Yecu Lagony me Nongo Kwo ma Tye ki Tyen Lok

TIKA ada Yecu obedo ki kwo ma tye ki tyen lok? En odongo i paco ma pe olony, ki dok pe obedo ki jami mapol i kwone. Ada, en onongo “pe tye ki ka ma myero epyel iye wiye.” (Luka 9:57, 58) Medo i kom meno, kidage, kibalo nyinge, ka dong lacen lumonene gunekke woko.

Itwero wacone ni, ‘Pe atamo ni kwo ma kit meno obedo kwo ma tye ki tyen lok!’ Ento tye jami mukene ma Yecu otimogi ma myero wanen. Kong wangiyu jami angwen ma en otimo i kwone.

1. YECU ONONGO TYE KI TYEN LOK ME KWO​—TIMO MITI PA LUBANGA.

“Camma en tiyo gin ma ngat ma oora mito.”​—Jon 4:34.

I lokke kacel ki ticce ducu, Yecu otute me timo miti pa Wonne ma i polo, Jehovah.a Yecu onongo yomcwiny madit atika i timo miti pa Lubanga. En oporo timo miti pa Lubanga ki cam, kit ma kinyuto kwede i wang Baibul ma tye malo-ni. Nen kong gin ma onongo tye ka timme i kare ma omiyo lapor man.

Yecu omiyo lapor man i kine ka cawa abicel me dyeceng. (Jon 4:6) En onongo owoto odiko lung i gang me Camaria ma obedo cere cere-ni, pi meno kec onongo tye ka neke. Ki lok ada, lupwonnyene gubako doggi bote ni: “Lapwony, cam ba.” (Jon 4:31) Ma lubbe ki lagamme, Yecu onyuto ni tiyo tic pa Lubanga kelle yengo. Tika man pe nyuto ni kwone onongo tye ki tyen lok?

2. YECU ONONGO TYE KI MAR MATUT PI WONNE.

“An amaro Won.”​—Jon 14:31.

Yecu onongo tye ki wat macok adada ki Wonne ma i polo. Pien Yecu onongo tye ki mar matut adada pi Lubanga, man omiyo en otito ki dano lok madok i kom Wonne​—Nyinge, yubbe, ki dok kite. Yecu onyuto kit pa Wonne kikome i lokke, ticce, ki dong tamme​—ma ka wakwano lok i kom Yecu, bedo calo iwacci watye ka kwano lok i kom Wonne. Pi meno, i kare ma Pilipo openyo Yecu ni: “Nyuttiwa Won,” Yecu odokke iye ni: “Ngat ma oneno an dong oneno Won.”​—Jon 14:8, 9.

Yecu onongo maro Wonne adada mumiyo en onongo tye atera me bedo lawiny nio wa i to. (Jo Pilipi 2:7, 8; 1 Jon 5:3) Mar man matut ma Yecu onongo tye kwede pi Lubanga-ni omiyo en obedo ki kwo ma tye ki tyen lok.

3. YECU ONONGO MARO DANO.

“Pe tye ngat mo ma tye ki mar madit makato man, ni dano miyo kwone pi lureme.”​—Jon 15:13.

Macalo dano ma gitye ki roc, genwa pi kwo me anyim tye ka mading. Baibul tito ni: “Bal yam obino i lobo kun wok ki i dano acel [Adam], ka dong to obino pi bal, kit meno bene to onya oromo kin dano ducu, pien dano ducu gubalo.” (Jo Roma 5:12) Pe watwero bwot piwa kekenwa ki i adwogi me bal, ma obedo to.​—Jo Roma 6:23.

Tye me yomcwiny ni Jehovah okatti ki yub me cobo peko pa dano. En oye ni Wode,Yecu, ma pe ki roc kacel ki bal-li, oden can ci oto wek omi ginkok ma mitte me gonyo dano ki i opii me bal ki to. Pi mar ma Yecu onongo tye kwede pi Wonne kacel ki dano, en onongo tye atera me miyo kwone ma pe ki roc-ci piwa. (Jo Roma 5:6-8) Mar ma kit meno omiyo bot Yecu kwo ma tye ki tyen lok.b

4. YECU ONONGO NGEYO NI WONNE MARE KI DOK CWINYE YOM I KOME.

“Man aye Woda ma amare, ma cwinya yom i kome.”​—Matayo 3:17.

Jehovah owaco lok man ki i polo i kare ma onongo kitye ka batija Yecu. Ada, Jehovah onyuto ka maleng ni emaro ki dok cwinye yom i kom Wode, Yecu. Pi meno, Yecu onongo twero wacone ki tekcwiny ni: “Won mara”! (Jon 10:17) Pien Yecu onongo ngeyo ni Wonne mare ki dok cwinye yom i kome, man omiye tekcwiny me ciro aunauna ki cac. Mar kacel ki yomcwiny man bene okonye me kemme ki to. (Jon 10:18) Labongo akalakala, pien Yecu onongo ngeyo ni Wonne mare ki dok cwinye yom i kome, man omiye tyen lok madit i kwone.

Labongo akalakala, Yecu obedo ki kwo ma tye ki tyen lok. Ada, watwero nongo pwony mapol ki bote madok i kom kit ma watwero kwo kwo ma tye ki tyen lok me ada. Pwony ma lubo man binyamo tira ma Yecu omiyo bot lulub kore i kom kit ma myero gukwo kwede.