Yub pi Jo me Ot—Kwan Kacel Macalo Jo me Ot
1 Mot madit loyo ma in macalo lanyodo ma obedo Lakricitayo itwero nywakone ki latinni aye marri pi Jehovah. Kit me timone maber twero bedo i kare ma nongo “wubedo i odiwu” pi kwano Baibul kacel macalo jo me ot ma bedo cabit ki cabit. (Nwo. 6:5-7) Kadi ka wutye i niye acel, nyo diniwu opokke woko wun ki luoti, nyo ibedo lanyodo ma itye keni i ot, pud itwero konyo lutinoni wek gubedo ki wat macok kwedi ki Jehovah ka ibedo ki yub me kwan kacel macalo jo me ot kare ducu.
2 Cako Kwan Kacel Macalo Jo me Ot: Gin mukwongo ma myero itim aye me cako kwan kacel macalo jo me ot. Ka pe ingeyo kare maber ma rwatte pi kwan man, pingo pe wunyam lokke macalo jo me ot? (Car. 15:22) Ka itye ki lutino ma tino, iromo kwan kwedgi pi cawa manok nok ento tyen mapol i cabit acel acel. Nen kit me yub ma rwatte maber pi jo me oti. Ket cawa me yub me kwan pa jo me oti obed tye, ci iket cwinyi me lubone.
3 Gin ango ma wuromo kwanone? Jo mukene gikwano kun giyubo gin ma nongo gibikwano i Cokke me Kwano Buk nyo Kwan me Watchtower. Jo mukene gikwano pwony ma kiyubo tutwalle pi jo matino. Won latin awobi ki anyaka mo owaco ni: “Gin acel ma lutino gimaro ki i kwanwa i cabit ducu aye poro jami calo goga ma tye i Bukka me Ododo me Baibul. Niang maber aye obedo gin ma pire dit kato wel paragraf ma wakwano.”
4 Kwan i Cabit Ducu: Kwan kacel macalo jo me ot omyero kitim kare ducu labongo keng, dok i nino meno jo ducu me ot omyero gubed ma guyubbe pire ki yomcwiny. Loko nino ki cawa kare mogo omyero obed tye wek omi kare me neno kit me tero jami mukene ma bino atura. Kare mukene bene ka mitte ci kiromo loko gin ma nongo myero kikwan woko. Ento kit alokaloka mo keken pe dok omyero otang wi dano woko ki kom yub pa jo me ot macon-ni pi kare malac. I paco mo acel, anyaka acel owaco ni: “Ka kiloko cawa me kwanwa, Abaa kare ducu keto cawa manyen-ni i dogola me firij wek wan ducu wange cawa ma dong kibikwano iye kwan.” Yelle ma kit meno pud dong ber pi gwoko cawa me kwan kare ducu ya! Ka wupwonyo lutinowu “dok wunyebogi ki kit mabeco ma Rwot pwoyo,” ci nongo wutye ka nyuto marwu i komgi kacel ki i kom Wonwa me polo.—Ep. 6:4.