LOK MA I POK NGEYE | CATAN TIKA ADA TYE?
Catan Tika Ada Tye?
“Adongo i El Salvador. Ka ce atimo gin mo marac, mamana onongo wacca ni ‘Catan tye ka bino ka gami!’ Ka owaco kumeno, ci agamo lokke ni, ‘Wek obin!’ Abedo ngat ma ye i kom Lubanga ento pe Catan.”—ROGELIO.
Tika iye lok pa Rogelio-ni? Tam mene ma iyeng kwede ki i kin tam magi?
Catan peke; ento en cung pi jami maraco ma dano gitimo.
Catan tye, ento en pe keto cwinye i kom dano.
Catan obedo cwec me cwiny matek adada dok en aye doro kwo pa dano.
Tye dano milion mapol ma gicwako tam magi ki acel acel. Ento tika pire tek me ngeyo mene ma tye ada? Ada, ka Catan pe, ci nongo kibwolo jo ma giye ni en tye. Ka Catan tye ento en pe paro pi dano, ma nyutti dano mapol gigwokke nyo gibedo kilworo pi tyen lok mo ma tere pe. Kadi bed kit meno, ka Catan obedo labwola ma tiyo ki jo mukene me cobo mitine, ci nongo en ngat marac adada makato kit ma dano mapol gitamo kwede.
Kong dong wanenu kit ma Ginacoya gamo kwede lapeny magi: Catan mono anga nyo obedo gin ango—tika obedo gin ma cung pi jami maraco nyo kece obedo cwec me cwiny? Ka Catan obedo dano adana, tika en romo wani? Ka tye kumeno, itwero gwokke nining?