Mic mo ma Lapore Pe

JORDAN onongo tye ki layet leb kalam ma kiyubo i cal meli, kadi bed onongo pe mwonya. Ento tye i kin jami ma pigi tek bote. Jordan otito ni, “Ladit mo ma larem jo gangwa, ma nyinge Russell aye omiya i kare ma pud atidi.” I nge to pa Russell, Jordan oniang ni Russell otimo gin mo ma pire tek i kwo pa kwaro Jordan ki lunyodone, kun cuko cwinygi me bedo ki tekcwiny i kare ma kwo tek. Jordan owaco ni, “Kit ma dong apwonyo lok mapol i kom Russell, mic matidi man odoko gin ma pire tek adada bota.”

Kit ma otimme kwede i kom Jordan, mic moni romo nen calo gin ma konye pe bot jo mukene. Ento ngat ma tye ki pwoc iye, twero nenone calo gin ma pire tek. Baibul loko i kom mic mo ma welle dit adada kit man: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”—Jon 3:16.

Mic mo ma twero kelo kwo ma pe tum bot ngat ma kimine! Tika tye mic mo madit loyo meno? Kadi bed jo mukene pe giniang kit ma mic meno pire tek kwede, Lukricitayo me ada gitero calo gin ma “welle dit mada.” (Jabuli 49:8; 1 Petero 1:18, 19) Ento, pingo Lubanga omiyo kwo pa Wode macalo mic pi jo me lobo?

Lakwena Paulo otito tyen lokke ni: “Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu.” (Jo Roma 5:12) Laco mukwongo, Adam, otimo bal kun turo cik pa Lubanga akaka ci man okele to. Pi bal pa Adam, to obino i kom likwayone ducu—dano me lobo ducu.

“Mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.” (Jo Roma 6:23) Me gonyo dano ki i pwod me to, Lubanga ocwalo Wode, Yecu Kricito me miyo kwone ma roc pe iye pi jo me lobo. Pi gitye man ma kilwongo ni ‘ginkok,’ oweko jo ducu ma gitye ki niye i kom Kricito gitwero nongo kwo ma pe tum.—Jo Roma 3:24.

Ma lubbe ki mot ducu ma Lubanga miyo bot jo ma wore kun wok ki bot Yecu Kricito, Paulo owacci: “Gipwo Lubanga pi motte maber ma pe wacce.” (2 Jo Korint 9:15) Ada, mic me ginkok obedo gin mo me aura adada ma pe watwero titone ki pete tere ducu. Ento i kin mic me kica ma Lubanga omiyo bot dano, pingo ginkok aye pud dong obedo mic ma pire tek loyo? Ngo ma miyo mic man dok pat ki mic mukene-ni ducu?a Dok omyero wadok iye nining? Wakwayi me kwano lagam ma Baibul miyo i kom lapeny magi i pwony aryo ma lubo man.