Nongo Kony ka Imito Niang Baibul

Go kong ni icito ka limo lobo mukene pi tyen me acel. Ci inongo dano gitye ki tekwaro, cam, ki jami mukene ma pe ingeyogi. Labongo akalakala, man biweko pe ibedo agonya.

Itwero bene winyo kit meno ka pud ikwano Baibul pi tyen me acel. Icako neno jami mogo me kare macon giwelo adada i wangi. I kwanni ibinongo kaka mo ma kilwongogi ni Lupiliciti, inongo bene tekwaro mogo calo ‘yeco ginaruka,’ nyo ipwonyo pi cam mogo ma kilwongo ni manna. (Nia 16:31; Yocwa 13:2; 2 Camuel 3:31) Jami magi ducu twero nyweno wi. Calo kit ma timme kwede ka icito ka limo lobo mukene-ni, tika pe ibiyenyo kony ki bot ngat mo ma twero tito jami magi boti?

KONY I KARE MACON

I kare ma kikwongo coyo iye ginacoya i cencwari me 16.K.M.P., kibedo ka miyo kony bot dano me niang ginacoya. Me labolle, Moses ma obedo latela mukwongo i Icrael “omine pi gonyo te cik” ma onongo kicoyo.—Nwoyo Cik 1:5.

Lupwonye mucwiny me Ginacoya onongo pud gitye i nge mwaki ma romo 1000. I 455.K.M.P., gurup pa Lujudaya ma i kine onongo tye iye lutino gucokke kacel i gang me Jerucalem. Lupwonye me Baibul “gukwano lok me cik nia ki i buk[maleng.]” Ento gutimo jami mapol makato meno. “Gugonyo te lokke matir bot lwak, wek guniang lok ma gikwano.”—Nekemia 8:1-8.

I nge mwaki 500, Yecu Kricito bene onywako i tic me pwony acel-li. Ki lok ada, en onongo kingeye macalo lapwony. (Jon 13:13) En opwonyo lwak ma onongo gugure mapol ki bene opwonyo dano ki acel acel. I nino mo acel, en omiyo pwony mo mucwiny adada bot lwak mapol, ma kilwongo ni Pwonye me Wigot dok “lwak guuro kit pwonnye matek.” (Matayo 5:1, 2; 7:28) I 33 K.M., Yecu oloko ki lupwonnyene aryo i kare ma onongo gitye ka wot i dye gudo me cito i Jerucalem, dok en ‘oyabbigi [otittigi] ki i Ginacoya’.—Luka 24:13-15, 27, 32.

Lupwonnye pa Yecu bene onongo gubedo lupwonye me Lok pa Lubanga. I nino mo acel, Laetiopia mo onongo tye ka kwano Ginacoya ki dwan malongo. Lakwena mo ma kilwongo ni Pilipo odire cok ka openyo laco ni: “In iniang lok ma ikwano-ni?” Laetiopia ni ogamo ni: “Aniang nining kono, ka ngat mo pe okonya?” Pilipo ocako tite ngo ma Ginacoya waco wek oniang.—Tic pa Lukwena 8:27-35.

KONY TYE NONGE I KARENI

Calo lupwonye i kare me Baibul, Lucaden pa Jehovah bene i kareni gitye ka pwonyo dano ki Baibul i lobbe ma romo 239 kulu. (Matayo 28:19, 20) Cabit ki cabit gitye ka konyo dano ma kato milion abongwen kulu me niang Baibul. Pol pa jo magi ma kitye ka kwano Baibul kwedgi ni gia ki i paco ma jone pe gitye Lukricitayo. Pe tye cul mo keken pi kwan magi dok bene kitwero timone ki ka mo keken ma latin kwan nongo ni opore. Jo mogo bene kikwano kwedgi kun nongo kitiyo, vidio, nyo kompiuta.

Wakwayi ni ibed agonya me penyo Lacaden pa Jehovah mo keken ka imito nongo ngec i kit ma itwero nongo adwogi maber ki i yub man. Ibinongo ni meno kare Baibul obedo buk mo ma niang iye yot adada, dok twero “konyo me pwony, me juko dano, me tiro kit pa dano, me nyebo dano wek gulub kit ma atir,” wek ‘gubed muteggi, ma bene guyubbe i yo ducu, ma giromo tiyo kit tic mo maber ducu.’—2 Temceo 3:16, 17.