Anga ma Omyero Wakok i Kome?

Ka Lubanga aye ma pe kelo peko i komwa, ci pekki calo kec, can, lweny, two, ki can ma poto atura a ki kwene? Baibul nyutiwa tyen lok adek ma oweko peko tye i lobo:

1. Woro ki Adage. “Dano ma tye ki twero loyo jo mukene ki tek.” (Latitlok 8:9) Pol pa dano gideno can macalo adwogi me tim maraco pa jo ma giwor nyo giger.

2. Kare Kacel ki Jami ma Gitimme Atura. Dano deno can pien “kare kacel ki jami ma timme atura poto i komgi ducu.” (Latitlok 9:11, NW) Meno tyen lokke ni, ngat moni tye i kabedo marac i cawa marac ma nongo can ma poto atura tye ka timme, nyo ngat ma pe paro pi dano otimo gin mo marac nyo ka ngat mo cinge ocer.

3. Larac ma Tye ka Loyo Lobo-ni. Baibul waco ni: “Lobo ducu tye i te loc pa Larac.” (1 Jon 5:19) “Larac” meno en aye Catan, ma obedo cwec me cwiny mo me rwom mamalo, ma yam obedo malaika pa Lubanga ento ‘pe ocung i ada.’ (Jon 8:44) Cwec me cwiny mukene bene guribbe ki Catan i jemo i kom Lubanga pien onongo gimito cobo mitigi kekengi, ma man oweko gudoko jogi. (Acakki 6:1-5) Nicakke i kare ma gujemo, Catan kacel ki jogine gitye ka doro loboni ki tek dok ki gero. Man dong onen tutwalle i karewa-ni. Kombeddi, Larac-ci tye ki akemo madwong dok en “labwol dano ma i wi lobo ducu,” ma man okelo “can malit atika” i wi lobo. (Niyabo 12:9, 12) Ki lok ada Catan obedo laloc aconya. En nongo yomcwiny ka dano deno can. Catan aye ma kelo peko i kom dano​—ento pe Lubanga.

TAM KONG: Ngat ma cwinye col aye ma kelo peko nyo can i kom jo ma balgi pe. Ki tungcel, Baibul waco ni: “Lubanga aye mar.” (1 Jon 4:8) Ma rwatte ki kite me mar, “Lubanga pe twero timo gin marac kadi ki acel. Won Twer Ducu pe timo gin mo ma pe tye atir!”​—Yubu 34:10.

Ento macalo dano adana watwero penye ni ‘Lubanga Won twer ducu mono biweko Catan medde ki loc pi kare ma rom mene?’ Kit ma waneno kwede, Lubanga dag tim maraco, dok bene pekkiwa cwero cwinye adada. Medo i kom meno, Lokke cuko cwinywa ni: “Wuket parwu ducu i kome, pien en tamo [paro] piwu.” (1 Petero 5:7) Lubanga bikwanyo pekki kacel ki tim me ngolo kop alenga ducu pien en marowa dok tye ki teko. Wabineno lok meno i pwony ma lubo man.a