Nong Pwony Ki I Lok Pa Lubanga
Lubanga Tika Biketo Gamente Acel Keken ma Loyo Lobo ducu?
Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.
1. Pingo dano gimito gamente acel keken ma loyo lobo ducu?
Pekki ma nuro dano i kare-ni tye i twok lobo ducu. I lobe mogo, pol pa dano gitye lucan dok kidiyogi ma pe larre. I lobo mukene, dano mapol gulony dok jamigi pol ata ma pe gitiyo kwede. Gamente acel keken ma loyo lobo ducu aye romo poko jami me lobo-ni ma rom aroma i cing dano.—Kwan Latitlok 4:1; 8:9.
2. Nga ma kiromo keto gen i kome wek obed laloc me gamente acel keken ma loyo lobo ducu?
Dano mapol pe giye lok man ni ngat acel keken aye olo lobo-ni pien pe tye laco nyo dako mo ma twero loc i yo maber. Pe tye ngat mo ma dano ducu gitwero cwakone. Ki bene, anga ma kite pe twero doko rac ka tye ki twero? Tam man ni laloc aconya acel keken aye olo dano ducu-ni kelo lworo.—Kwan Carolok 29:2; Jeremia 10:23.
Lubanga Jehovah, oyero Wode Yecu me loyo dano ducu matwal. (Luka 1:32, 33) Yecu tye ki ngec muromo, pien en okwo i lobo kany. I kare ma tye i lobo, en ocango lutwo, opwonyo jo mamwol, dok obedo kacel ki lutino. (Marako 1:40-42; 6:34; 10:13-16) Pi man, Yecu keken aye Laloc mupore.—Kwan Jon 1:14.
3. Tika ada twere me bedo ki gamente acel keken ma loyo lobo ducu?
Lubanga ocimo Wode me loyo lobo ki i polo. (Daniel 7:13, 14) Kit macalo pe mitte ni laloc moni myero obed i taun ducu ma tye i lobo ma en loyo-ni, pe bene mitte ni Yecu myero obed i lobo kany ka wek en olo dano.—Kwan Matayo 8:5-9, 13.
Dano ducu mono gibijolo Yecu ni obed Lalocgi? Pe. Jo ma gimaro jami mabeco keken aye gibijole. Jehovah bineko matwal jo ducu ma gikwero Laloc man ma en ocimo-ni, ma lamar dok kite atir-ri.—Kwan Matayo 25:31-33, 46, NW.
4. Gin ango ma Laloc man ma biloyo lobo ducu-ni bitimone?
Kit macalo lakwat guro kacel romine-ni, Yecu bene tye ka guro kacel jo mamwol ki i rok ducu kun pwonyogi me marre kekengi. (Jon 10:16; 13:34) Jo magi gicwako Yecu kacel ki locce ki cwinygi ducu. (Jabuli 72:8; Matayo 4:19, 20) I lobo lung, jo magi ma gin lugen bot Yecu-ni guribbe kacel kun gitito ni Yecu dong odoko Kabaka.—Kwan Matayo 24:14.
Cokcok-ki, Yecu bitic ki twerone me laro dano ki i cing gamente maraco pa dano. En oyero lulub kore mogo ma gin lugen me loc kacel kwede macalo luker i polo kun giloyo lobo. (Daniel 2:44; 7:27) Ker pa Yecu bipongo lobo ducu ki ngec pa Jehovah dok bidwoko paradic ma lunyodowa mukwongo gurwenyo i acakki-ni.—Kwan Icaya 11:3, 9; Matayo 19:28.