Pe Iwek ‘Tammi Ogwange Oyotoyot’!

1, 2. Pingo bwola onya tutwal i kareni, dok romo katti i yo ma nining? (Nen cal ma i pot karatac man.)

BWOLA kacel ki goba pol adada i lobo man ma wakwo iye-ni. Man pe myero omi wabed ki ur. Baibul waco atir ka maleng ni Catan Larac-ci tye labwola mucwiny dok en aye loyo lobo man. (1 Tem. 2:14; 1 Jon 5:19) Ka nongo wanyikke cok ki agikki me loboni, akemo pa Catan bene woto ki medde ameda pien “karene tye manok.” (Yabo 12:12) Pi meno, omyero wange ni jo ma Larac-ci dorogi gibimedde ameda ki loko lok goba, tutwalle i kom jo pa Jehovah.

² Pol kare odi ma gicwalo woko lok angeya gikati ki lok bwolo kacel ki goba mogo ma kuto mac lyel ki i keno i kom lutic pa Jehovah ki pwonygi wek odwo tam pa dano. Gajeti akwana, redio, telebijon, ki dong kabedo mogo i Intanet kitiyo kwedgi me cwalo woko lok goba. Macalo adwogine, jo mukene cwinygi tur, pien bwologi yot me ye goba ma kit meno.

3. Ngo ma romo konyowa me lweny ki goba?

³ Me lweny ki goba man ma turo cwiny dano-ni, cwinywa yom ni watye ki Lok pa Lubanga ma “konyo . . . me tiro kit pa dano.” (2 Tem. 3:16) Pire tek ni omyero wanong pwony ki i waraga ma lakwena Paulo ocoyo ma konyowa me niang ni Lukricitayo mogo i Tecalonika kibwologi me ye lok goba. En ocuko cwinygi ni ‘pe guwek tamgi ogwange oyotoyot.’ (2 Tec. 2:1, 2) Pwony ango ma wanongo ki i lok man me cuko cwiny ma Paulo omiyo-ni, dok waromo ketone i tic nining i kareni?

TER LOK ME POYO WIC CALO GIN MA PIRE TEK

4. Kipoyo wi Lukricitayo me Tecalonika nining ma lubbe ki bino pa “nino pa Rwot [Jehovah],” dok wan bene kipoyo wiwa nining?

⁴ I waragane mukwongo ma ocoyo bot kacokke me Tecalonika, Paulo opoyo wigi i kom “nino pa Rwot [Jehovah],” ma tye ka bino-ni. En onongo pe mito ni utmegine gubed i col piny dok ma pe guyubbe. Ma ka meno, en ocuko cwinygi macalo “jo me ceng” ni myero ‘gubed ka neno piny kun gigwokke.’ (Kwan 1 Jo Tecalonika 5:1-6.) I kareni, watye ka kuro jwero Babilon Madit, ma en aye twon ker malac me dini goba me wi lobo-ni. Man bibedo acakki me nino madit pa Jehovah. Watye ki pwoc madit atika ni niangowa omedde i kom kit ma Jehovah tye ka cobo kwede yubbe. Ki bene, i kacokke wanongo lok me poyo wic kare ki kare ma konyowa me bedo ma wangwa twolo. Keto cwinywa i lok magi me poyo wic-ci weko wamoko tamwa me tic pi Lubanga kun watiyo ki ‘ryeko.’​—Ibru 5:14.

5, 6. (a) Paulo oloko i kom gin ango i waragane me aryo ma ocoyo bot jo Tecalonika? (b) Gin ango ma Lubanga biweko Yecu timo, dok lapeny mene ma myero wapenye kwede?

⁵ I nge kare manok keken ma en ocwalo kwede waragane mukwongo bot Lukricitayo me Tecalonika, Paulo ocwalo waraga me aryone. I waraga meno en opoyo wigi i kom can ma tye ka bino, ka ma Rwot Yecu bingolo iye kop i kom “jo ma pe ngeyo Lubanga, ki i kom jo ma pe gilubo lok me kwena maber.” (2 Tec. 1:6-8) Cura me 2 i waraga man nyuto ni jo mogo i kacokke meno ‘cwinygi obedo ka poto’ ma lubbe ki nino pa Jehovah kun gitamo ni dong cok bino. (Kwan 2 Jo Tecalonika 2:1, 2.) Lukricitayo me kare macon onongo gitye ki ngec manok i kom kit ma yub pa Jehovah tye ka cobbe kwede, kit ma Paulo ocoyo kwede lacen ma lubbe ki lok pa lunebi ni: “Wan wangeyo dul mogo manoknok keken, lutit lok pa Lubanga gitito dul mogo manoknok keken; ento gin makulu ka obino, ci gin ma obedo duldul bigik woko.” (1 Kor. 13:9, 10) Ento, onongo gitwero bedo ki niye matek ka guwinyo lok me poyo wic ma Jehovah omiyo Paulo, lakwena Petero, ki dong omege mukene ma kiwirogi gucoyo botgi.

⁶ Me dwoko wigi i lain, cwiny maleng okonyo Paulo me tito ni jo mungak kacel ki “dano ma turo cik” onongo gibituc ma peya nino pa Jehovah oo.a I ngeye, Rwot Yecu “bineko woko” jo magi ducu ma kibwologi-ni. Paulo otito tyen lok mumiyo kibingolo kop i wi jo magi; kun wacci gin “gukwero maro lok me ada.” (2 Tec. 2:3, 8-10) Omyero wapenye kekenwa ni: ‘An tika amaro lok me ada ki cwinya ducu? An tika akwano magajin man kacel ki bukke mukene ma gijenge i Baibul ma kicoyogi pi jo pa Lubanga, wek niangona orwatte ki niango me kare-ni?’

YER LUREMI KI RYEKO

7, 8. (a) Ariya ango ma Lukricitayo me kare ca onongo myero gulweny kwede? (b) Gin ango ma twero bedo ariya madit bot Lukricitayo i kareni?

⁷ Ki lok ada, mapat ki pwony pa jo mungak onongo tye pekki mogo ma Lukricitayo gibirwatte kwede. Paulo ocoyo bot Temceo ni “maro lim en aye acakki me gin maraco ducu.” Ci dok omedo ni ‘man en gin ma omiyo jo mogo gua woko ki i niye, ka dong gurwatte ki lwak can mapol ata mucorre i komgi.’ (1 Tem. 6:10) “Tic me kit pa dano” bene onongo bimedde ki bedo twon ariya madit.​—Gal. 5:19-21.

⁸ Paulo ociko Lukricitayo me Tecalonika adada ni gugwokke ki jo ma en olwongogi ni “pe gin lukwena kikome.” I kingi onongo tye jo mogo ma gubedo ka loko “lok ma ngako dano ci gibwolo lupwonnye miyo gilubo korgi.” (2 Kor. 11:4, 13; Tic 20:30) Yecu opwoyo kacokke me Epeco pienni gin pe ‘giciro tim pa jo maraco.’ Lukricitayo me Epeco-ni onongo ‘gitemo’ jo mogo ma gilwonge kengi ni gin lukwena kun gubedo lugoba. (Yabo 2:2) I waragane me aryo ma ocoyo bot jo Tecalonika, Paulo ominigi tira ni: “Kombeddi wacikowu i nying Rwotwa Yecu Kricito ni, wupokke woko ki i kom ominwu mo ma lawackom ma bedo ka wirre kun balo kare nono.” I ngeye, en oloko i kom Lukricitayo ma ‘gidag tic.’ (2 Tec. 3:6, 10) Ento ka jo magi onongo kinenogi calo jo ma bedo ka wirre kun gibalo kare nono, ci jo ma onongo gimito ngak woko onongo dong girac loyo. Ada, mako larem ki kodi jo magi i kare ca onongo rac adada dok meno onongo pe myero otimme​—omyero watim kumeno i kareni.​—Car. 13:20.

9. Pingo omyero wagwokke ka ngat mo ocako byeko jami mogo nyo kwoto nying?

⁹ Twon can madit atika-ni dong cok cakke dok bene lobo dong cok gik woko, pi meno lok me poyo wic ma Jehovah omiyo kicoyo i cencwari me acel-li pire tek loyo i kareni. Pe wamito ni wawek kica pa Jehovah “oballe nono” wek pe wakeng mot me kwo ma pe tum, kadi bed i polo nyo lobo. (2 Kor. 6:1) Ka ce ngat mo ma bino i cokke temo bitowa me byeko jami mogo ma Baibul pe tito atir atir nyo me kwoto nying luelda ki lutic mukene pa Lubanga, omyero wagwokke kwede.​—2 Tec. 3:13-15.

“WUMAK KIT MA WAPWONYOWU KWEDE”

10. Kicuko cwiny Lukricitayo me Tecalonika ni pe myero guteny pwony macalo mene?

¹⁰ Paulo ocuko cwiny utmegine me Tecalonika me ‘cung matek’ ki dok ni pe guteny jami ma dong gupwonyo. (Kwan 2 Jo Tecalonika 2:15.) Pwony mene ma Paulo onongo tye ka wacci pe myero guteny-nyi? Ki lok ada, man pe obedo pwony me dini goba, ma kitito pire calo iwacci obedo pwony ma pire tek ma a ki i Ginacoya-ni. Ma ka meno, Paulo onongo tye ka lok i kom pwony ma en kacel ki jo mukene gunongo ki bot Yecu ki dong gin ma Lubanga oweko lukwena gucoyo, ma pole odoko but Ginacoya. Paulo opwoyo utmegine ma gitye i kacokke me Korint kun coyo ni, “i lok ducu wupo pira, kun wumako pwonnya ma yam akelo botwu.” (1 Kor. 11:2) Pwony magi gikonyo dok gigene pien gia ki bot Jehovah gin ki Wode.

11. I yo macalo mene ma bwola romo gudo kwede jo mogo?

¹¹ I kare ma ocoyo waragane bot jo Ibru, Paulo otito jami aryo mapat pat ma romo weko Lakricitayo moni pe cung matek dok niyene bedo goro. (Kwan Jo Ibru 2:1; 3:12.) En oloko i kom “a woko” ki dong “ngak woko.” Yeya ma tye i dog pii twero mol cito i dye nam ma ngat mo pe ngeyo. Motmot ipo ni dong omol ocito ka mabor ki i dog nam. Ki tung cel bene, ngat moni romo coro yeyane dwoko i dye pii nia ki i dog nam. Labol aryo magi ginyuto gin ma twero timme ka ngat mo oye ni kibwole, kun weko genne i kom lok me ada doko goro.

12. Jami macalo mene ma giromo balo watwa ki Jehovah i kareni?

¹² Meno aye nen calo gin mutimme i kom Lukricitayo mogo i Tecalonika. I kareni kono? Jami ma balo cawa gipol ata. Tam kong cawa adi ma balle ka wanywako lok ki lurem i kabedo me Intanet, wakwano ki dok wacoyo kwena ki i cim nyo kompiuta, wayenyo jami ma wamaro timogi ki kwok matino, nyo wamito ni lok kom odilo pe okatwa. Jami magi romo dwoyo tam pa Lakricitayo dok weko mitine pi Jehovah doko goro. Adwogine twero bedo ningo? En pe romo nongo cawa me lega, kwano Lok pa Lubanga, bedo tye i cokke, ki dong wot ka tito kwena maber-ri. Ngo ma myero watim wek tamwa pe ogwange oyotoyot?

JAMI MA GITWERO KONYOWA WEK TAMWA PE OGWANGE

13. Kit ma kitito kwede i Baibul, kodi cwiny ango ma dano gitye kwede, dok ngo ma romo konyowa wek niyewa pe odok goro?

¹³ Gin acel ma wiwa myero pe owil iye matwal aye obedo kare ma watye ka kwo iye-ni, ki dok adwogi marac ma bino ka wacwalo cawa kacel ki jo ma giwacci man pe obedo “kare me agikki.” Ma lubbe ki karewa-ni, lakwena Petero ocoyo ni, “Jo ma lungala gibituc ki ngalagi, kun gilubo mitigi kengi, kun gipenyo peny bene ni, ‘Cikke me dwogone ma gitito pire-ni tye kwene? Pien cakke ma kwarowa guto woko, jami ducu tye i kit ma yam gitye kwede i acakki keto lobo.’” (2 Pet. 3:3, 4) Kwano Baibul nino ducu ki dok kwedo lok ma iye kare ki kare poyo wiwa ni watye ka kwo i “kare me agikki.” Jo mungak ma kiloko i komgi-ni gutuc wacon dok bene pud gitye wa i kare-ni. “Dano ma turo cik” pud tye dok tye ka medde ki lweny i kom lutic pa Lubanga. Pi man, omyero wamedde ki bedo ma wangwa twolo ni nino pa Jehovah dong tye cok.​—Jep. 1:7.

14. Tiyo tic pa Lubanga ki mit kom gwokowa nining?

¹⁴ Gin mukene ma twero konyowa wek wabed ma wangwa twolo dok ma tamwa pe ogwangnge atata aye ka wanywako kare ki kare i tic me tito kwena maber me Ker-ri. Pi meno, i kare ma Kricito Yecu, Lawi kacokke, ociko lulub kore ni gulok jo me rok ducu gudok jo ma lubbe kun gipwonyogi me lubo jami weng ma epwonyogi kwede, en onongo tye ka minigi tam ma romo gwokogi. (Mat. 28:19, 20) Me nyuto ni walubo tam man, omyero wati tic me tito kwena-ni ki mit kom. Utmege ma i Tecalonika gutito kwena dok gupwonyo jo mukene ki mit kom ento pe ni kidiyogi adiya. Wi opo ni Paulo ocoyo botgi ni: “Pe wugeng cwiny maleng me tiyo tic i iwu, pe wuca bene lok ma Lubanga miyo bot dano me atita.” (1 Tec. 5:19, 20) Ki bene, lok mapol pa lunebi ma wakwano ki dok wanywako ki jo mukene-ni gigudo cwinywa adada!

15. Jami mene ma gikonyowa ma watwero nyamogi i cawa me woro pi jo me ot?

¹⁵ Ngene kene ni wamito ni wakony jo me odiwa wek gudong dirogi me tito kwena. Omege ki lumege mapol gitiyo ki but worogi pi jo me ot me pwonyo kit me tito kwena. Twero bedo me kony ka wunyamo kit me dok cen ka lim ka ce ngat mo onyuto miti. Lok mene ma gubinyamo ka gudok cen ka lim? Pwony mene ma rwod ot romo bedo iye ki miti ma weko gitwero medde ki nyamo lok iye i nino mukene? Cawa mene maber me dok cen ka lim? Omege ki lumege mapol bene gitiyo ki worogi pi jo me ot wek giyubbe pi cokke, man weko gibedo ki ngec i kom gin ma kibinyamo i cokke. Tika iromo yubbe maber adada wek imi lagam i cokke? Ka imiyo lagam, man bijingo niyeni dok bene weko tammi pe gwange oyotoyot. (Jab. 35:18) Ada, woro pi jo me ot gwokowa wek pe wabed ka byeko jami ki dok pe wabed ki akalakala.

16. Gin ango ma cuko cwiny Lukricitayo ma kiwirogi me medde ki tic pi Lubanga kun gitiyo ki ryeko?

¹⁶ Ka watamo i kom kit ma Jehovah omiyo kwede mot bot jone kun weko giniang lok pa lunebi me Baibul, man dongo genwa i kom mot mamwonya ma tye anyim. Jo ma kiwirogi gitye ki gen me ribbe kacel ki Kricito i polo. Gen man pud dong cuko cwinygi me medde ki tic pi Lubanga kun gitiyo ki ryeko! Gin ma lakwena Paulo ocoyo bot jo Tecalonika tye ka cobbe i kom jo ma kiwirogi i kareni: “Utmegiwa ma Rwot [Jehovah] maro, myero wapwo Lubanga piwu nino ducu, pien Lubanga okwongo yerowu . . . pi cwiny maleng ma lonyowu wubedo maleng, ki pi ye lok me ada.”​—2 Tec. 2:13.

17. Lok ma kicoyo i 2 Jo Tecalonika 3:1-5 cuko cwinyi nining?

¹⁷ Ki bene, jo ma gitye ki gen me nongo kwo ma pe tum i lobo kany omyero gugwokke wek tamgi pe ogwangnge oyotoyot. Ka itye ki gen me kwo i lobo, ket cwinyi i lok me mar ma lakwena Paulo ocoyo bot Lukricitayo luwote ma kiwirogi i Tecalonika. (Kwan 2 Jo Tecalonika 3:1-5.) Wan ducu ki acel acel omyero wanyut pwoc pi lok man me mar-ri. Ada, waraga ma kicoyo bot jo Tecalonika-ni poyo wiwa pe me byeko jami mogo ma Baibul pe loko iye atir atir nyo me kati ki tam mogo ma pe opore. Pien kare me agikki dong cok adada, Lukricitayo i kareni myero guter lok man me poyo wic-ci calo gin ma pire tek adada.