Yo Ma Itwero Jalle Kwede Pi Ker-ri

1. Gin ango ma jo mapol gujalle me timone, ki dok pingo?

DANO gitye atera me jalo jami mogo wek gicob jami ma pigi tego botgi. Lunyodo gijalo cawagi, cente, ki kerogi me konyo lutinogi. Awobe ki anyira ma gimito pyem pi lobegi i olympics gicwalo kare malac nino ducu ka rweyo lergi kun nongo luwotgi gitye ka tuko nyo mato yamo. Yecu bene ojalo jami mapol wek etim jami ma pigi tego i kwone. En pe obedo ka yenyo jami mabeco dok pe onywalo lutino. Ma ka meno, en oketo cwinye i tito kwena me Ker-ri. (Mat. 4:17; Luka 9:58) Lulub kore bene gujalo jami mapol wek gukony i tito pi Ker pa Lubanga. Yaro pi Ker man onongo tye gin ma pire tek botgi, dok gin gujalo jami mapol wek giti matek pi Ker-ri kit ma kerogi twero kwede. (Mat. 4:18-22; 19:27) Watwero penye kekenwa ni, ‘Gin ango ma pire tek i kwona?’

2. (a) Jami mene ma pigi tego ma Lukricitayo me ada ducu myero gujal? (b) Gin ango mukene ma Lukricitayo mogo gijalle me timone?

² Tye jami mogo ma pigi tego ma Lukricitayo me ada ducu myero olo to gujal wek gudong dok gubed ki wat maber ki Jehovah. Jami magi gikwako cawawa, kwanyo kare me lega, kwano Baibul, bedo ki woro pi jo me ot, wot i cokke, ki dong ticwa me pwony.a (Yoc. 1:8; Mat. 28:19, 20; Ibru 10:24, 25) Macalo adwogi me tutewa kacel ki mot ma Jehovah miniwa, man oweko tic me tito kwena tye ka medde ki bene dano mapol gitye ka bino i wi “got me ot pa Rwot [Jehovah].” (Ic. 2:2) Me teno kor tic me Ker-ri, omege ki lumege gijalle me tic i Betel, konyo gedo Odi me Ker ki me gure mapat pat, yubo gure madito, nyo miyo kony ka ma can ma poto atura otimme iye. Jalle me timo jami magi pe gimiyo wanongo kwo ma pe tum, ento pigi tego me teno kor tic me Ker-ri.

3. (a) Mot ango ma wanongo ka wajalle pi Ker-ri? (b) Lapeny ango ma myero wapenye kwede?

³ I kareni, pud dong mitte adada ni waten kor tic me Ker-ri. Tye me yomcwiny me nenone ni jo mapol gitye ka jalle me tic pi Jehovah labongo dic! (Kwan Jabuli 54:6.) Cwiny man me jalle ken-ni keliwa yomcwiny madit kun wamedde ki kuro Ker pa Lubanga. (Nwo. 16:15; Tic 20:35) Ento, wan ducu myero wangine kekenwa maber. Tika tye yo mukene ma waromo jalle kwede wek waten kor tic me Ker-ri? Watye ka tic ki cawawa, centewa, kerowa ki dong diro ma watye kwede nining? Gin ango ma wiwa myero pe owil iye ka wajalle? Kong dong wanenu kit ma watwero lubo kwede lanen pa Luicrael ma gunyuto cwiny me jalle ken wek yomcwinywa omedde.

GITYER MA LUICRAEL GUMIYO

4. Adwogi maber ango ma Luicrael gunongo ki i miyo gityer?

⁴ Luicrael onongo gityero tyer wek kitimigi kica pi balgi. Miyo gityer onongo mitte wek ngat moni onong cwak pa Jehovah. Mogo onongo kiketo calo cik ni kimi; ento mukene onongo kimiyo calo gityer ma igi opwoyo. (Levi 23:37, 38) Gitum awanga onongo kitwero miyone macalo gityer ma i ngat moni opwoyo, nyo mic, bot Jehovah. Labol me gityer ma kimiyo ma pud dong ngene adada obedo i nino ma Solomon odyero iye ot pa Lubanga.​—2 Tekwaro 7:4-6.

5. Yub ango ma Jehovah oketo pi lucan?.

⁵ Jehovah onongo ngeyo ni dano ducu pe giromo miyo gityer marom, dok en onongo mito ni ngat acel acel omi kit ma kerone twero kwede. Cik pa Jehovah onongo waco ni kityer lee ento remone myero kiwek ocwer woko. Man onongo tye macalo “lanyut keken me jami mabeco me kare me anyim” ma bibino kun wok ki bot Wode, Yecu. (Ibru 10:1-4, Baibol pa Katoli.) Ento, Jehovah pe oketo gingi tutwal ni myero kilub cik meno. Me lapore, Lubanga onongo ye gityer me amam ka ce ngat moni pe twero tyero romo nyo dyel. Pi meno, lucan bene onongo gitwero miyo gityer ki yomcwiny bot Jehovah. (Levi 1:3, 10, 14; 5:7) Kadi bed ni lee ma onongo gityero gipat pat, ento tye jami aryo ma onongo mitte ki bot ngat acel acel ma obimiyo gityer ma iye pwoyo.

6. Gin ango ma onongo mitte ki bot ngat acel acel ka tye ka miyo gityer, ki dok pingo onongo pire tek me lubo cik magi?

⁶ Mukwongo, ngat meno onongo myero omi gityer maber loyo. Jehovah owaco ki Luicrael ni gutyer lee ma komgi yot ka gimito ni ‘egam.’ (Levi 22:18-20) Ka ce lee meno kome ki mwonyo nyo roc mo tye i kome, onongo kineno calo gin ma pe opore me atyera bot Jehovah. Me aryo, onongo mitte ni ngat ma miyo gityer-ri myero obed ma olonnye ki dok labongo bal mo. Ka ngat moni pe olonnye, en nongo omyero omi gitum me bal nyo gitum me tingo alii me yubo watte ki Jehovah ma peya omiyo gityer ma iye opwoyo. (Levi 5:5, 6, 15) Man obedo lok ma pire tek adada. Jehovah owaco atir ka maleng ni ka kityero gityer lakwecwiny, ma man onongo kwako gityer ma i ngat moni opwoyo, ci ngat mo ma pe olonnye myero pe ocam pien kibineke woko. (Levi 7:20, 21) Ki tungcel, ka ngat ma tye ka tyero gityer-ri onongo tye ki wat maber ki Jehovah ki dok gityer-re pe ki mwonyo, en onongo twero bedo ki yomcwiny madit.​—Kwan 1 Tekwaro 29:9.

MIYO GITYER I KARENI

7, 8. (a) Yomcwiny ango ma jo mapol ginongo pien gujalle me tic pi Ker-ri? (b) Jami mene ma wan ducu watwero tic kwedgi?

⁷ I kare-ni, dano mapol gitye ka mine labongo dic mo me tiyo tic pa Jehovah, dok man yomo cwiny Jehovah adada. Tic matek pi utmegiwa kelo mot mapol. Omego mo acel ma konyo i gero Odi me Ker ki dok miyo kony bot jo ma can ma poto atura otimme i komgi owacci pe etwero tito yomcwiny ma enongo ki i timo tic magi. En owacci, “Neno yomcwiny kacel ki pwoc pa omege ki lumege ka gudonyo pi tyen mukwongo i Ot me Ker ma kigedo nyen nyo ka gunongo kony i nge peko ma opoto atura, man miyo aneno tutena calo gin ma nyako nyige dok kela yengo madit.”

⁸ Lutic pa Jehovah i kareni gitiyo ki yo ducu ma twere me teno kor tic pa Jehovah. I 1904, omego C.T. Russell ocoyo ni: “Wan ki acel acel myero wanene kekenwa macalo opii ma Rwot ocimogi me doro kit ma watiyo kwede ki cawawa, kerowa, centewa kacel ki jami mukene, dok wan ducu myero wati ki mot magi ki cwinywa ducu me kelo deyo bot Laditwa.” Kadi bed ni wanongo mot mapol, jallewa bot Jehovah-ni pe bino me nono. (2 Cam. 24:21-24) Tika watwero tic ki jami ma watye kwede i yo maber makato kit ma watye ka tic kwedgi i kareni?

9. Pwony ango ma wanongo ki i Luka 10:2-4 ma lubbe ki kit ma myero wati kwede ki cawawa?

⁹ Cawawa. Tero cawa kacel ki kero me gonyo ki dok goyo bukkewa, yubo odi me woro, yubo gure madito, miyo kony i kabedo ma peko ma poto atura otimme iye, ki dong timo tic mukene mapol ma pigi tego. Wan ducu watye ki cawa 24 i nino acel acel. Yecu omiyo cik ma iye lac ma twero konyowa me tic ki cawawa i yo mupore. I kare ma tye ka cwalo lupwonnyene i tic me tito kwena, Yecu owaccigi ni: “Pe wumot ngat mo i wangayo.” (Luka 10:2-4) Pingo Yecu omiyo cik man ma iye lac-ci? Laco mo ma okwano lok madok i kom Baibul owacci: “I kare pa Yecu, ka dano gitye ka motte, onongo pe gikulle akula nyo gimoto cinggi keken ci otum. Ma ka meno, onongo gikwakke tyen mapol dok giryebbe wa i ngom, man onongo tero cawa malac.” Yecu onongo pe tye ka wacci lulub kore pe gumot dano. Ma ka meno, en onongo tye ka konyogi me niang ni gipe ki cawa me abala dok cawa ma gitye kwede-ni omyero gutim ki jami ma pigi tego. (Ep. 5:16) Tika watwero tic ki cik man ma iye lac-ci wek okonywa me bedo ki cawa muromo me teno kor tic me Ker-ri?

10, 11. (a) Mot ma wabolo me konyo kor tic me Ker ma kwako wi lobo ducu-ni gitiyo kwede nining? (b) Tira ma tye i 1 Jo Korint 16:1, 2 twero konyowa nining?

¹⁰ Centewa. Lim oduk mitte me teno kor tic me Ker-ri. Mwaka ki mwaka, gitiyo ki ciling milion mapol me konyo kor tic pa luneno ma giwoto awota, painia keken, ki bene lumiconari. Cakke wa i 1999, dong kigedo Odi me Ker ma romo 24,500 kulu i lobbe ma tye ki can lim. Ento, cokcok Odi me Ker ma romo 6,400 kulu pud gimitte. Kigoyo magajin me Wi Lubele ki Awake! ma romo milion 100 kulu dwe ki dwe. Jami magi ducu tye ka cobbe pi mot ma omege ki lumege gibolo kun a ki i cwinygi.

¹¹ Lakwena Paulo otito gin ma myero watim ka ce wamito bolo mot. (Kwan 1 Jo Korint 16:1, 2.) Pi cwiny pa Lubanga, en ocuko cwiny utmege me Korint ni pe myero gukur wang ma oo wa i tum cabit ka dong guyeny gin mo me abola macalo mot. Ento en owaccigi ni gugwok gin mo me abola macalo mot i acakki me cabit ma lubbe ki kerogi. Kit ma otimme kwede i cencwari me acel-li, omege ki lumege i kareni gigoyo pulan me miyo mot ma lubbe ki kit ma kerogi twero kwede. (Luka 21:1-4; Tic 4:32-35) Jehovah pwoyo kodi cwiny man.

12, 13. Tamo pi jami mene ma gitwero weko jo mogo gikwero timo gin maber ki kerogi kacel ki dirogi, ento Jehovah twero konyogi nining?

¹² Kerowa kacel ki Dirowa. Jehovah konyowa ka watute ki kerowa kacel ki dirowa i tic me Ker-ri. En ocikke me konyowa ka watye ka ol woko. (Ic. 40:29-31) Tika watamo ni wape ki diro muromo me teno kor tic man? Tika watamo ni jo mukene aye gupore me timone? Po ni Jehovah twero medo diro ma kinywalo ki ngat moni, kit ma otimo kwede i kom Bejalel gin ki Okoliab.​—Nia 31:1-6; nen cal ma i pot karatac me 13.

¹³ Jehovah cuko cwinywa me tic ki kerowa ducu dok ni pe myero wakwer timo gin maber. (Car. 3:27) I kare ma kitye ka gedo odoco ot pa Lubanga i Jerucalem, Jehovah ocuko cwiny jone ni gutam matut i kom gin ma gitye ka timone me konyo tic man. (Ag. 1:2-5) Tamgi onongo dong odwone woko dok pe gitye ka keto cwinygi i tic man. Omyero wanen ka ce gin ma pire tek botwa rwatte ki miti pa Jehovah. Tika watwero ‘tamo pi kit kwowa’ wek wabed ki cawa malac i tiyo tic me Ker-ri i kare man me agikki-ni?

MIYO GITYER MA LUBBE KI GIN MA WATYE KWEDE

14, 15. (a) Lanen me miyo mot pa utmegiwa ma lucan cuko cwinywa nining? (b) Gin ango ma myero wabed ki miti me timone?

¹⁴ Pol pa dano gikwo ka ma kwo tek iye adada nyo can aye doro kwogi me nino ducu. Dul pa Jehovah tute matek me konyo utmege ma gikwo i lobbe magi. (2 Kor. 8:14) Ento, kadi wa omege ki lumege ma gin lucan gitero miyo mot calo gin ma pire tek. Cwiny Jehovah bedo yom ka lucan gimiyo jamigi ki yomcwiny.​—2 Kor. 9:7.

¹⁵ I lobo mo acel i Afrika ka ma can obwoyo iye dano adada, utmege gijalo but camgi ma i poto ci gicato wek centene okony tic me Ker-ri. I lobo meno bene, onongo kitye ka yubbe me gedo Ot me Ker. Omege ki lumege onongo gimito miyo kony me gedone. Ento, gedo man onongo obitimme i kare me cwir, ma nongo gitye ka pur. Kadi bed kit meno, gin gumoko tamgi me miyo kony. I kare ma gedo ocakke, gin gubedo ka tic i dyeceng ka otyeno gicito i poto ka pur. Man pud dong nyuto cwiny me jalle ya, dok poyo wiwa i kom utmege ma i Makedonia i cencwari me acel. Gin onongo gitye i “can madit mada,” ento pud gubako doggi me miyo kony itiyo tic ma onongo kitye ka tiyone. (2 Kor. 8:1-4) Wan bene myero ‘wami mot muporo kit gum ma Jehovah omiyowa.’​—Kwan Nwoyo Cik 16:17.

16. Gin ango ma watwero timone wek Jehovah ogam gityerwa?

¹⁶ Ento, tye gin mo acel ma wiwa myero pe owil iye. Kit macalo tye jami mogo ma onongo mitte ki bot Luicrael wek Jehovah ogam gityer ma igi opwoyo-ni, wan bene myero wanen ni Jehovah ojolo gityerwa. Man kwako gin ango? Omyero wabed ki neno mupore kun wacwalo gwoko lupacowa ki dok woro Jehovah calo jami ma pigi tego loyo. Kadi bed ni wakonyo i gedo Odi me Ker, wamiyo kony pi can ma poto atura, ki dok watimo jami mukene mapat pat, Jehovah pe ‘bigamo’ gityerwa ka pe waparo pi lupacowa i yo me cwiny nyo pe waminigi jami ma mitte me kom. Man rom aroma ma watye ka miyo gin ma wape kwede. (Kwan 2 Jo Korint 8:12.) Me medo i kom meno, myero wagwok watwa ki Jehovah wek pe wabed jo ma pe gipwoyo. (1 Kor. 9:26, 27) Bed ki gen ni ka walubo tira me Baibul, gityerwa biminiwa yomcwiny madit dok Jehovah ‘bigamone.’

JALLEWA PIRE TEK ADADA

17, 18. Watamo ningo i kom jo ducu ma gitye ka jalle pi Ker-ri, dok gin ango ma wan ducu myero watam iye?

¹⁷ Omegiwa ki lumegiwa mapol ‘gionye kekengi macalo gityer amata’ kun gitiyo matek i teno kor ticwa me ker-ri. (Pil. 2:17) Watye ki pwoc madit atika pi jo ma gunyuto kodi cwiny man me jalle ken-ni. Pwoc madit bene cito bot mon kacel ki lutino pa omege ma gitelo yo i tic me ker-ri pienni ginyuto cwiny me jalle ken ki dok miyo mot.

¹⁸ Tic matek mitte me teno kor tic me Ker-ri. Myero walegu dok watam matek i kom gin ma waromo timone me teno kor tic man. Bed ki gen ni mot mapol tye pi jo ma gitye ka timone i kareni ki dok bene mot madit makato bibedo tye “i kare me anyim.”​—Mar. 10:28-30.