Gin Mumiyo Baibul Obwot

Baibul obwot. Macalo adwogine, pud itwero nongo kopi acel ci ikwano wa i kare-ni. Dok ka iyero Ginacoya ma kigonyo maber, ci itwero bedo labongo akalakala mo keken ni itye ka kwano kopi me Baibul ma kikwongo coyone.a Ento pingo Baibul obwot pe obale, obwot ki icing lumone, dok pe kiloko kwena ma iye kadi bed ni jo mogo gutemme me loko lok ma tye iye woko? Gin ango ma weko buk man dok pat adada?

Lutino kwan mapol me Baibul dong gutyeko moko lok acel calo lakwena Paulo ma ocoyo ni: “Ginacoya ducu ma yam gicoyo, gicoyo pi teko pa cwiny pa Lubanga.” (2 Temceo 3:16) Giye ni Baibul obwot pien obedo Lok pa Lubanga ki dok pien Lubanga kikome aye obedo ka gwoko nio watin. Faizal, ngat ma waloko i kome i pwony me acel-li lacen omoko tamme me kwano Baibul wek ekwed pire kene ka ce lok ma kiwaco-ni obedo lok ada. Gin ma en onongo obedo me ur adada bote. Ma peya otero kare malac i kwanne, en oniang ni kara pwony mapol ma onya i kin dini pa Lukricitayo ata-ni pe tye i Baibul. Lacen, yub ma Lubanga tye kwede pi lobo kit ma tye kwede i Lokke ogudo cwinye adada.

En owaco ni: “Dong aye ada ni Baibul ma atye kwede-ni obedo mic mua ki bot Lubanga.” Dok omedde ni: “Ka Lubanga twero cweyo polo ki lobo, ci En pe bibedo ki teko me miniwa buk ki dok me gwokone? Me wacone ni pe twero, nyuto ni watye ka dwoko tekone piny. Me dwoko teko pa Won Twer Ducu piny​—an anga me timo meno?”​—Icaya 40:8.