Lok pa Lunebi ma Ocobbe Kakare

I pwony mukato-ni, waneno kit ma goba pa ajwaka me Delphi obwolo kwede kabaka Croesus ma oweko kabaka Ciro me Percia oloye kwede i lweny. Baibul ki tungcel, tye ki lok pa lunebi ma ocobbe kakare i kom kabaka me Percia.

Mwaki 200 ma peya kinywalo Ciro, lanebi Icaya otito kore ki kore kit ma Ciro onongo bituro kwede ker me Babilon dok otucu wa nying Ciro kikome bene.

Icaya 44:24, 27, 28: Jehovah owaco “kuman ni, . . . ‘Aciko pii ma i nam matut ki ma i kulu ducu ni myero odwon woko, ci pii bene odwono woko. Awaco bot Ciro ni en bibedo laloc ma kakara, ni en bitiyo gin ma amito ni otine; en bimiyo gigero Jerucalem, dok bimiyo giketo te guti ot me wora.’”

Ma lubbe ki lok pa Herodotus, ma laco lok me tekwaro pa Grik, Ciro ki dul monnye gukwinyo yo pii manyen wek kulu Euprate ma onongo mol kato ki i Babilon odwon woko. Diro pa Ciro-ni oweko monnye gudonyo i Babilon kun giwoto awota i dye kulu man. I nge turo Babilon, Ciro ogonyo Lujudaya wek gudok cen ka gero Jerucalem ma onongo kituro mwaki 70 angec.

Icaya 45:1: “Rwot [Jehovah] owaco ni, Ciro dong odoko kabaka ma dong atyeko wirone ki moo, amako cinge ma lacuc aketo en me loyo rok mapol, acwale wek ocit otur teko pa luker woko, atye ka yabo nyime ma pe dok biumme.”

Lumony me Percia gudonyo ki i doggola malac ma donyo i boma meno, pien Lubabilon onongo wigi owil guweko twolo. Ka onongo Lubabilon gungeyo tam pa Ciro, kono gupungo dog cel ducu ma yabbe i dog kulu-ni. Ento kit ma wangeyo kwede, dog cel me boma odong mere niyak.

Lok pa lanebi man tye i kin mukene mapol ma gucobbe kore ki kore kit ma kicoyo kwede i Baibul.a Pe calo byeka pa dano, ma polle gipwoyo iye jogigi, lok pa lunebi me Baibul a ki bot Ngat ma owaco ni, “Cakke con i acakki piny, anyuto kit ma gin man bitimme kwede woko, ki kit ma bigik kwede bene.”​—Icaya 46:10.

Lubanga me ada keken, ma nyinge Jehovah aye twero tito lok ma kit meno. Nying meno gonye ni “En Miyo Timme.” Meno nyuto ni en twero ngeyo anyim dok twero weko jami timme kit ma en mito kwede, wek ocob mitine. Man miniwa gen ni Lubanga bicobo cikkene ducu.

LOK PA LUNEBI MA TYE KA COBBE I KARE-NI

Tika imito ngeyo ngo ma lok pa lunebi waco ma dok i kom karewa-ni? Mwaki 2000 angec, Baibul otito ni “i kare me agikki, piny bibedo marac.” Agikki me ngo? Agikki man pat ki agikki pa dano nyo me lobo, ento agikki me tim gero, diyo dano, ki deno can ma dong oromo wan dano pi mwaki alip mapol. Kong dong wanenu lok pa lunebi mogo ma nyuto ni man “kare me agikki.”

2 Temceo 3:1-5: “I kare me agikki . . . , dano bibedo ka maro komgi kengi, kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leng. Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubanga. Gibimako dini dok gibilubo i kitgi ma nen ki woko keken, kun gikwero tekone woko.”

Tika iye ni jo ma kitgi tye kuman gitye ka medde ameda i kare-ni? Tika dong ineno ni pol pa dano ma orumowa gubedo jo ma maro komgi keken, lumar lim, dok gin luwakke? Tika dong ineno ni pol pa dano gimaro pyem dok pe giye winyo lok pa jo mukene? Labongo akalakala mo, in dong ineno ni lutino pe giwinyo lok pa lunyodogi dok pol pa dano gimaro yomcwiny keken makato Lubanga. Kwo bene tye ka medde ki doko tek nino ki nino.

Matayo 24:6, 7: “Wubiwinyo pi mony, ki lok ma yweko pi mony. . . . Rok bilweny ki rok wadi, ki ker bene bilweny ki ker wadi.”

Kwed mukene wacci wel dano ma dong oto i lweny nicakke i mwaka 1914 tye makato milion 100, wel man kato wel dano me lobe mapol. Tam kong i kom cwercwiny, koko ki deno can ma wel man nyuto. Tika dano dong onongo pwony, dok gugiko lweny?

Matayo 24:7: “Kec bene bipoto i lobo.”

Dul me World Food Programme owacci: “Kadi kono bedi ni watye ka puru cam ma romo pito dano ducu ma i lobo, pud dano ma welgi romo milion 815 kulu gibuto kec nino ducu. Wel man rom ki waco ni dano acel i kin abongwen ma gitye i lobo-ni buto kec. Dok bene dano acel i kin jo adek tye ki two neto.” Kiwaco ni lutino ma romo milion adek gito mwaka ki mwaka macalo adwogi me kec.

Luka 21:11: “Oyengyeng madongo biyengo lobo.”

Mwaka ki mwaka, oyengyeng 50,000 ma romo yengo dano timme. Ma romo 100 balo odi mapol, dok acel ma yengo piny marac adada timme mwaka ki mwaka. Ma lubbe ki kwed mo acel, i kine ka mwaka 1975 me o i mwaka 2000, oyengyeng oneko dano ma romo 471,000 kulu.

Matayo 24:14: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”

Lucaden pa Jehovah makato milion aboro, gitye ka tito kwena maber me ker pa Lubanga wek obed caden i wi lobo ducu, dok i lobe ma romo 240 kulu. Gitye ka tito kwena maber-ri i taun madongo, i caro matino, ki bot jo ma gibedo i bunga ki i wi godi bene. Lok pa lunebi man nyuto ni, ka dong kitito kwena oromo wi lobo ma lubbe ki miti pa Lubanga, ci “agikki piny bibino.” Meno tyen lokke ngo? Tyen lokke aye ni loc pa dano dong bigik woko ci ker pa Lubanga bicako loc. Cikke mene ma bicobbe i te loc me ker pa Lubanga? Medde ki kwan wek inong lagamme.