LAPENY MA KIGAMO ME BAIBUL
Kwo mono dong ducu kite ene?
Tika i kine mukene watamo ni kwo cek tutwal?
Tika dong nino mo ipenye ka ce tye tyen lok mukene me kwo mapat ki tuku, tic, nyom, pito lutino, ki dong tii? (Yubu 14:1, 2) Baibul wacci jo ma giryek bene gipenye ki lapeny man.—Kwan Latitlok 2:11.
Kwo mono dong kite ene? Mukwongo, omyero kong wapenye ni, Kwo mono ocakke nining? I nge ngiyo matut kit ma adam wiwa ki komwa kicweyo kwede i yo me aura, man omiyo dano mapol giye labongo akalakala ni tye Ngat mo ma ocweyowa. (Kwan Jabuli 139:14.) Ka tye kumeno, ci nongo tye tyen lok mumiyo en ocweyowa! Pwonyo tyen lok meno yubo kwowa bedo maber.
Pingo mono kicweyo dano?
Lubanga ogoyo laa i kom lunyodowa mukwongo kun minigi tic ma keligi yomcwiny. Yubbe pigi onongo tye ni gunya gupong lobo, gulok odok paradic dok gukwo pi naka.—Kwan Acakki 1:28, 31.
Yub pa Lubanga pe ocobbe oyotoyot pien dano gukwero locce. Ento Lubanga pe okwerowa, dok bene pe oloko yubbe pi dano kacel ki lobo. Baibul wacciwa ni Lubanga tye ka tic matek me laro jo ma lugen ki dok ni meno yubbe pi lobo wang ma ocobbe! Pi meno, Lubanga mito ni inong mit pa kwo ma lubbe ki kit ma onongo emito kwede! (Kwan Jabuli 37:29.) Pwony kit ma iromo nongo kwede adwogi maber ki i yub pa Lubanga kit ma tye kwede i Baibul.