Moses Laco Ma Obedo Ki Niye

NIYE OBEDO GIN ANGO?

Kit ma kitiyo kwede i Baibul, “niye” kwako ye gin moni labongo akalakala mo ento nongo jenge i kom lanyut ma tye ada. Ngat ma tye ki niye i kom Lubanga bedo ki gen ni En bicobo Cikkene ducu.

MOSES ONYUTO NIYE NINING?

Moses omoko tam ma nyuto ni en onongo tye ki gen i kom cikke pa Lubanga. (Acakki 22:15-18). En onongo tye ki kare me bedo ki kwo mayot ki dok jami me wel i Ejipt, ento en ojalo jami magi ducu, “kun oyero me neno can kacel ki jo pa Lubanga ma ka bedo ki yomcwiny me bal ma ri pi kare manok mo keken-ni.” (Jo Ibru 11:25) Tika en omoko tam meno atura labongo kong tamo matut ka lacen dok okoko ange? Pe, pien Baibul wacci Moses ‘omedde ki ciro matek, macalo en neno Lubanga ma pe nen.’ (Jo Ibru 11:27) Moses pe okoko ange pi tam ma emoko ma jenge i kom niyene.

Moses otemme me jingo niye pa jo mukene i kom Lubanga. Me lapore, nen kong gin ma otimme i kare ma Luicrael onongo nen calo kirido wigi i kin dul mony pa Parao ki Nam Makwar. Luicrael gukok bot Jehovah ki Moses pien komgi obedo ka myel ki lworo ni kibityekogi woko. Moses odok iye nining?

Nen calo Moses onongo pe ngeyo ni Lubanga cok baro Nam Makwar wek yo oyabe pi Luicrael. Kadi bed kumeno, Moses onongo tye ki gen ni Lubanga bitimo gin mo me gwoko Jone. Dok Moses onongo mito ni Luicrael luwote gubed ki gen acel-li. Wakwano ni: “Moses owaco bot lwak ni, ‘Pe wulwor, wucung matek, ci wubineno kit ma Rwot [Jehovah] bilarowu kwede tin.’” (Nia 14:13) Tika Moses ojingo niye pa Luicrael luwote? Ada, pien Baibul loko i kom Moses kacel ki Luicrael ducu ni: “Pi niye jo Icrael gungolo Nam Makwar macalo giwoto ki i wi ngom mutwo.” (Jo Ibru 11:29) Niye pa Moses pe okelo adwogi maber bote keken ento bene bot jo ducu ma gunongo pwony ki i niyene.

PWONY ANGO MA WANONGO?

Watwero lubo lanen pa Moses ka wamoko tam ma nyuto ni watye ki gen i kom cikke pa Lubanga. Me lapore, Lubanga ocikke me miniwa jami ma mitte me kom ka waketo woro En bedo gin mukwongo i kwowa. (Matayo 6:33) Lok ada tye ni, twero bedo tek pe me keto jami me kom ni obed mukwongo pien man aye gin ma jo mapol gimito. Watwero bedo labongo akalakala ni ka wagwoko rwom me kwowa lapiny kun waketo cwinywa i woro Jehovah, ci en biminiwa jami ducu ma wamito. Jehovah ocikke ni: “Pe abiboli, pe abibwoti ata.”​—Jo Ibru 13:5.

Wan bene myero watute matek me konyo jo mukene me dongo niyegi. Me lapore, lunyodo ma giryek gingeyo kare maber ma gitye kwede me konyo lutinogi dongo niyegi i kom Lubanga. Ka giwoto ki dongo, lunyodo myero gupwonygi me ngeyo ni Lubanga tye dok en ominiwa cik i kom gin matir ki marac. Medo i kom meno, lunyodo myero gunen ni lutinogi guniang dok guye ni keto cik pa Lubanga i tic kelo kwo ma pud dong ber loyo. (Icaya 48:17, 18) Lunyodo gimiyo bot lutinogi mic maber adada ka gikonyogi me bedo ki niye ni Lubanga “tye ada, dok bene ni en miyo bakacic bot jo ma yenye.”​—Jo Ibru 11:6