LOK MA I POK NGEYE | TIKA IBIJOLO MIC MADIT LOYO DUCU PA LUBANGA?
Ibidok i Mic Madit Loyo Ducu pa Lubanga Nining?
“Mar pa Kricito loyo kwowa . . . En yam oto pi dano ducu, wek jo makwo pe gumedde ki bedo kwo pigi kengi, ento gubed ki kwo pi ngat ma yam oto ka ocer pigi ca.”—2 Jo Korint 5:14, 15.
MIC mo madit myero otug cwinywa me nyuto pwoc. Yecu omiyo pwony man i nge cango co apar ma onongo gitye ki two mo marac adada ma pe cang. Laco acel i kin gin apar-ri “odwogo cen kun pako Lubanga ki dwan malongo.” Yecu owaco ni: “Yam pe gilonyo dano apar? Jo abongwen kono gitye kwene?” (Luka 17:12-17) Pwonyo ango wanongo? Wiwa twero wil woko oyotoyot i kom kica ma jo mukene gunyuto botwa!
Mic me ginkok pe kitwero porone ki mic mo keken. Obedo mic ma pud dong ber loyo ma kimiyo. Ci dong, myero idok i gin ma Lubanga otimo piri nining?
Nge Lami mic man. Pe dong tye ni dano ducu gibinongo kwo ma pe tum pi ginkok-ki labongo timo gin mo. Ma ka meno, Yecu olego bot Lubanga ni: ‘Man en kwo ma pe tum, ni ginge in Lubanga acel me ada, ki Yecu Kricito ma yam ioro.’ (Jon 17:3) Ka ce ngati mo owacci ni laco mo olaro kwoni i kare ma onongo pud itidi, pe ibibedo ki miti me ngeyo laco meno, ki tyen lok mumiyo en olari? Lubanga Jehovah, ma omiyo mic me ginkok ma olaro kwowa-ni pe mito ni inge en keken ento bene ibed ki wat macok kwede. Baibul cuko cwinywa ni “Wunyik cok bot Lubanga, ci en bene binyiko cok botwu.”—Yakobo 4:8.
Bed ki niye i kom ginkok. “Dano ma ye Wod tye ki kwo ma pe tum.” (Jon 3:36) Bedo ki niye te lokke ngo? Man mito tic; me bedo ki niye i kom ginkok myero watim gin mo olo to. (Yakobo 2:17) Tic ango ma mitte? Mic moni doko megi ka ijolo. Pi meno, omyero ijol ginkok-ki. I yo ma nining? Pwony kit ma Lubanga mito ni ikwo kwede ci ilubi.a Leg bot Lubanga wek otimmi kica dok ibed ma cwinyi pe pidi. Ka inyuto niye i kom ginkok, ci ibibedo ki gen me nongo kuc, gwok maber, yomcwiny, ki dong kwo ma pe tum!—Jo Ibru 11:1.
Bed tye i Nipo me to pa Yecu. Yecu ocako kwer mo ma timme mwaka ki mwaka me poyo wiwa i kom mic me ginkok. Ma lubbe ki kwero nino man ma pire tek-ki, en owacci: “Wutim kuman me po pira.” (Luka 22:19) Lucaden pa Jehovah gibikwero nipo me to pa Yecu i Ceng Aryo, April 11, 2017, i nge poto ceng. Yub man ma tero cawa acel-li, bibedo ki pwony ma tito gin mumiyo to pa Yecu pire tek ki dok adwogi maber ma watwero nongone i kare-ni ki i anyim. Mwaka mukato-ni, dano ma romo milion 20 i twok lobo lung gubedo tye i Nipo. Ki yomcwiny madit walwongi me ribbe kwedwa i nyuto pwoc pi mic madit loyo pa Lubanga.
a Yo maber loyo me ngeyo Lubanga ki me nyikke cok bote aye me kwano Baibul. Peny Lacaden pa Jehovah mo nyo cit i kabedowa me intanet me www.jw.org/ach wek iniang kit ma itwero timo kwede man.