Pingo Omyero Wakwan Baibul?

BAIBUL​—TEKWARO MA TYE KAKARE

Eric: Myero awaci ni an pe ladini tutwal. Pi meno, atamo ni wape ki gin me aloka mapol.

Brian: Apwoyo wacca. Ma peya acito mabor, an nyinga Brian. In kono?

Eric: Eric.

Brian: Cwinya yom me rwatte kwedi, Eric.

Eric: An bene.

Brian: Kong apenyi, in idongo i gang ma jone ludini?

Eric: Ee. Ento i kare ma acito i cukul, mitina oa woko ki i lok me dini.

Brian: Aniang. In ikwano gin ango?

Eric: Social studies ki tekwaro. Pi kare malac dong, abedo ki miti madit i lok me tekwaro​—calo kit ma dongo lobo obedo ka timme kwede.

Brian: Lok me tekwaro tugo mitina adada. Twero bedo ni ingeyo ni Baibul obedo buk me tekwaro. Tika dong ikwedo lok i kom Baibul bene?

Eric: Pe. Angeyo gire ni obedo buk maber, ento pe atero Baibul calo buk me tekwaro.

Brian: In inen calo ngat ma tye atera me winyo tam manyen. Ka itye ki dakika mo manok, atwero nyutti labol mogo i kom lok me tekwaro ma tye kakare ma nonge i Baibul.

Eric: Ayela pe. Ento ape ki Baibul.

Brian: Pe ipar. Atwero nyutti ki i mega. Labol me acel tye i 1 Tekwaro cura 29, tyeng 26 ki 27. Tyeng magi waco ni: “Daudi wod pa Yece yam oloyo Icrael ducu kit meno. Obedo ka loyo jo Icrael pi mwaka pyerangwen kulu; obedo ka loc i Kebron pi mwaka abiro, ka dok i Jerucalem pi mwaka pyeradek wiye adek.”

Eric: Labol meno nyuto lok me tekwaro ma tye kakare nining?

Brian: I kare mo mukato angec, jo mogo gubedo ka waco ni Kabaka Daudi pe okwo.

Eric: Ada? Pingo gubedo ki akalakala ma kit meno?

Brian: Mapat ki Baibul, onongo pe tye gin mukene ma nyuto ni en okwo ada. Ento, i 1993, lugol piny gunongo kidi mo macon adada ma kigoro iye lok ma gonye ni “Ot pa Daudi.”

Eric: Ee, onongo pe angeyo lok meno.

Brian: Ngat mukene ma dano gubedo ki akalakala i kome ka okwo ada aye Pontio Pilato, laloc ma oloyo i kare pa Yecu. Kiloko i kome i Luka cura 3, tyeng 1​—i kin ludito gamente mogo me kare ca.

Eric: Ee, aneno. Waco ni: “Pilato onongo loyo Judaya, Kerode onongo loyo Galilaya.”

Brian: Kakare. Pi mwaki mapol, lukwan mogo onongo gitye ki akalakala ka Pontio Pilato okwo ada. Ento, cokcok mwaki 50 mukato angec, kinongo kidi mo ma kigoro iye nyinge i lobo Acia.

Eric: Hmm. Ma naka yam onongo peya awinyo lok meno.

Brian: Cwinya yom me nywakone kwedi.

Eric: I ada, pol kare onongo aworo Baibul, ento atamo ni pe ki gin mo maber piwa i kareni. Twero bedo ni lokke i kom tekwaro tye kakare ento atamo ni konye pe.

BAIBUL​—BUK MACON ENTO PUD TIYO I KARENI

Brian: Dano mapol giye lok meno. Ento an pe aye. Man aye gin mumiyo pe aye: Nicakke wacon, jami ma wamito macalo dano adana peya olokke. Me labolle, wamito cam, bongi, ki dong kabedo. Watye ki miti me lok ki jo mukene ki dok me bedo ki yomcwiny i kwo me ot. Wan ducu mono pe watero jami magi calo pigi tek?

Eric: Kakare.

Brian: Baibul romo konyowa i kabedo magi ducu. Watwero wacone ni obedo buk macon ento pud tiyo wa i kareni.

Eric: Peya aniang lokki.

Brian: Wek aket i yo mukene. Baibul tye ki cik ma igi lac ma pud gitiyo i kareni kit ma onongo gitiyo kwede i kare ma kicoyogi mwaki miya mapol angec.

Eric: Aniang. I kabedo macalo mene?

Brian: Cik ma igi lac twero tirowa ka odok i lok me bedo ki neno mupore i kom cente nyo bedo ki yomcwiny i kwo me ot nyo bedo larem maber. Baibul romo pwonyowa me bedo ki kwo maber. Me labolle, tika iye ni cobo ticci macalo won ot pe yot i kareni?

Eric: Aye lokki-ni. An ki dakona dong warii i nyomwa cokcok pi mwaka acel, ento tele tye i kinwa.

Brian: Ada. Ento Baibul tye ki cik ma igi lac ma tiyo dok lubogi yot. Me labolle, nen Jo Epeco cura 5. Kong wakwan tyeng 22, 23, ki dong 28. Ka imito, iromo kwano tyeng meno.

Eric: Ayela pe. Kwanne ni: “Wun mon wumine kenwu i te loc pa cogwu, macalo wumine kenwu bot Rwot. Pien laco obedo lawi dakone, macalo Kricito en aye lawi lwak muye en, en bene lalargi; gin lwak meno aye kome.” Tyeng me 28 waco ni: “Kit meno, co bene gumar mongi macalo gimaro komgi kengi. Ngat ma maro dakone, maro kome kene.”

Brian: Kakare. Tika pe obedo lok ada ni ka jo munyomme gutemo lubo tira meno ci kwogi me ot bedo maber?

Eric: Ada gire, atamo kumeno. Wacone yot ento timone tek.

Brian: Ki lok ada; wan ducu watye ki roc. I kom lok, cura meno tye ki tyeng mo ma cuko cwinywa me bedo jo ma niang.a I kwo me ot mo keken, neno mupore kacel ki niango mitte i kin jo munyomme. An kacel ki dakona wanongo ni Baibul twero konyowa me bedo ki neno mupore.

Eric: Lokki-ni rwatte.

Brian: Lucaden pa Jehovah gitye ki kabedo me Intanet ma tye ki lok mapol i kom nyom ki kwo me ot. Ka itye ki dakika mo manok, aromo nyutti jami ma tye iye.

Eric: Ayela pe. Atwero jalo dakika mo manok.

Brian: Apwoyo. Kabedowa me intanet-ti kilwongo ni www.pr2711.com/ach. Man aye kacakone.

Eric: Calle gileng ba.

Brian: Cal magi ginyuto kit ma watye ka tiyo kwede ticwa me pwony i twok lobo lung. I wiye malo kicoyo ni “bukke.” I te wi lok meno iromo nongo magajin manyen ki bukke mukene ma nyamo lok mapat pat calo kwo me ot. Me labolle, kong wanen brocuwa me Kwena Maber Mua ki bot Lubanga! Brocuwa man tye ki pwony mo acel ma wi lokke waco ni “Kwo me Ot-ti Twero Bedo me Yomcwiny Nining?”

Eric: Meno obedo lok mamit adada. Amito ngeyo lagamme!

Brian: Pwony man loko i kom jami mogo ma twero konyi me nongo yomcwiny i nyommi. Nen kong paragraf man ma tye i te lapeny me aryo-ni. Iromo kwano lok me agikki-ni, Eric?

Eric: Ayela pe. Kwanne ni: “Co ki mongi myero gunyut mar kacel ki woro i kingi. Kit ma co ki mon ducu gitye ki roc-ci, pwonyo kit me timmo kica aye lagony me nongo yomcwiny i nyom.” Hmm. Aye lok meno.

Brian: Apwoyo kwanone. Jo Epeco 5: :33 tye i kin wang Baibul ma kicoyogi i paragraf man. Atye ki Baibul, amini wek ikwan?

Eric: Pe balo. Kwanne ni: “Laco acel acel i kinwu myero omar dakone macalo maro kome kene, ki dako bene myero onen ni eworo cware.”

Brian: Tika ineno kit ma kiloko kwede i kom miyo gin ma ngat acel acel mito nongone?

Eric: Peya aniang lokki-ni.

Brian: Mono pe obedo lok ada ni laco mito nongo woro ki bot dakone, ki bene dako mito ni cware obed ka nyutte mar?

Eric: Ada. Aye lok meno.

Brian: Ka laco pol kare yenyo yo me nyuto mar bot dakone, ci itamo ni pe bibedo yot pi dakone me nyutte woro?

Eric: Kakare.

Brian: Kadi bed ni tyeng man ma wakwano ki i Baibulli kicoyo cokcok mwaki 2,000 mukato angec, ento pud loko i kom gin ma jo munyomme gimito dok miyo tam ma ka kiketo i tic, ci kelo adwogi maber.

Eric: Ma nyutti Baibul kara tye ki jami mapol ma pe angeyo.

Brian: Cwinya yom me winyo lok meno Eric. Amito rwatte kwedi kany doki wek anong tammi i kom lapeny me adek ma wacci, “Ka yomcwiny pe i nyomwu myero mono ia woko ki bot luoti?” ma bene tye i pwony acel-li i kabedowa me Intanet.b

Eric: Ayela pe. An kacel ki dakona wabingiyo lokke kacel.