Tika Itimo Gin ma Lubanga Mito?

“Wacca gin mo keken ma imito, ci abibedo ki yomcwiny me timone.” Itwero bedo ki gung cwiny me waco kodi lok meno bot ngat mo ma pe ingeyo maber. Ento pe itwero bedo ki gung cwiny me wacone bot laremi macok kwedi adada. Lirem ma gicok pol kare gitimo gin ma lawote openyo.

Baibul nyuto ni Jehovah pol kare timo gin ma yomo cwiny jo ma giwore. Me labolle, Kabaka Daudi ma obedo ki wat macok ki Lubanga-ni, owaco ni: “Ai Rwot Lubangana, itiyo tic madito me aura mapol, dok iyubo lwak tam mapol pi konyowa; . . . onongo gibedo pol makato ma pe gitwero kwano welgi.” (Jabuli 40:5) Makato meno, Jehovah bene timo jami mabeco bot jo ma pe gingeye, kun ‘miyo giyeng ki cam, cwinygi bene bedo yom.’​—Tic pa Lukwena 14:17.

Kit macalo Jehovah maro timo jami ma yomo cwiny jo mukene-ni, pore bene ki jo ma gimito bedo lurem Lubanga me timo jami ma ‘yomo cwinye.’ (Carolok 27:11) Ento, wek iyom cwiny Lubanga, gin ango ma myero itim? Baibul gamo ni: “Pe myero wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubanga.” (Jo Ibru 13:16) Tika man te lokke ni timo jami mabeco ki nywako jami ki jo mukene keken aye mitte me yomo cwiny Jehovah?

Baibul waco ni, “Labongo niye pe twerre me yomo cwinye [Lubanga].” (Jo Ibru 11:6) Pire tek me ngeyone ni “Abraim oye Lubanga,” ma oweko “gilwonge ni en larem Lubanga.” (Yakobo 2:23) Yecu Kricito bene otito kit ma pire tek kwede me ‘bedo ki niye i kom Lubanga’ ka wamito bedo ki wat macok kwede. (Jon 14:1) Ngo ma watwero timone me bedo ki niye ma Lubanga mito ki bot jo ma gimito bedo lureme? Itwero cako timo man ki kwano Baibul nino ducu. Ka itimo meno, ci ibibedo ki ‘niang matut i mitine’ ki dok bene ibipwonyo kit me “yomo cwinye maber.” Ka ngec-ci woto ki dongo i kom Jehovah kun bene iketo cikke i tic, niyeni bidongo dok en binyikke cok boti.​—Jo Kolocai 1:9, 10.