Adwogi Maber ma Wanongo ki i Cer pa Yecu

1, 2. (a) Ngo ma lutela dini mogo onongo gimito ngeyone, dok Petero ogamo nining? (Nen cal ma tye i pot karatac man.) (b) Ngo ma oweko Petero oloko ki tekcwiny?

I NGE nino manok ma kineko Yecu, lakwena Petero okemme ki co mogo ma kitgi raco dok giger adada. Jo magi onongo gitye lutela dini pa Lujudaya ma gugoyo pulan me neko Yecu. Cwinygi obedo ka cwer pien Petero ocango laco mo ma kinywale langolo, dok gubedo ki miti me ngeyo ka ma en onongo iye teko me timo tango man. Petero ogamo ki tekcwiny ni: “Pi nying Yecu Lanajaret, ma wun wuguro i kom yatariya [“yat,” NW], ma Lubanga ocero woko ki i kin jo muto-ni aye laco man ocung i nyimwu ma kome yot.”​—Tic 4:5-10.

² Con kong, Petero okwero Yecu tyen adek kulu pi lworo. (Mar. 14:66-72) Ngo ma oweko Petero oloko ki tekcwiny i kare ma en tye i nyim lutela dini? Cwiny maleng aye okonye, medo ki gen matek ma en onongo tye kwede ni kicero Yecu. Pingo lakwena Petero onongo pe ki akalakala ni kicero Yecu? Pingo wan bene omyero wabed labongo akalakala?

3, 4. (a) Cer mene mutimme ma peya kinywalo lukwena pa Yecu? (b) Yecu ocero angagi?

³ Nicer pe obedo lok manyen bot lukwena pa Yecu pien onongo dong kicero dano mapol ma peya kinywalogi. Gin onongo gingeyo ni Lubanga omiyo teko bot lanebi Elia ki Elica me cero jo muto. (1 Luker 17:17-24; 2 Luker 4:32-37) Laco mo ocer i kare ma kibole i lyel ci kome ogudo cogo pa Elica. (2 Luker 13:20, 21) Lukricitayo me kare macon-ni onongo giye lok magi, kit ma wan bene waye Lok pa Lubanga-ni.

⁴ Labongo akalakala, kwano lok i kom kit ma Yecu ocero kwede dano gudo cwinywa adada. I kare ma en ocero wod pa dato mo, dato-ni nen calo obedo ki twon ur madit. (Luka 7:11-15) I nino mukene, Yecu ocero anyaka mo ma mwakane tye 12. Tam kong ur kacel ki yomcwiny ma lunyodone gubedo kwede i kare ma Yecu ocero nyargi! (Luka 8:49-56) Medo i kom meno, dano nen calo gubedo ki yomcwiny ma pe wacce i kare ma Lajaro okatti woko makwo ki i boro got!​—Jon 11:38-44.

GIN MUMIYO CER PA YECU PAT KI MUKENE-NI

5. Cer pa Yecu onongo pat ki cer mukene ma gutimme angec nining?

⁵ Lukwena onongo gingeyo ni cer pa Yecu dok pat ki mukene ma gutimme angec. Jo ma kicerogi con-ni gucer ki komgi ci lacen guto woko. Kicero Yecu ki kom me cwiny ma pe top. (Kwan Tic pa Lukwena 13:34.) Petero ocoyo ni Yecu “yam gineko kome, ento gicere woko i cwiny.” Medo i kom meno, “ma dong odok woko i polo, tye i kabedo me deyo i nget Lubanga tung acuc, kun lumalaika ki twer ki teko ducu gitye i te locce.” (1 Pet. 3:18-22) Cer mukene mutimme-ni gubedo tango me ur mada, ento cer pa Yecu obedo tango ma pud dong pire tek loyo.

6. Cer pa Yecu ogudo lupwonnyene nining?

⁶ Cer pa Yecu ogudo cwiny lupwonnyene adada. En onongo dong ocer woko kadi bed lumonene onongo gitamo ni oto woko. Yecu onongo tye makwo macalo cwec me cwiny matek adada ma dano mo keken pe twero wane. Cer pa Yecu nyuto ni en Wod pa Lubanga, dok ngeyo lok man okwanyo cwercwiny pa lupwonnyene kun miyo gibedo ki yomcwiny. Medo i kom meno, tekcwiny oleyo ka wang lworogi. Ka onongo pe kicero Yecu, ci yub pa Lubanga onongo pe bicobbe dok kwena maber ma lupwonnyene gutito-ni konye pe.

7. Ngo ma Yecu tye ka timone i kareni, dok waromo penye ki lapeny macalo mene?

⁷ Wan macalo lutic pa Jehovah wangeyo ni Yecu pe obedo mere laco ma ngene loyo ci otum. En pud kwo wa i kareni dok tye ka telo wi tic me pwony i twok lobo lung. Macalo Kabaka ma loyo Ker pa Lubanga, Yecu Kricito cokcok-ki bityeko jo maraco ki i lobo ci loko doko paradic ka ma dano gibikwo iye pi naka. (Luka 23:43) Jami magi weng onongo pe bitimme ka pe kicero Yecu. Pi meno, pingo waye labongo akalakala ni kicere? Adwogi maber ango ma wanongo ki i cer pa Yecu?

JEHOVAH ONYUTO TEKONE I KOM TO

8, 9. (a) Pingo lutela dini pa Lujudaya gupenyo ni kigwok lyel pa Yecu maber adada? (b) Ngo mutimme i kare ma mon gubino i boro got?

⁸ I nge neko Yecu, lulamdog madito ki Luparicayo gubino bot Pilato ci guwacce ni: “Ladit, wapo kit ma dano ma lagoba ca oloko kwede, i kare ma pud en kwo; ma owaco ni, ‘I nge nino adek abicer woko doki.’ Pi meno cik gigwok lyel maber adada nio wa i nino me adekke, wek lupwonnyene pe gucit gukwal kome woko, ka dong giwaco bot lwak ni, ‘En dong ocer woko ki i kin jo muto’, man bimiyo bwola man bedo rac makato mukwongo ca.” Pilato ogamo lokgi ni: “Wutye ki askari ma gin lukur-piny; wuciti wugwok maber mada kit macalo wutwero.” Man aye gin ma gutimo kikome.​—Mat. 27:62-66.

⁹ Kom Yecu onongo kikano i boro mo ma kiroko i i got ma kiloro doge ki kidi madit. Lutela dini pa Lujudaya onongo gimito ni Yecu oto matwal. Ento, Jehovah onongo dok tye ki tam mapat. I kare ma Maliam Magdala gin ki Maliam lawote gubino i boro got i nge nino adek, gin gunongo kicoro got woko dok lamalaika obedo i wiye. Lamalaika-ni owaco bot mon-ni ni gunen i boro got me mokone ni kicero Yecu woko. Lamalaika owaco ni ‘pe tye kany, pien kicere woko.’ (Mat. 28:1-6) Yecu onongo kwo!

10. Paulo omoko nining ni kicero Yecu woko?

¹⁰ Jami mubedo ka timme pi nino 40 i nge cero Yecu nyuto ka maleng ni en dong kicere woko. Lakwena Paulo ocoyo bot jo Korint ni: “Pien lok ma nene amiyowu ma pire dit mukwongo, en lok ma yam gimiya, ma waco ni, Kricito yam oto pi balwa, kun lubo coc ma yam gicoyo; dok bene ni giyike, ka dong gicere woko i nino me adekke, kun lubo coc ma yam gicoyo, dok ni yam onen bot Petero, ka dok onen bot jo apar wiye aryo ca. Ka dok onen bot utmego makato miya abic lawangacel; pol dano mogo i kin jo-nu pud gitye kwo, kadi bed jo mogo dong guto woko. Dok oturu ki nen bot Yakobo, lacenne onen bot lukwena ducu. Me agikkine ducu, ci bene onen bota, kadi bed abedo calo latin ma kibwogo abwoga.”​—1 Kor. 15:3-8.

GIN MUNIYO WANGEYO NI KICERO YECU

11. I yo ma nining ma cer pa Yecu otimme ‘ma lubbe ki coc ma yam gicoyo’?

¹¹ Tyen lok me acel mumiyo wangeyo ni kicero Yecu aye ni cerre otimme ‘ma lubbe ki coc ma yam gicoyo.’ Lok pa Lubanga otito wacon pi cer pa Yecu. Me labolle, Daudi ocoyo ni ‘dano ma geno’ Lubanga pe kibiweke i bur Lyel. (Kwan Jabuli 16:10.) I Pentekote 33 K.M., lakwena Petero otito ni wang ginacoya meno loko i kom Yecu, kun wacci: “En [Daudi] yam oneno gin ma bitimme i anyim ka oloko bene i kom cer pa Kricito ma Lubanga oyero ni, pe gitenye ata i lobo pa jo muto, kome bene pe otop.”​—Tic 2:23-27, 31.

12. Angagi ma guneno Yecu i nge cere?

¹² Tyen lok me aryo mumiyo wangeyo ni kicero Yecu aye ni dano mapol gumoko caden pien guneno Yecu i nge cere. Pi nino ma romo 40, Yecu onyutte bot lupwonnyene i poto macok ki boro got ma kiyike iye-ni ki dok i yo ma cito i Emau medo ki kabedo mukene mapat pat. (Luka 24:13-15) I kare magi ducu, en oloko ki jo mogo calo Petero ki dong gurup pa dano. Ki lok ada, Yecu onyutte bot lwak dano makato 500 kulu! Caden pa jo mapol pe kwere.

13. Mit kom pa lupwonnye pa Yecu onyuto nining ni onongo gipe ki akalakala ni kicere woko?

¹³ Tyen lok me adek mumiyo wangeyo ni kicero Yecu aye ni lupwonnyene gutito ki mit kom pi cere. Pien lupwonnye pa Yecu gubedo ka tito pi cere ki mit kom, man omiyo kiunogi, gudeno can, ki dong kinekogi. Ka obedo lok goba ni kicero Yecu, ci pingo Petero oketo kwone ka mading wek etit bot lutela dini ni kicero Kricito kun gin aye onongo gidag Yecu dok gubuko mac oweko kineke? Pien Petero kacel ki lupwonnye mukene-ni onongo gipe ki akalakala ni Yecu kwo dok tye ka telo wi tic ma Lubanga mito ni kitim. Medo i kom meno, cer pa Yecu omoko bot lulub kore ni gin bene kibicerogi. Me lapore, Citefano oto ki gen ni kibicero jo muto.​—Tic 7:55-60.

14. Pingo iye ni Yecu kwo?

¹⁴ Tyen lok me angwen mumiyo wangeyo ni kicero Yecu aye ni watye ki caden ma moko ni Yecu kombeddi tye ka loc macalo Kabaka dok bene tye Lawi kacokke. Macalo adwogine, dano mapol gitye ka doko Lukricitayo. Tika man onongo romo timme ka ce pe kicero Yecu? Ki lok ada, kono pe wawinyo lok i kome. Ento, watye ki tyen lok mucwiny me ye ni Yecu kwo dok tye ka telo wi tic me tito kwena maber-ri i twok lobo ducu.

ADWOGI MABER MA WANONGO KI I CER PA YECU

15. Pingo cer pa Yecu miniwa tekcwiny me tito kwena?

¹⁵ Cer pa Kricito weko watito kwena ki tekcwiny. Pi mwaki 2,000, lumone pa Lubanga gutiyo ki jami lweny mapat pat me gengowa ki tito kwena maber-ri​—i kin jami lweny magi tye iye pwony pa jo mungak, ngala, tim gero, kigeng, aunauna, ki dong nek. Ento, “pe tye jami lweny mo ma giteto pi lweny” i komwa ma ojukowa ki tito kwena me Ker-ri ki loko dano me doko lupwonnye pa Yecu. (Ic. 54:17) Wan pe walworo lulub kor Catan nyo opiine. Yecu tye kwedwa kun bene cwakowa kit ma en ocikke kwede-ni. (Mat. 28:20) Omyero wabed ki tekcwiny pien lumonewa pe gibijukowa kadi bed gutemme ningo!

16, 17. (a) Cer pa Yecu moko gin ma en opwonyo-ni nining? (b) Ma lubbe ki Jon 11:25, Lubanga omini Yecu teko me timo gin ango?

¹⁶ Cer pa Yecu moko jami ducu ma en opwonyo. Paulo ocoyo ni ka onongo pe kicero Yecu, kono niye pa Lukricitayo ki ticgi me tito kwena konye pe. Dano mo acel ma okwano lok kom Baibul i yo matut ocoyo ni: “Ka ce Kricito pe kicero, . . . ci Lukricitayo gitye luming ma konygi pe pien giye goba ma kuto mac lyel ki i keno.” Ka pe kicero Yecu, ci nongo jiri obedo mere ododo pa laco mo ma kite ber dok ryek ma lumonene guneke woko. Ento, Kricito ocer dok man omoko ni jami ducu ma en opwonyo tye lok ada, kadi wa gin ma en otito ni bitimme i anyim.​—Kwan 1 Jo Korint 15:14, 15, 20.

¹⁷ Yecu owaco ni: “An nicer ki kwo; ngat ma ye an, kadi oto, dok bikwo.” (Jon 11:25) Cikke pa Yecu-ni wang ma ocobbe. Jehovah pe omiyo bot Yecu teko me cero dano wek gukwo i polo macalo cwec me cwiny keken, ento en bene bicero dano bilion mapol ma gibibedo ki gen me kwo i lobo pi naka. Cer pa Yecu kacel ki ginkok ma en oculo-ni miniwa gen ni to bibedo pe. Ngec man tika pe jingo cwinyi me ciro atematema mo keken ki tekcwiny, kadi wa to bene?

18. Cer pa Yecu miniwa gen ango?

¹⁸ Cer pa Yecu miniwa gen ni kibingolo kop i wi dano ma lubbe ki miti pa Jehovah. Paulo owaco bot gurup pa co ki mon mogo i Atene ni: “[Lubanga] dong otyeko moko nino ma en bingolo iye kop i kom dano ducu ma i lobo i kit ma atir, kun dong oyero dano ma myero ongol kop ma ka-kare, omiyo bene lanen ma nyuto ni man bitimme pi cero dano meno ki i kin jo muto.” (Tic 17:31) Ada, Lubanga aye ocimo Yecu macalo Langolkop, dok watye ki gen ni en bingolo kop i yo ma atir dok ki mar.​—Kwan Icaya 11:2-4.

19. Bedo ki niye i kom cer pa Kricito gudowa nining?

¹⁹ Ka waye ni Yecu ocer, ci man cuko cwinywa me timo miti pa Lubanga. Ka Yecu onongo pe omiyo kwone dok pe kicere, kono pud watye i te loc me bal ki to. (Rom. 5:12; 6:23) Ka ce pe kicero Yecu, ci pore piwa me wacone ni: “Wacamu, wamatu, pien diki wabito woko.” (1 Kor. 15:32) Ento pe waketo cwinywa i mwodo kwo. Ma ka meno, watero gen me nicer calo gin ma pire tek dok watye ki tyen lok matir me lubo tira pa Jehovah i jami ducu.

20. Cer pa Yecu nyuto nining ni Lubanga tek?

²⁰ Cer pa Kricito moko ka maleng ni Jehovah tek, dok en “miyo bakacic bot jo ma yenye.” (Ibru 11:6) Jehovah onyuto teko kacel ki ryeko ma pe pore i kare ma en ocero Yecu me kwo i polo macalo cwec me cwiny ma pe twero to! Medo i kom meno, Lubanga onyuto ni etye ki kero me cobo Yubbe ducu. Man kwako cikke pa Lubanga ni ‘lakwaro’ mo ma pire tek aye bicobo pyem ma kikelo i kom twero me loc pa Lubanga. Wek cikke man ocobbe, Yecu onongo myero kong oto ci dok kicere.​—Acak. 3:15.

21. Adwogi maber ango ma ibinongo ki i gen me nicer?

²¹ Tika itye ki pwoc bot Jehovah, ma ominiwa gen me nicer? Ginacoya cikke ni: “Nen, kabedo pa Lubanga dong tye bot dano. En bibedo kacel kwedgi, ci gin gibibedo jone. Lubanga kikome aye bibedo kwedgi, kun bene bedo Lubangagi. En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.” Gen man kitito pire bot lakwena Jon kun kiwacce ni: “Co lok man, pien lok magi lok ma genne dok me ada.” Anga ma otito bot Jon pi cikke man? Yecu Kricito aye otito bote i nge cer.​—Yabo 1:1; 21:3-5.