LAPENY MA KIGAMO ME BAIBUL

Nino me ngolokop obedo nino ango?

I kare me Baibul, Lubanga otiyo ki lungolkop me laro jone ki i cing lutim maraco. (Lungolkop 2:18) Baibul waco ni Nino me Ngolokop ma tye ka bino-ni obedo kare me yomcwiny ma nongo Jehovah, Langolkop ma loyo lobo bilaro dano ki i jami maraco.​—Kwan Jabuli 96:12, 13; Icaya 26:9.

Lubanga ocimo Yecu me ngolokop i wi jo makwo ki muto. (Tic pa Lukwena 10:42; 17:31) Dano mapol guto ma pe gupwonyo lok i kom Lubanga. I kare me Ngolokop, Yecu bicero jo magi wek gupwony lok i kom Lubanga dok gumarre.​—Kwan Tic pa Lukwena 24:15.

Pingo Nino me Ngolokop birii pi mwaki alip acel kulu?

Jo muto kibicerogi i kare me mwaka alip acel. (Niyabo 20:4, 12) Mitte ni omyero kiminigi kare wek gupwony gin ma Lubanga mito dok guwiny doge. Mapat ki gin ma dano gitamo, Baibul waco ni kibingolokop i wi dano ma lubbe ki gin ma gutimo i nge cerogi.​—Kwan Jo Roma 6:7.

Baibul bene loko i kom nino me ngolokop ma bitimme atura ma nongo mwaka alip acel peya oromo. Nino meno kilwongo ni agikki piny, kit ma kinyamo kwede i acikki me magajin man. I nino meno, Lubanga bityeko jo maraco. (2 Petero 3:7) Pi meno, pire tek ni omyero wanyut marwa pi Lubanga.​—Kwan 2 Petero 3:9, 13.