‘Kombeddi Dong Wudoko Jo pa Lubanga’

1, 2. Alokaloka ango mutimme i Pentekote 33 K.M., dok angagi ma gudoko lumemba me rok manyen pa Jehovah? (Nen cal ma tye i pot karatac man.)

PENTEKOTE 33 K.M., obedo nino ma pire tek adada i tekwaro pa jo pa Jehovah i lobo kany. Man aye nino ma alokaloka madit otimme iye. I nino meno, Jehovah otiyo ki cwiny maleng me cako rok manyen​—Icrael me cwiny, “jo [Icrael] pa Lubanga.” (Gal. 6:16) Pi tyen mukwongo, nicakke wa i kare pa Abraim, lirre onongo pe dong bibedo gin ma nyuto jo pa Lubanga. Ma lubbe ki ngat acel acel ma tye i kin rok meno manyen-ni, Paulo ocoyo ni: “Lirre me ada aye lirre ma dano bedo kwede ki i cwinye, ma en aye tic pa cwiny maleng.”​—Rom. 2:29.

² Jo ma gukwongo bedo lumemba me rok manyen pa Lubanga-ni aye lukwena ki dong lupwonye mukene mia acel ki wiye ma gurwatte kacel i rum mo acel ma tye malo i Jerucalem. (Tic 1:12-15) Jo magi kionyo cwiny maleng i komgi ci gudoko lutino pa Lubanga. (Rom. 8:15, 16; 2 Kor. 1:21) Man nyuto ni Jehovah ojolo gityer pa Kricito dok oleyo ka wang gicikke me Cik ki gicikke manyen. (Luka 22:20; kwan Jo Ibru 9:15.) Pi meno, lupwonnye magi gudoko lumemba me rok manyen, jo manyen pa Jehovah. Cwiny maleng okonyogi me tito kwena i leb mapat pat ma Lujudaya ki jo ma gulokke i dini pa Lujudaya giloko. Jo magi gubino i Jerucalem ki i kabedo ducu ma tye ite Ker pa Luroma wek gikwer Nino Madit me Kwero Agikki Cabit Abiro nyo Kwero Ecuban me Cabit Abiro. Gin guwinyo dok guniang i lebgi “tic madito me twero pa Lubanga” ma Lukricitayo ma kiwirogi ki cwiny maleng gutito.​—Tic 2:1-11.

JO MANYEN PA LUBANGA

3-5. (a) Gin ango ma Petero otito bot Lujudaya i nino me Pentekote? (b) Rok manyen me Icrael me cwiny obedo ka dongo nining i kare ma pud ocakke acaka?

³ Jehovah otiyo ki lakwena Petero me yabo yo bot Lujudaya ki jo ma gulokke i dini pa Lujudaya wek gudok lumemba me rok man manyen-ni, kacokke pa Lukricitayo. I nino me Pentekote, Petero otito ka maleng bot Lujudaya ni omyero guye Yecu, laco ma gin ‘guguro i kom yat’ pien “Lubanga otyeko keto en me bedo Rwot [ki] dok Kricito.” I kare ma lwak gupenyo gin ma myero gitim, Petero ogamo ni: “Wungut, gibatijawu ngat acel acel ki i kinwu i nying Yecu Kricito, wek Lubanga owek balwu; ci wubilimo mot me cwiny maleng.” (Tic 2:22, 23, 36-38) I nino meno, dano 3,000 gunongo batija ci kimedogi i rok manyen ma en aye Icrael me cwiny. (Tic 2:41) I ngeye, lukwena gubedo ka tito kwena ki mit kom ma man onyako nyige adada. (Tic 6:7) Wel dano me rok manyen-ni obedo ka dongo.

⁴ Lacen, tic me tito kwena oo wa i Camaria kun bene kelo adwogi maber. Pilipo, latit lok me kwena maber-ri obatija dano mapol, ento gin pe gunongo cwiny maleng cutcut. Lukiko madit ma i Jerucalem ocwalo Petero gin ki Jon bot jo ma kibatijagi i Camaria-ni wek ‘guket cinggi i komgi, ci gulimo cwiny maleng.’ (Tic 8:5, 6, 14-17) Pi meno, jo me Camaria magi bene kiwirogi ki cwiny maleng ci gudoko lumemba me Icrael me cwiny.

⁵ I mwaka 36 K.M., Jehovah dok aye otiyo ki Petero me yabo yo bot jo mukene me doko lumemba me rok manyen-ni, Icrael me cwiny. Man otimme i kare ma Petero otito kwena bot ladit wi mony miya acel pa jo Roma ma nyinge Kornelio kacel ki wadine ki bene lureme. (Tic 10:22, 24, 34, 35) Baibul wacci: “I kare ma Petero pud tye ka loko lok . . . , cwiny maleng opye i kom jo ducu ma gubedo ka winyo lokke. Lujudaya ma guye Yecu ma onongo gubino ki Petero guuro mada pien mot me cwiny maleng dong gionyo wa i kom Lurok.” (Tic 10:44, 45) Nicakke i kare meno, lurok ma pe kilirogi gucako doko lumemba me Icrael me cwiny.

“LWAK MA GILWONGO KI NYINGE”

6, 7. Gin ango ma lumemba me rok manyen-ni gutimo macalo ‘lwak ma gilwongo ki nying Jehovah?’

⁶ I cokke pa lukiko madit i cencwari me acel i 49 K.M., lapwonnye Yakobo owaco ni: “Cimeon [Petero] dong otito kit ma Lubanga okwongo nyuto kwede ni eparo pi Lurok kun okwanyo ki i kingi lwak ma gilwongo ki nyinge.” (Tic 15:14) Lujudaya kacel ki lurok onongo gibibedo i rok man manyen-ni ma kilwongogi ki nying Jehovah. (Rom. 11:25, 26a) Lacen, Petero ocoyo ni: “Yam onongo pe wubedo dano pa Lubanga, ento kombeddi dong wudoko jone.” Petero otito tic pa rok man manyen-ni ni: “Wun wubedo rok ma giyero, ajwagi pa kabaka [“luker ma lulamdog,” NW], rok maleng, jo pa Lubanga kikome, wek wutit pi tic me deyo pa ngat ma olwongowu nia ki i piny macol wek wudony i lengone me aura.” (1 Pet. 2:9, 10) Onongo myero gumi pak bot Jehovah, Ngat ma Loyo Polo ki Lobo kun gitito nyinge i dye lwak ki tekcwiny.

⁷ Jehovah onongo dong tye ka tic ki rok manyen me Icrael me cwiny kun bene lwongogi ni: “Gin rok ma an aye acweyogi pira kena, wek guwer wer me paka.” (Ic. 43:21) Gutito ki tekcwiny ni Jehovah keken aye Lubanga me ada ki dok bene ni lubange mukene-ni ducu gubedo lubange me goba. (1 Tec. 1:9) Gin gumiyo caden i kom Jehovah kacel ki Yecu “i Jerucalem ki i Judaya ducu ki i Camaria, wa i agikki lobo ducu.”​—Tic 1:8; Kol. 1:23.

8. Gin ango ma lakwena Paulo owaco me ciko jo pa Lubanga i cencwari me acel?

⁸ Lakwena Paulo obedo ngat acel ma cwinye tek i kin ‘lwak ma kilwongogi ki nying Jehovah’ i cencwari me acel. En otito ki tekcwiny ni Jehovah keken aye tye ki twero me loc i kare ma ocung tye ka lok i nyim lukamfiri, kun waco ni, “Lubanga ma yam ocweyo lobo ki jami ducu ma tye iye-ni, en aye Rwot me polo ki lobo.” (Tic 17:18, 23-25) I agikki me ticce macalo lamiconari, Paulo ociko jo ma kilwongogi ki nying Lubanga ni: “Angeyo ni ka apokke woko kwedwu, orudi mager bidonyo i kinwu ci pe gibitimo kica bot romi. Dok i kin wun kikomwu bene bia iye jo ma gibiloko lok ma ngako dano ci gibwolo lupwonnye miyo gilubo korgi.” (Tic 20:29, 30) I agikki me cencwari me acel, jo mungak onongo dong gitye mapol.​—1 Jon 2:18, 19.

9. Gin ango ma otimme i kom ‘lwak ma gilwongogi ki nying Jehovah’ i nge to pa lukwena?

⁹ I nge to pa lukwena, jo mungak gunya mapol ata ma man onywalo dini pa Lukricitayo ata-ni. Ma ka bedo ‘lwak ma gilwongogi ki nying Jehovah,’ jo mungak bene gukwanyo wa nying Lubanga woko ki Baibulgi. Gin gikwero kwer pa lukamfiri dok pe giketo deyo i kom Lubanga pienni gipwonyo pwony ma pe jenge i Ginacoya dok gidonyo i lweny kacel ki tim tarwang. Pi cencwari mapol, Jehovah onongo tye ki nyig jo mogo manok ma gilugen i lobo ento dulle ma “gilwongo ki nyinge” onongo pe.

GINYWALO ROK MANYEN

10, 11. (a) Gin ango ma Yecu owaco i carolokke i kom kal ki doo? (b) Carolok pa Yecu-ni ocobbe nining i nge 1914, dok adwogine obedo ningo?

¹⁰ I carolokke ma omiyo i kom kal ki doo, Yecu otito ni jo mungak gibiweko piny bibedo macol i yo me cwiny. En owaco ni “i kare ma dano dong gubuto woko,” Larac-ci bicoyo doo i poto ma Wod pa dano ocoyo iye kal. Gin ducu bidongo kacel nio wa i kare me “agikki piny.” Yecu otito ni “kodi mabeco” cung pi “litino me ker pa Lubanga” ki dok “doo” cung pi “litino pa Larac[-ci].” I kare me agikki, Wod pa dano bicwalo “lutic” ma gin aye lumalaika me poko kin jo ma gicung pi kal ki i kom doo. Ci dong lumalaika bicoko litino me Ker pa Lubanga. (Mat. 13:24-30, 36-43) Man otimme nining, ki dok oyabo yo pi Lubanga me bedo ki jone i lobo kany nining?

¹¹ Kare me “agikki piny” ocakke i 1914. I kare ma lweny ocakke i mwaka meno, Lukricitayo alip manok ma kiwirogi, ma gin aye “litino me ker pa Lubanga” onongo pud gitye opii me pwony goba pa Babilon madit. I 1919, Jehovah olarogi, kun keto apokapoka ma nen ka maleng i kingi ki “doo” nyo jo ma giporo bedo Lukricitayo. En ocoko “litino me ker[-re]” kun ketogi i te dul acel macalo lwakke, me cobo lok ma yam lanebi Icaya ocoyo ni, “Gibinywalo lobo i nino acel keken? Dok bene gitwero nywalo rok kulu i dakika mo manok keken? Pien i kare ma arem pud ocakke acaka i kom Cion, cutcut en onywalo litino awobene woko.” (Ic. 66:8) Cion, ma cung pi lumalaika pa Jehovah-ni ‘onywal’ i kare ma rok manyen pa Lukricitayo ma kiwirogi ocakke i lobo kany.

12. Jo ma kiwirogi gunyuto nining ni gipore me ‘lwonge ki nying Jehovah’ i kareni?

¹² Calo Lukricitayo macon, “litino me Ker” ma kiwirogi onongo myero gubed lucaden pa Jehovah. (Kwan Icaya 43:1, 10, 11.) Pi meno, onongo gibibedo pat i yo me kwogi macalo Lukricitayo ki dok bene i tito “lok man me kwena maber me ker pa Lubanga . . . me bedo caden bot rok ducu.” (Mat. 24:14; Pil. 2:15) I timo man, gukonyo dano milion mapol me bedo ki wat maber ki Jehovah.​—Kwan Daniel 12:3.

“WEK WANYWAK WOT KWEDI”

13, 14. Gin ango ma jo ma gipe i kin Icrael me cwiny myero gutim ka gimito woro ki dok tic pi Jehovah, dok lunebi gutito man nining?

¹³ I pwony mukato-ni, waneno ni Jehovah onongo jolo woro pa lurok ka guwore kacel ki jone. (1 Luker 8: 41-43) I kareni bene, jo ma gipe i kin Icrael me cwiny myero gubed kacel ki jo pa Jehovah, “litino me ker pa Lubanga”​—Lucaden ma kiwirogi pa Jehovah.

¹⁴ Lunebi aryo gutito wacon pi kit ma dano mapol bibedo ka bino kwede ka woro Jehovah kacel ki jone i kare man me agikki-ni. Lanebi Icaya owacci: “Lwak lurok mapol gibibino gibiwacci, ‘Wubin, waitu i wi got pa Rwot [Jehovah], i ot pa Lubanga pa Yakobo; wek en opwonywa kit mere, ka wek walub yo mere.’ Pien cik bia ki i Cion, lok pa Rwot [Jehovah] bia ki i Jerucalem.” (Ic. 2:2, 3) Lanebi Jekaria bene otito ni “rok mapol ki rok matego gibibino i Jerucalem ka yenyo Rwot [Jehovah] me mony ki me lego kica bote.” En oporogi ki “jo apar ma gua ki i lwak rok ma lebgi patpat” ma gibimako dog kanyi pa Icrael me cwiny kun giwacci: “Wek wanywak wot kwedi, pien wawinyo ni Lubanga tye kwedwu.”​—Jek. 8:20-23.

15. Tic ango ma “romi mukene[-ni]” ‘giwoto’ ka timone kacel ki Icrael me cwiny?

¹⁵ “Romi mukene[-ni]” ‘giwoto kacel’ ki Icrael me cwiny i tic me tito kwena maber me Ker pa Lubanga. (Mar. 13:10) Gidoko jo pa Lubanga, “lwak acel” kacel ki jo ma kiwirogi i te loc pa “lakwat maber” Kricito Yecu.​—Kwan Jon 10:14-16.

NONG GWOK I KIN JO PA JEHOVAH

16. Jehovah bikelo bute me agikki me “twon can madit atika[-ni]” nining?

¹⁶ I nge jwero Babilon Madit, kibioto lweny i kom jo pa Jehovah, dok i kare meno wabimito gwok pa Jehovah. Kit macalo meno bibedo bute me agikki me “twon can madit atika[-ni],”Jehovah aye bimoko cawa ma jami magi me aura-ni bitimme iye. (Mat. 24:21; Ejek. 38:2-4) I kare meno, Gog bioto lweny i kom jo pa Jehovah ma “yam gicokogi ki i kin lurok mapatpat.” (Ejek. 38:10-12) Ka meno otimme, Jehovah bilaro jone kun lwenyo i kom Gog kacel dul monnye. Jehovah bimoko twero me locce ki dok bilonyo nyinge, pien en owaco ni: “Abinyuto bot lwak me rok ducu . . . wek gungeya. Man bimiyo gingeyo ni an aye a Rwot [Jehovah].”​—Ejek. 38:18-23.

17, 18. (a) Jo pa Jehovah gibinongo tira ango ka Gog ocako lweny i komgi? (b) Ka wamito ni Jehovah ogwokwa, ngo ma omyero watim?

¹⁷ Ka Gog ocako lweny, Jehovah biwaco ki luticce ni: “Wubin, wun jona, wudony i kicikawu, ka wulor doggola woko; kong wukanne kunnu pi kare mo manoknok, nio wang ma akemo pa Rwot [Jehovah] dong okato.” (Ic. 26:20) I kare meno, Jehovah biminiwa tira ma bilaro kwowa, ki dok ‘kicika’ nen calo cung pi kacokkewa mapat pat.

¹⁸ Ka wamito ni Jehovah ogwokwa i kare me twon can madit atika-ni, omyero waye ni Jehovah tye ki jone i lobo kany i kacokke mapat pat. Omyero wamedde ki bedo kacel kwedgi dok wabed cok ki kacokkewa mapatpat. Calo laco Jabuli, myero walok ki cwinywa ducu ni: “Lar a ki bot Rwot [Jehovah]; mi gummi obed i kom joni!”​—Jab. 3:8.