Yecu Kricito​—Wiwa Myero Opo i Kome Nining?

I Decemba, dano mapol i twok lobo lung gibineno cal pa Yecu macalo latin matidi. Kiketo i weer pa dyang, bok madit ma kiketo iye lum me acama pa lee. Ento, omyero mono wiwa opo i kom Yecu macalo latin matidi?—a Kong wanyamu yo mo ma pire tek ma waromo po kwede i kom Yecu. Waromo nongo pwony ki i gin mutimme i kom lukwat mogo i kare ma gubedo ka kwat i olet macok ki Beterekem i dyewor.

Lamalaika acel obino atura bot lukwat. En owaco botgi ni: “Tin . . . ginywalo piwu lalar, en Kricito Rwot.” Lamalaika-ni bene owaccigi ni gibinongo Yecu “giumo ki bongo, ma gipyele, obuto i weer pa dyang.” Cutcut, lumalaika mapol gubino ci gucako ‘pako Lubanga.’

Ibiwinyo nining ka iwinyo lumalaika gitye ka pako Lubanga?— Lukwat magi cwinygi obedo yom adada! Gin guloko i kingi kekengi ni: “Kong wacitu mono wa i Beterekem, wek wacinenu gin man ma otimme.” I kare ma guo kunnu, gin gunongo “Maliam ki Yucepu, ki latin lakere ma gipyelo i weer pa dyang.”

Lacen, jo mukene gubino i Beterekem ka ma Maliam gin ki Yucepu gitye iye. Gin gubedo ki ur i kare ma lukwat gutito botgi gin mutimme. Tika cwinyi yom me ngeyo jami magi mamwonya tutwal-li?— Wan ducu ma wamaro Lubanga cwinywa yom. Kombeddi kong wanenu gin mumiyo nywalo Yecu keliwa yomcwiny madit. Me niang lok meno, mitte ni myero kong wanen gin mutimme i kare ma Maliam pud wiye nono.

I nino mo acel, lamalaika ma nyinge Gabriel obino bot Maliam. En ocikke ni Maliam binywalo latin ma “bibedo dit, gibilwonge ni, Wod pa En Mamalo Twal.” Gabriel owaco ni, ‘En biloc macalo kabaka; dok kerre pe bigik.’

Maliam openyo me niang kit ma bitimme kwede, kit macalo peya kingi orwatte ki laco mo keken-ni. Pi meno, Gabriel otito bote ni: “Tek pa En Mamalo Twal biumi . . . latin ma gibinywalo-ni gibilwonge Maleng, Wod pa Lubanga.” Obedo twon tango madit adada me nako kwo pa Wod pa Lubanga ki i polo me ketone i ot nyodo pa Maliam wek odong odok latin!

Tika dong ineno cal ma nyuto “luryeko” adek kacel ki lukwat ma gubino ka neno latin Yecu?— I kare me Karama, cal ma kit man nongo pol ata i kin piny. Ento, cal magi pe gitito lok ada. Ki lok ada, “luryeko” magi gubedo jo ma gityeto ki lakalatwe, gin ma Lubanga okwero lajwac. Kong wanenu gin mutimme i kare ma gubino ka neno Yecu. Baibul waco ni: “Ka gudonyo i ot, ci guneno latin kacel ki minne Maliam.” I kare meno, Yecu onongo dong pe tye lakere ma kipyelo i weer pa dyang, ento latin ma dong dit dit ma bedo kacel ki Maliam gin ki Yucepu i paco acel!

Lutyet ki lakalatwe-ni gunongo Yecu nining?— “Lakalatwe” mo acel aye kong otelogi bot Kabaka Kerode wa i Jerucalem, ento pe i Beterekem. Baibul wacci Kerode onongo mito ngeyo ka ma Yecu tye iye wek enek woko. Tam kong i kom lapeny man. Anga ma itamo ni oweko gin mo ma nen calo lakalatwe aye otelo jo ma gityeto ki lakalatwe-ni bot Kerode?— Pe obedo Lubanga Jehovah, ento lamonene Catan Larac-ci!

I kareni, Catan temo bwolo dano wek gutam ni Yecu pud tye latin. Ento, lamalaika Gabriel owaco bot Maliam ni: ‘En biloc macalo kabaka; dok kerre pe bigik.’ Kombeddi, Yecu dong tye ka loc macalo Kabaka i polo, dok cokcok-ki en bityeko lumone pa Lubanga ducu. Meno aye gin ma myero wiwa opo iye i kom Yecu, dok bene myero watit pire bot jo mukene.