LOK MA I POK NGEYE | TIKA IMITO NI KIKWAN BAIBUL KWEDI?

Yub Me Kwano Baibul Pi Dano Ducu

Lucaden pa Jehovah gingene adada pi ticgi me tito kwena i dye lwak. Ento tika onongo i ngeyo ni watye ki yub me kwano Baibul ki dano i twok lobo-ni lung?

Laco ma kitye ka kwano Baibul kwede i gang ticce

I 2014, Lucaden makato 8,000,000 kulu i lobbe 240 gubedo ka kwano Baibul ki dano ma welgi cokcok romo 9, 500,000 dwe ki dwe.a Ada, wel jo ma watye ka kwano Baibul kwedgi kato wel dano ma i lobbe 140!

Wek tic man ocobbe kakare, Lucaden pa Jehovah gigoyo cokcok bilion acel ki nucu Baibul, bukke, magajin, ki dong bukke mukene ma gikonyo me kwano Baibul i leb ma romo 700 mwaka ki mwaka! Tic man me goyo bukke ma pire tek tutwal-li konyo dano mapol wek kikwan Baibul kwedgi i leb ma gimito.

LAGAM PI LAPENY MA POL KARE KIPENYOGI MADOK I KOM YUBWA ME KWANO BAIBUL KI DANO

Yub man me kwano Baibul ki dano-ni woto nining?

Wayero pwony mapat me Baibul dok wanyamo wang Baibul mogo ma giloko i kom pwony meno. Me labolle, Baibul gamo lapeny mogo calo: Lubanga en anga? Kite tye nining? Tika nyinge tye? En bedo kwene? Tika waromo nyikke cok bote? Peko ma tye aye ngeyo ka ma lagam pi lapeny magi gitye iye ki i Baibul.

Me konyo dano wek gunong lagam pi lapeny magi, pol kare watiyo ki buk me Baibul Mono Ada Pwonyo Gin Ango?b ma tye ki pot karatac 224. Buk man kicoyo tutwalle me konyo dano wek guniang pwony ma pigi tego me Baibul. Man kwako lok i kom Lubanga, Yecu Kricito, gin mumiyo dano deno can, nicer, lega ki dong mukene mapol.

Kwene ki dok awene ma kwan man romo timme iye?

Kwan man romo bedo i cawa kacel ki kabedo ma itamo ni opore kwedi.

Kwan man ri pi cawa ma rom mene?

Dano mapol gikwanyo cawa acel nyo makato cabit ki cabit wek kikwan Baibul kwedgi. Ento kwanne romo tero cawa manok nyo malac. Wakwano kwedi i cawa ma pe balo yubbi. Jo mukene gikwano pi dakika 10 nyo 15 i cabit ki cabit.

Culle tye ciling adi?

Kwan man kacel ki bukke ma watiyo kwedgi gitye me nono. Man rwatte ki lok ma Yecu owaco bot lupwonyene ni: “Wun wugamo nono labongo cul mo, wumi bene nono labongo cul mo.”—Matayo 10:8.

Tero kare ma rom mene?

Kiromo kwan kwedi nio ka dong pe imito. Buk me Baibul Mono Ada Pwonyo Gin Ango? tye ki dul 19. Itwero kwano dul mo keken nyo ducu i cipid ma imito.

Tika mitte ni adok Lacaden pa Jehovah?

Pe. Wangeyo ni ngat acel acel tye ki twero me yero gin ma en myero ebed ki niye iye. Ento, dano ma giniang pwony ma pigi tego me Baibul giromo moko tamgi me kwano Baibul.

Atwero nongo ngec mukene mapol kikwene?

Kabedowa me Intanet me jw.org miyo ngec matir madok i kom niye kacel ki tic pa Lucaden pa Jehovah.

Aromo penyo pi kwano Baibul nining?

Peny ki i www.jw.org/ach.
Coo kun itiyo ki adrec ma kiketo i pot karatac 2 i magajin man.
Peny Lucaden pa Jehovah ma gibedo cok kwedi.

a Pol kare kikwano Baibul ki ngat acel acel nyo gurup matinotino.

b Lucaden pa Jehovah aye gucoyo. Buk man kigoyo kopi makato milion 230 dok i leb makato 260 kulu.

KONY PI JO ME OT

“I kare ma dakona ocako kwano Baibul, aneno alokaloka mapol mabeco i kwone. Kwo me otwa oyubbe maber adada. An bene acako kwano Baibul pien onongo amito ngeyo gin ma dakona tye ka kwanone. Jami ma apwonyogi okonya me yubo kita. Kwano Baibul onyiko lupacowa kacel.”—Eziquiel.

“I kare ma acako kwano Baibul, aweko tic ki yadi mogo calo jayi, mero, dok bene apwonyo kit me juko akemona. Otwa dong leng dok jami ma iye ducu tye maber. Atye ki pwoc madit i kom jo me pacona dok bene atimo jami ma keligi yomcwiny. Kombeddi-ni cwinya yom adada.”—Karen.

“Jo mogo gubedo ka caya pi kwano Baibul. Ento cwara obedo ka cuko cwinya kun wacci: ‘Gin ma dano giwaco-ni konye pe. Neno alokaloka ma itimo i kwoni yomo cwinya. Medde ki timo gin ma itye ka timone.’ Kwo me otwa onongo pe ber kuman!”—Viniana.