Tim Jami I Yo Ma Rwatte Ki Lega Pa Yecu

1, 2. Tit kong gin ma Yecu otimo pi lukwenane ma gin lugen i nge tyeko kwero nino me Kato i mwaka 33 K.M.

OTYENO me Nican 14 mwaka 33 K.M., Yecu kacel ki lureme onongo pud gutyeko kwero nino me Kato (Paska) atyeka. Kwer man onongo poyo wigi i kom kit ma Lubanga olaro kwede kwarigi ki i opii i lobo Ejipt. Ento lupwonnyene ma gin lugen-ni onongo ‘kibikokogi matwal’ i yo mukene. Orwone, lumone pa Yecu onongo gubineke woko. Ento tim man me adage-ni onongo bikelo adwogi maber. Remo pa Yecu obedo gin ma pire tek ma onongo bilaro dano ki i bal ki to.​—Ibru 9:12-14.

² Wek wiwa pe owil woko i kom mic man ma nyuto mar-ri, Yecu ocako kwer manyen ma ki kwero mwaka ki mwaka ma oleyo kaka Kwer me Kato. En otimo man i kare ma obaro i mugati ma tobi pe iye ci omiyo bot lukwenane 11 ma gin lugen-ni. En owaco botgi ni: “Man aye koma ma gimiyo piwu, wutim kuman me po pira.” En bene omiyo botgi kongo vino, ci owaccigi ni: “Kikopo man aye gicikke manyen i remona ma oo piwu.”​—Luka 22:19, 20.

3. (a) Alokaloka madit ango mutimme i nge to pa Yecu? (b) Lapeny mene ma myero watam i komgi ma lubbe ki lega pa Yecu ma nonge i Jon cura 17?

³ Gicikke me Cik ma onongo tye i kin Lubanga ki rok me Icrael-li onongo dong cok gik woko. Gicikke manyen ma Jehovah onongo bimoko ki Lukricitayo ma kiwirogi aye onongo bileyo kakare. Yecu onongo pe mito ni lulub kore gubed calo rok me Icrael. Luicrael guweko lok me dini opoko kingi woko, ma man okelo twon alano i kom nying maleng pa Lubanga. (Jon 7:45-49; Tic 23:6-9) Ki tungcel, Yecu onongo mito ni lulub kore gubed ma nongo gunote matek liking wek guti kacel kun giketo deyo i kom nying Lubanga. Ci dong, gin ango ma Yecu otimo? En olego lega mo ma gudo cwiny adada ka ngat mo keken okwano. (Jon 17:1-26; nen cal ma tye i pot karatac 24.) Ka wanyamo lega man, watamu i kom lapeny magi, “Lubanga tika ogamo lega pa Yecu-ni?” Omyero bene wapenye kekenwa ni, “Tika atye ka timo jami ma rwatte ki lega meno?”

JAMI MA ONONGO PIGI TEK BOT YECU

4, 5. (a) Pwony ango ma wanongo ma lubbe ki kit ma Yecu ocako kwede ki legane? (b) Jehovah ogamo lega pa Yecu nining i kare ma olego ni kimiye deyo?

⁴ Yecu oloko wa i cwiny dyewor kun pwonyo lupwonnyene ki lok ma pigi tego mua ki bot Lubanga. Lacen, otingo wange malo ci olego ni: “Abana, kare dong oromo; ket deyo i kom Wodi, wek Wodi bene oket deyo i komi, macalo yam imiye twero i kom gin ducu ma tye ki kom, wek omi kwo ma pe tum bot jo ducu ma ceng imiyo bote. . . . Dong aketo deyo i komi i lobo, kun acobo tic ma ceng imiya me atiya. Dong koni, Abana, ket deyo i koma i nyimi, ki deyo ma yam abedo kwede i nyimi ma peya iketo lobo.”​—Jon 17:1-5.

⁵ Nen kong jami ma onongo pigi tek i acakki me lega pa Yecu. Gin ma pire tek bote aye obedo keto deyo i kom Wonne me polo, dok man onongo rwatte ki kit ma Yecu ocako ki legane ni: “Wonwa, giwor nyingi maleng.” (Luka 11:2) Me aryo, Yecu olego pi jami ma lupwonnyene gimito, ni myero ‘eminigi kwo ma pe tum.’ I nge meno, Yecu olego pi mitine kun wacci: “Abana, ket deyo i koma i nyimi, ki deyo ma yam abedo kwede i nyimi ma peya iketo lobo.” Jehovah omiyo bot Wode ma lagen-ni jami mapol makato ma en openyogi kun miye ‘nying maber matek makato’ pa lumalaika ducu.​—Ibru 1:4.

‘NGEYO LUBANGA ACEL ME ADA’

6. Gin ango ma lukwena onongo myero gutim wek gunong kwo ma pe tum, dok wangeyo nining ni gin gutimo meno?

⁶ Yecu bene olego pi gin ma myero watim wan macalo lubalo wek wanong kwo ma pe tum. (Kwan Jon 17:3.) En owacci omyero wamedde ki ‘ngeyo’ Lubanga kacel ki Kricito. Yo acel ma watimo ki man aye ka watiyo ki wangwa kacel ki itwa me nongo ngec madok i kom Jehovah gin ki Wode. Yo mukene ma pire tek me nongo ngec i kom Lubanga aye ka wabedo ki yomcwiny pien waketo jami ma wapwonyogi i tic. Lukwena onongo dong gutimo jami magi, pien Yecu owaco i legane ni: “Amiyogi lok ma ceng imiya, gin dong gujolo.” (Jon 17:8) Ento me nongo kwo ma pe tum, gin onongo myero gubed ka lwodo lok pa Lubanga kun giketo i tic nino ducu. Lukwena ma gin lugen-ni tika gutimo jami magi ducu nio wa i agikki me kwogi i lobo? Gin gutimo meno. Wangeyo man pien kicoyo nyinggi ki acel acel i kom guti apar wiye aryo me Jerucalem Manyen.​—Yabo 21:14.

7. Te lokke ngo me ‘ngeyo’ Lubanga, dok pingo meno pire tek adada?

⁷ Jo mogo ma gukwano leb Grik i yo matut giwaco ni nyig lok me leb Grik ma gonye ni “ginge[-ni]” bene twero gonye ni “omyero imedde ki nongo ngec.” Pi meno, ‘ngeyo’ Lubanga te lokke ni omyero wamedde ki nongo ngec mapol madok i kome. Ngeyo Ngat Madit loyo i polo ki lobo pe kwako ngeyo kit mapol pa Lubanga kacel ki yubbe keken. Ngeyo Jehovah kwako bedo ki mar matut i kome kacel ki luye luwotwa. Baibul waco ni: “Ngat ma pe ki mar, nongo en pe ngeyo Lubanga.” (1 Jon 4:8) Pi man, ngeyo Lubanga kwako winyo doge. (Kwan 1 Jon 2:3-5.) Pud dong watye ki mot madit atika me bedo i kin jo ma gingeyo Jehovah! Ento watwero rwenyo wat man ma pire tek-ki woko kit ma Juda Iskariote otimo kwede-ni. Watute wunu matek me gwoko wat man. Ka watimo kumeno, ci wabinongo mot me kwo ma pe tum.​—Mat. 24:13.

“GWOKGI PI NYINGI”

8, 9. Gin ango ma pire obedo tek loyo ki tung bot Yecu i ticce me pwony, dok pwony mene me tekwaro ma en okwero woko?

⁸ I nge kwano lega pa Yecu i Jon cura 17, anga ma twero bedo ki akalakala ma lubbe ki mar matut ma Yecu onyuto i kom lukwenane me kare ca ki dok bene tye kwede i kom lupwonnyene me kareni? (Jon 17:20) Ki bene, omyero wange ni larrewa pe obedo gin ma pire tek tutwal bot Yecu. Gin ma pire tek loyo ki tung bote i ticce me pwony lung aye obedo lonyo nying Wonne ki bene keto deyo i kome. Me labolle, i kare ma tye i Kacokke pa Lujudaya i Najaret, Yecu otito gin mumiyo ebino i lobo kun kwano ki i buk pa Icaya ni: “Cwiny pa Rwot [Jehovah] tye i koma, pien dong owira woko ki moo wek atit lok me kwena maber bot lucan.” Labongo akalakala, Yecu nen calo olwongo nying Lubanga maber adada i kare ma en tye ka kwano lok man.​—Luka 4:16-21.

⁹ Ma lubbe ki tekwaro pa Lujudaya, lutela dini onongo pe giye ni dano guti ki nying Lubanga, dok man obedo ka timme con ma peya Yecu obino i lobo. Watwero bedo ki gen ni Yecu okwero lajwac tim man me tekwaro ma pe rwatte ki ginacoya-ni. En owaco bot lumonene ni: “An abino i nying Wora, ento wun pe wujola; ka ngat mo obino i nyinge kene, wun wubijole.” (Jon 5:43) Lacen, i nge nino manok keken ma peya en oto, Yecu otito gin ma pire tek i kwone kun lego ni: “Abana, ket deyo i kom nyingi.” (Jon 12:28) Dok bene i lega man ma watye ka nyamone-ni, waneno atir ni keto deyo i kom nying Wonne obedo gin ma pire tek loyo i kwo pa Yecu.

10, 11. (a) Yecu oweko nying Wonne ongene nining? (b) Pingo lupwonnye pa Yecu gitye ka yaro nying Jehovah?

¹⁰ Yecu olego ni, “Atyeko dong nyuto nyingi bang jo a rik ikwanyo i lobo, imia. Gin rik joni, yini ite miyogi banga, gin dang ogwoko kop meri. . . . An mom dok abedo i lobo, ento gin adong i lobo, an adwogo bangi. Papo Acil, gwokgi pi nyingi a rik imia, migi obed acel, acalo wan otye acel.”​—Lak. 17:6, 11, Baibul me leb Lango.

¹¹ Nyuto nying Wonne bot lupwonnyene onongo pe kwako lwongone alwonga keken. Yecu bene okonyogi me niang te lok me nying Lubanga, kit mamwonya pa Lubanga ki dong yo ma en terowa kwede. (Nia 34:5-7) Ki dok bene, kit macalo Yecu kombeddi dong tye ka loc i polo macalo Kabaka-ni, en pud tye ka medde ki konyo lupwonnyene me yaro nying Jehovah i twok lobo ducu. Pi tyen lok ango? Wek ki lok dano mapol gudok lupwonnyene ma peya kikelo agikki me lobo man marac-ci. I ngeye, Jehovah biweko nyinge madit-ti ngene ka nongo en laro lucadenne ma gin lugen!​—Ejek. 36:23.

“WEK LOBO OYE”

12. Jami adek mene ma pigi tego wek wacob tic me laro kwo pa dano?

¹² I kare ma Yecu tye i lobo, en otiyo matek me konyo lupwonnyene wek gulweny ki gorogi. Man onongo pire tek wek gucob tic ma pire tek ma en ocako-ni. Yecu olego ni, “Macalo ceng iora i lobo, an bene aorogi i lobo.” Wek gin gucob tic man me laro kwo pa dano-ni, Yecu olego pi jami adek ma pigi tego. Me acel, en olego ni lupwonnyene pe gubed jo me lobo pa Catan-ni. Me aryo, en olego ni gulub Lok pa Lubanga wek kilonygi gubed maleng. Me adek, Yecu obako doge ni lupwonnyene myero gubed acel pi mar ma i kingi kit macalo tye i kin en ki Wonne-ni. Man te lokke ni omyero wangine kekenwa. Ngat acel acel myero openye kekene ni, ‘Tika kit me kwona rwatte ki jami adek ma Yecu olego pigi-ni?’ Yecu onyuto gen ni ka waketo cwinywa i jami magi, ci ‘lobo biye ni Lubanga aye oore.’​—Kwan Jon 17:15-21.

13. Kigamo lega pa Yecu nining i cencwari me acel?

¹³ Ka wamito niang ka ce ada kigamo lega pa Yecu-ni, ci omyero wakwan buk me Tic pa Lukwena. Tam kong i kom kit ma onongo twero bedo yot kwede me bedo ki apokapoka i kin Lukricitayo me kare macon ma onongo tye iye Lujudaya ki Lurok, lulonyo ki lucan, opii ki wegi opii. Ento kadi bed kumeno, gin guribbe kacel liking ma oweko kiporogi ki dul kom mapat pat dok Yecu aye tye lawigi. (Ep. 4:15, 16) Ribbe man pud dong tye me tango adada i lobo pa Catan ma dano gupokke iye-ni! Pwoc ducu cito bot Jehovah ma oweko man otwere pi cwiny mere maleng.​—1 Kor. 3:5-7.

14. Kigamo lega pa Yecu nining i kare-ni?

¹⁴ Tye me cwercwiny ni ribbe man pe orii i nge to pa lukwena. Man oweko jo mungak gucako donyo i kacokke kit ma kitito kwede con, dok adwogine obedo ni dini pa Lukricitayo ata-ni onya i kin piny. (Tic 20:29, 30) Ento i 1919, Yecu ogonyo lulub kore ma kiwirogi ki i bedo opii pa dini goba ci okelogi kacel i mar ma en aye “tweyo jami ducu, ribogi kacel ma cobo bene maber licwic.” (Kol. 3:14) Ticgi me tito kwena okelo adwogi maber ango? “Romi mukene” makato milion abiro kulu ma gia ki i “rok ducu, ki i kaka ducu, ki dano ducu me wi lobo, ki leb ducu” kiribogi bene i dwol acel ki Lukricitayo ma kiwirogi. (Jon 10:16; Yabo 7:9) Man pud dong tye lagam maber adada pi lega pa Yecu ma olego ni “wek lobo onge ni in [Jehovah] iora, dok imarogi macalo imara”!​—Jon 17:23.

YECU OGIKO LEGANE I YO MA GUDO CWINY

15. Yecu olego pi Lukricitayo ma kiwirogi nining?

¹⁵ Con kong, i otyeno me Nican 14, Yecu oketo deyo i kom lukwenane kun moko gicikke kwedgi wek gubed luloc kacel kwede i Kerre. (Luka 22:28-30; Jon 17:22) Ma lubbe ki jo ducu ma onongo gubidoko Lukricitayo ma kiwirogi, Yecu olego ni: “Abana, amito jo-ni, ma gin mot ma imiya, gibed bota ka ma an atye iye, wek ginen deyo mera ma imiya pi mar meri ma imara kwede ma ocakke ma peya icibo guti me lobo.” (Jon 17:24) Bot romi mukene-ni, man keligi yomcwiny ento pe cwiny me nyeko dok bene nyuto note ma Lukricitayo me ada gitye kwede i kareni.

16, 17. (a) Yecu omoko tamme me timo gin ango i agikki me legane? (b) Omyero wamok tamwa me medde ki timo gin ango?

¹⁶ Lutela dini guweko pol pa dano me loboni gicayo lanyut ma moko atir ka maleng ni Jehovah tye ki jone ma gunote kacel dok gingeyo en maber. Man aye bene gin mutimme i kare ma Yecu tye i lobo. Pi meno, en ogiko legane ki lok magi: “Papo a kite atir, lobo pe ru ongeyi, ento an angeyi, jo man dong ongeyo ni yin en iora. Amio nyingi ongeye banggi, dok abino miyo ngeye odoco, me mar a rik imara kede bed i yigi, an dang abed i yigi.”​—Lak. 17:25, 26, Baibul me leb Lango.

¹⁷ Anga ma twero kwerone ni Yecu pe otimo jami ma rwatte ki legane-ni? Macalo lawi kacokke, en tye ka medde ki konyowa wek wami nying Wonne kacel ki yubbe ongene. Pi meno, wamedde wunu ki mine i te telane kun watiyo ki mit kom i tito kwena ki dok loko dano me doko lupwonnyene. (Mat. 28:19, 20; Tic 10:42) Ki bene, watute wunu matek me gwoko ribbe ma pire tek ma watye kwede-ni. Ka watimo jami magi, ci nongo watye ka timo jami ma rwatte ki lega pa Yecu-ni, dok man biketo deyo i kom nying Jehovah ki bene bikeliwa yomcwiny mari nakanaka.