LAPENY MA KIGAMO ME BAIBUL
Pingo tute me kelo kuc i wi lobo ducu pe onyako nyige?
Gamente ma twero loko cwiny dano aye bikelo kuc i wi lobo ducu
Baibul nyuto tyen lok aryo ma pigi tego. Mukwongo, kadi bed ni dano guyubo jami mabeco mapol, ento pe kicweyo dano me lone kengi. Me aryo, tute pa dano pe twero nyako nyige pien ‘lobo ducu tye i te loc pa Catan Larac-ci.’ Man omiyo tute pa dano pi kelo kuc i wi lobo-ni pe binyako nyige wacel.—Kwan Jeremia 10:23; 1 Jon 5:19.
Miti pa dano acel acel kacel ki woro marac ma gitye kwede oweko kuc me ada pe i lobo-ni. Gamente ma pwonyo jone me maro gin matir ki dok me gwoko ber bedo pa dano acel acel keken aye bikelo kuc i wi lobo-ni.—Kwan Icaya 32:17; 48:18, 22.
Anga ma bikelo kuc i wi lobo-ni?
Lubanga Won Twer Ducu ocikke me keto gamente acel keken ma biloyo dano ducu. Gamente meno aye bileyo ka wang gamente pa dano. (Daniel 2:44) Yecu ma en aye Wod pa Lubanga-ni bibedo Laloc ma kelo kuc. Yecu bijwayo tim maraco ducu ki i lobo-ni dok en bipwonyo dano me bedo ki kuc.—Kwan Icaya 9:6, 7; 11:4, 9.
Kombeddi dong Yecu tye ka telo dano milion mapol ma gitye ka tic ki Baibul ma en aye Lok pa Lubanga me pwonyo dano wek gubed ki kuc ki jo mukene. Cokcok-ki dano ducu gibibedo ki kuc.—Kwan Icaya 2:3, 4; 54:13.