Tika Twere me Bedo Ngat ma Gene I Lobo me Camucana-ni?

KADI bed cwiny me bal ma kinywalowa kwede, lyeto ma a ki i lobo man marac-ci ki dong bwola pa Catan Larac-ci keto lyeto i komwa, wan pud waromo cung matek! Nining? Ka wanyikke cok bot Lubanga kun waketo i tic cik me Baibul ma okonyo dano pi mwaki mapol. Nen kong labol aryo.

CIK ME BAIBUL: “Pe wulub tam me lobo man.”​—JO Roma 12:2.

Gin mutimme: Guilherme tye latim biacara muywek adada i lobo Brazil. En oye ni pe yot me bedo ngat ma gene ka itimo biacara. En owacci, “Yot adada pi latim biacara me doko ngat ma pe gene, romo bedo pi lyeto me timo gin ma kampuni moni mito nyo yenyo kwo i lobo man ma dano laro jami alara-ni.” En omedde ni, “Jo mapol gitero gamo kacel ki miyo cente me yabo yo calo gin ma pe rac. Ka ce in latim biacara ma imito cente madit me dongo biacara-ni, tek tutwal me bedo ngat ma gene.”

Kadi bed kumeno, Guilherme ocung matek kun bedo ngat ma gene. En owacci: “Kadi bed wa i kabedo mogo ma dano gituro cik me biacara, bedo ngat ma lagen pud twere. Omyero ibed ngat ma lubo cik. Baibul okonya me nongo adwogi maber ma bino pi bedo ngat ma gene. Ngat ma gene cwinye pe ngole kop, bedo ma cwinye opye mot, dok dano woro. En romo bedo lanen maber bot jo ma en kwo kacel kwedgi.”

CIK ME BAIBUL: “Jo ma mito bedo lulonyo miyo Catan bitogi ci gipoto i bal, ka dong gimoko i owic pa Catan pi mitigi mapol me mingo ma tye ka unogi, miyo girwenyo dok gito woko matwal. Pien maro lim en aye acakki me gin maraco ducu.”​—1 Temceo 6:9, 10.

Gin mutimme: André tye rwod kampuni mo ma ticce obedo me keto jami mogo calo kameragi-gu me neno lutim bal. Kastomane acel tye rwod kilab me odilo. I nino mo acel, i nge tuko mo madit adada, André ocito i opic pa kilab me odilo man kun tero ricit ma nyuto ni myero kiculle pi ticce. Ento jo ma gitiyo i dipatmen me lim onongo pud gitye ka kwano cente ma kijogo inino meno. Pien onongo dong dyewor, ngat ma loyo wi lutic i kilab odilo-ni oculo André kacel ki jo mukene-ni oyotoyot adada.

André owacci: “I kare ma atye ka dok paco, anongo ni lalo wi luticci ocula cente madit makato kit ma myero kicula kwede.” En omedde ni: “Aniang ni en onongo pe bingeyo anga ma ogamo cente madit. Kica omaka i kome pien en nongo myero okwany cente ki i jebane! Pi meno, adok cen bot ladit-ti. Aride odine ki i kin lucwak odilo me cito bot ladit ma loyo luticci wek adwok wi cente mukato-ni. Ladit-ti obedo ki ur adada. Pien ma naka yam peya ngat mo odwoko cente bote.”

André omedde ni, “Bedo ngat ma gene oweko ladit-ti ocako nyutta woro.” En dok omedo ni, “Mwaki mapol dong okato, ento an keken aye ki i kin kampuni mukene-ni pud kontraka tye ka medde ki kilab odilo man. Cwinya yom ni aketo cik me Baibul i tic oweko nyinga pe oballe.”

Pud dong yomo cwinywa ni kikony pa Lubanga, waromo cung matek kadi bed ni tim maraco orumowa dyere. Ento kitungcel bene tute pa ngat acel keken pe romo jwayo camucana matwal. Dano ma gitye ki roc-ci pe gitwero jwayo gin ma okelo camucana pigi kengi. Man mono dong te lokke ni camucana dong pe bigik? Pwony me agikki i pwony man ma gilubbe aluba-ni biminiwa lagam ma Baibul miyo ma cuko cwinywa.