LAPENY MA KIGAMO ME BAIBUL

Jo munyomme gitwero bedo ki yomcwiny nining?

Tira ma Baibul miyo i kom bedo ki yomcwiny i nyom tiyo pien Lubanga Jehovah, Ngat ma Ocako te yub me nyom-mi, aye omiyo. Baibul pwonyowa me dongo kit mabeco ma twero weko yomcwiny bedo tye i nyom ki dok poyo wiwa i kom kit maraco ma balo nyom. Baibul bene pwonyowa kit me lok ki diro wek yomcwiny obed i ot.​—Kwan Jo Kolocai 3:8-10, 12-14.

Laco ki dako myero guket deyo dok guwore i kingi. Ka gin aryo ducu giye tic ma Lubanga ominigi macalo luot, ci gitwero bedo ki yomcwiny.​—Kwan Jo Kolocai 3:18, 19.

Gin ango ma weko nyom ri?

Jo munyomme gitwero rii kacel ka mar tye i kingi. Lubanga pwonyowa kit me nyuto mar. En kacel ki Wode, Yecu, ginyuto lanen maber loyo me mar ma kwako jalle ken.​—Kwan 1 Jon 4:7, 8, 19.

Ka ce laco ki dako giworo nyom macalo yub mua ki bot Lubanga, ci gibibedo kacel. Lubanga ocako te yub me nyom me bedo gin ma ribo laco ki dako pi naka wek kuc obed tye i kingi. Nyom twero rii pien Lubanga ocweyo laco ki dako wek ngat acel acel okony lawote. En bene ocweyogi i calle, wek gubed ki kero me nyuto mar calo en.​—Kwan Acakki 1:27; 2:18, 24.