LOK MA I POK NGEYE | PINGO MYERO WATIM GIN MATIR?
Kit ma Gin ma Pe Atir Gudo In Kwede
“Tye pekki mogo matego adada ma gitwero bino, ento watwero cobogi ka watimo gin ma pe atir manok.”—Samantha , South Africa.
Tika iye lok meno? Calo Samantha, wan ducu olo to dong wakato ki i kwo mo matek. Kit ma wadok kwede i atematema magi binyuto ka watero timo gin matir calo gin ma pire tek. Me labolle, ka gengo ngewa pi lewic pire tek loyo, ci wabineno timo jami maraco calo gin ma mitte. Ento ka lokke ongene bot jo mukene, pol adwogine bedo marac. Nen kong jami magi.
TIMO GIN MA PE ATIR TURO GEN WOKO
Wat maber cung i kom gen. Ka jo aryo gigenne i kingi, gibedo agonya. Ento bedo ki gen muromo i kom ngat moni dongo motmot. Dano gicako geno luwotgi ka gicwalo cawa kacel, giloko lok ada dok ginywako jami kacel. Ngat moni twero rwenyo gen ma tye kwede i kom lawote kadi ka otimo gin marac kicel keken. Dok ka meno otimme, tek tutwal dok me cako geno ngat moni.
Tika ngat mo ma itamo ni obedo laremi macok dong obwoli? Ka meno otimme, ci iwinyo nining? Labongo akalakala mo, cwinyi otur adada. Meno niange gire. Tye lok ada ni timo jami ma pe tye atir twero balo wat maber ma tye i kin dano.
TIMO GIN MA PE ATIR NYAYO KIT MA PE ATIR
Kwed mo ma Robert Innes ma pwonyo lok i kom cat ki wil i univaciti me California onongo ni, “Cwiny me timo gin ma pe atir-ni kobo.” Pi meno, kitwero porone ki two ma kobo—ka ibedo ki ngat ma lagoba in bene idoko lagoba, dok bedo yot adada ki in me cako lubo kit me gobane-ni.
Itwero gwokke ki i timo gin ma pe tye atir nining? Baibul twero konyi. Tim ber inen cik mogo ma iye lac me Baibul.