye i rwom mapat pat. Pi meno, ka watye i atematema matek dok bene Catan tye ka tic ki ryeko, legawa pi gwok pa Jehovah bene myero obed “matek.”
18. (a) Lapeny ango ma myero wapenye kwede madok i kom lega, dok pingo? (b) Jami mene ma twero gudo cwinywa, dok i yo ango? (Nen bok ma tye i pot karatac 22.)
18 Lega macalo man mono gudowa nining? Paulo owaco ni: “Ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga makato ngec pa jo ducu gwoko cwinywu ki tamwu maber i Kricito Yecu.” (Pil. 4:6, 7) Ada, omyero waleg kare ki kare dok ki cwinywa ducu wek wati pi Jehovah ki cwinywa ducu. (Luka 6:12) Pi meno, penye keken ni, ‘An mono alego matek kare ki kare?’ (Mat. 7:7; Rom. 12:12) Lagammi pi lapeny man nyuto miti matek ma itye kwede me tic pi Jehovah.
19. Gin ango ma ibitimone me tic pi Jehovah ki cwinyi ducu?
19 Kit ma dong watyeko nenone kwede, jami ma waketo gibedo mukwongo ginyuto ka ma cwinywa tye iye. Wan giwa pe wamito ni jami ma wawekogi angec nyo diro pa Catan obed ka loko tamwa ma wamoko me tic pi Jehovah ki cwinywa ducu. (Kwan Luka 21:19, 34-36.) Dong calo Daudi, wamedde ki bako dogwa bot Jehovah ni: “Miya abed ki cwiny acel me lworo in.”—Jab. 86:11.
[Bok i pot karatac 22]
JAMI ADEK MA MITTE PI ADUNUWA
Kit macalo watwero timo jami mogo me konyo adunuwa-ni, pi meno watwero bene kwanyo yo mogo me konyo gwoko cwinywa ma kiloko i kome i Baibul-li. Kong wanenu jami adek magi ma pigi tekki:
1 Moc cam: Adunuwa myero obed kanongo moc cam mabeco dok muromo. I yo acel-lu bene, omyero wanen-ni wanongo jami ma dongo watwa ki Lubanga ka wabedo ka kwan piwa kekenwa kare ki kare, lwodo lok ki dong wot i cokke pa Lukricitayo.—Jab. 1:1, 2; Car. 15:28; Ibru 10:24, 25.
2 Ryeyo ler: Wek yotkom obed tye mitte ni kine mukene cwinywa myero obed ka gone oyotoyot adada. Kit meno bene ka wabedo ki arima i tito kwena—nyo wamedo cawa ma wacwalo i ticwa me pwony—man miyo cwinywa bedo maber.—Luka 13:24; Pil. 3:12.
3 Kabedo murumowa: Bedo i lobo man ma jone pe gilworo Lubanga-ni twero kelo peko i cwinywa ki adunu bene. Ento watwero lweny ki peko ma kit meno ka ce kare ki kare waribbe ki luye luwotwa ma giparo piwa dok bene gitye ka tic pi Lubanga ki cwinygi ducu.—Jab. 119:63; Car. 13:20.