GWOK MABER
Kwano Baibul ki Lutino Kwan i Yo ma Weko Gidongo
I karatac man ma kiluto i iye-ni, kiketo iye pwony mogo ma pigi tego ma obedo kabino i Ticwa Me Ker i kom kwano Baibul ki lutino kwan i yo ma weko gidongo. Kicuko cwiny jo ducu me gwoko karatac man maber dok me tic kwede bene ka gitye ka kwano Baibul ki dano. Medo i kom meno, lok ma pigi tego magi kiromo tic kwedgi i cokke me cito ka pwony dok lunen wi tic me pwony bene giromo tic kwedgi me miyo pwony ka gucito ka limo gurup me cokke me kwano buk.
Bute me 1: Kwano Baibul ki Dano Obedo Gin Ango?
Ka tye dano mo ma wunyamo kwede lok me Baibul kare ki kare kadi pi cawa manok kun nongo wutiyo ki Baibul nyo buk mukene mapat ma kinyuto ni myero kitii kwede me pwony, ci meno nongo itye ka kwano Baibul ki dano. Itwero bene keto en i ripot ma megi i yo nge kwan kwede tyen aryo ma nongo dong inyutte kit me kwan, dok bene ka igeno ni en bimedde ki kwan.—km 7/04 pot 1.
Bukke ma Kinyuto pi Tic me Pwony
◼ Ngo ma Lubanga Mito ki Botwa?
◼ Ngec Ma Terowa i Kwo ma Pe Tum
◼ Wor Lubanga Acel me Ada
◼ Itwero Bedo Larem Lubanga! kiromo tic kwede me kwan ki jo ma rwom me kwangi tye piny nyo ma pe gingeyo kwan maber.
Bute me 2: Yubbe me Cito ka Kwan ki Latin Kwan
Myero wapwony pwonywa i yo ma gudo cwiny latin kwan. Man mitte ni omyero wayubbe maber kun nongo watamo pi miti pa latin kwan moni-ni.—km 8/04 pot 1.
Kit me Yubbe
◼ Ngi kong wi lok madit ki matino, ki cal ma tye i dul nyo i pwony meno.
◼ Nong lagam me lapeny ma tye iye, kun nongo ingolo te lok ma pigi tego ma imito.
◼ Yer ginacoya ma imito ni myero wukwan i kare me kwanwu. Itwero coyo jami mogo macek i nget buk ma itiyo kwede me pwony.
◼ Yub lok mogo ma pigi tego ma wuromo nwoyone i yo nge kwan. Yub Pwonye ma Rwatte ki Miti pa Latin Kwan
◼ Leg pi latin kwan man.
◼ Temme me tamo woko con lok ma itamo ni latin kwan man pe bitwero niang iye nyo pe biye.
◼ Tam kong: Ngo ma myero en oniang nyo otim wek en odong i yo me cwiny? An atwero gudo cwinye nining?
◼ Mitte bene ni omyero iyub labol, kit me tito lok, ki lapeny mapol wek okony latin kwan-ni me niang lok nyo ginacoya moni-ni maber.
Bute me 3: Tic ki Ginacoya Maber
Gin ma miyo wakwano Baibul ki dano obedo me ‘lokogi wek gudok lulub Yecu’ kun nongo wakonyogi me niang ki dok me ye pwony me Lok pa Lubanga kacel ki ketone i tic i kwogi. (Mat. 28:19, 20; 1 Tec. 2:13) Pi meno kwanwu-ni omyero ocung i Ginacoya.—km 11/04 pot 4. Pwony Gin ma Tye i Lok pa Lubanga
◼ Nyut ki latin kwan-ni kit me nongo tyeng ki i Baibul ma mege.
◼ Kwan tyeng me Baibul kun inyutte kit ma niyewa cung kwede i Ginacoya.
◼ Ti ki lapeny. Me kaka titte tyen lok me tyeng moni me Baibul in ki komi wek en aye otit boti.
◼ Wek lokki obed mayot. Pe omyero ilok i kom gin ma ginacoya moni-ni loko iye ducu. Lok i kom ka ma mitte me konyo en me niang maber keken.
◼ Wek tyeng moni-ni obed me kony bote. Konye wek onen kit ma tyeng me Baibul gudo kwede kwone.
Bute me 4: Pwonyo Lutino Kwan me Yubbe
Latin kwan ma yubbe con ki ngolo te lagam woko, dok bene tamo kit me miyo lagam labongo kwanone ki i buk dongo oyot i yo me cwiny. Ka dong icako kwan ki latin kwan mo, yub pwony mo acel wuni kwede me nyutte kit me yubbe. Bot pol pa lutino kwan, ber me yubo pwony acel nyo dul acel wuni kwede.—km 12/04 pot 1.
Ngolo Te Lagam ki Coyo Coc Mogo Manok i Teng Buk
◼ Nyutte kit me nongo lagam ma rwatte ki lapeny ma gicoyo piny.
◼ Nyut ki latin kwan-ni buk ma in itiyo kwede me pwony wek onen kit ma in ingolo kwede te lagam me lapeny.
◼ Wek latin kwan onen ni tyeng ducu ma kitiyo kwede rwatte ki lok ma tye i paragraf, nyutte kit me coyo coc manok i teng bukke. Ngiyo Kong Jami Mogo Labongo Yubone
◼ Nyut bot latin kwan-ni kit me ngiyo maber wi lok madit ki matino me dul moni-ni kacel ki labol-gu ma nongo peya ocako yubbe.
◼ Cuk cwiny latin kwan-ni me dok cen i lok ma pigi tego i nge tyeko yubbene.
Bute me 5: Ka ma Wubikwano Pe Myero Okat Teko me Niangone
Pe omyero wukwan ka malac makato teko me niango pa in lapwony kacel ki pa latin kwan.—km 1/05 pot 1.
Dong Niyene Obed Matek
◼ Pire tek ni omyero wakony latin kwanwa me niang gin ma watye ka kwano-ni maber ma loyo kwano kabedo malac i cawa manok keken.
◼ Ti ki kare muromo me konye wek oniang dok oye gin ma en tye ka kwanone.
◼ Ti ki kare muromo me neno ginacoya ma pigi tego ma nyuto gin ma wapwonyo.
Wek Kwanwu Omedde Anyim
◼ Ka latin kwanni maro loko lok madok i kome pi cawa malac tutwal, ci itwero yubo yub me nyamo kodi lok ma kit meno lacen i nge kwanwu.
◼ Pe idur lok mapol i kare me kwanwu. Pe iwek lok mukene ma pe gubedo kom lok ma pigi tego nyo tito gin ma otimme i kwo ogeng latin kwanni me nongo pwony ma pigi tego me Baibul.
Bute me 6: Ka Latin Kwan Openyo Lapeny
Ka wucako kwano Baibul ki dano mo, ci pire tek ni omyero wukwan pwony me Baibul kore ki kore ma pe wubedo kapye i kabedo mapat pat. Man konyo latin kwan me bedo ki guti matek me ngec ma tye kakare ki dok me dongo i yo me cwiny.—km 2/05 pot 6.
Bed ki Wang ma Neno Jami Woko Con
◼ Itwero gamo lapeny ma rwatte ki lok ma wutye ka kwanone i cawa me kwanwu cutcut.
◼ Lapeny ma pe rwatte ki gin ma wutye ka kwanone nyo ma mito ni omyero i yeny lagamme kong ayenya pe omyero igam cutcut. Itwero coyo lapeny meno piny.
◼ Ka latin kwan moni-ni pud pe oye, yeny gin akwana mukene ma loko i kom pwony moni-ni matut.
◼ Ka ce latin kwan-ni pe tye ka ye, wek lokke kong dong obedi ento wumedde ki kwanwu.
Bed ki Mwolo
◼ Ka ce pe ingeyo lagam me lapeny moni, pe imi tam ma megi.
◼ Mot mot pwony latin kwanni kit me yenyo lagam pire kene.
Bute me 7: Lega i Kare me Kwan
Laa pa Jehovah mitte tutwal wek lutino kwan me Baibul gudong i yo me cwiny. Dong pi meno, pire tek me cako ki giko kwanwa ki lega.—km 3/05 pot 4.
Awene ma Omyero Icak Kwede Lega
◼ Pi jo ma gubedo ludini, iromo cako lega kwedgi i nino me acel me cako kwan kwedgi.
◼ Bot jo ma pe gubedo ludini, watwero neno awene ma omyero wacak iye kwanwa ki lega.
◼ Kiromo tic ki Jabuli 25:4, 5 ki 1 Jon 5:14 me nyuto ngo ma omiyo lega pire tek.
◼ Kiromo tic ki Jon 15:16 me nyuto ni omyero waleg bot Jehovah kun wawok ki i nying Yecu Kricito. Gin ma Omyero Waleg Pire
◼ Pore me miyo pak bot Jehovah pien pwony a ki Bote.
◼ Nyut bene i legani ni iparo pi latin kwan man.
◼ Mi pwoc bene i kom dul ma Jehovah tye ka tic kwede.
◼ Leg Jehovah wek okony latin kwan me keto gin ma en tye ka kwanone i tic.
Bute me 8: Wek Lutino Kwanni Gunge Dul pa Jehovah
Pe wakwano Baibul ki dano ni wek gunge lok ma mako niyewa keken ento wamito ni wakonygi wek gudok jo me kacokke pa Lukricitayo. Kwany dakika mo manok me nyamo lok mo acel olo i kom dul pa Jehovah.—km-AC 4/05 pot 8
Yub me Cokke
◼ Tit botgi pi yub me cokke abic ma bedo tye cabit ki cabit. Lwonggi me bino i kacokke cut ma nongo pud icako kwan kwedgi acaka.
◼ Tit botgi lok mogo ma pigi tego ma kipwonyo ki i cokke magi.
◼ Cuk cwinygi me bedo tye calo i kare me Nipo, gure, ki kare me lim pa laneno me adwol.
◼ Ti ki cal ma tye i bukkewa wek okony lutino kwan me niang jami ma tye.
◼ Cuk cwinygi me kwano brocuwa calo Jehovah’s Witnesses—Who Are They? What Do They Believe?
Ti ki Video me Cuko Cwinygi
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Bute me 9: Konyo Lutino Kwan Wek Gucak Miyo Caden Kun Nongo Pe Guyubbe Pire
Ka lutino kwanwa me Baibul gucako keto niyegi i kom jami ma gitye ka kwanone, ci gicako bedo ki miti me tito pire.—km-AC 5/05 pot 1. Cuk Cwinygi Wek Gucak Miyo Caden
◼ Gwok tye lureme ki jo ma i ganggi ma en twero lwongogi me bedo kacel kwede ka wutye ka kwano Baibul?
◼ Nyo en tye ki jo ma gitiyo kwedgi, ma gikwano kwedgi i cukul acel, nyo lureme ma gunyuto miti? Pwonygi Wek Gucak Lok i Kom Niyegi
◼ I kare me kwanwu, penye ni, “In itwero tic ki Baibul me gonyo tyen lok me ada man bot jo me gangwu nining?”
◼ Kony latin kwan wek oniang kit me bedo ma wor nyo me bedo lakica ka tye ka lok bot dano mukene i kom Lubanga ki yubbe.
◼ Lutino kwan twero tic ki brocuwa me Jehovah’s Witnesses—Who Are They? What Do They Believe? me konyo luremgi nyo jo me gangigi me niang niyewa ma jenge i Baibul kacel ki tic ma watiyo.
Bute me 10: Pwonyo Lutino Kwanwa i Tic me Pwony i Ot-ki-Ot
Ka dong luelda gunongo ni latin kwan me Baibul oporre me bedo latit kwena ma peya kibatija, ci en twero cako donyo i tic me tito kwena maber-ri kacel ki kacokke.—km-AC 6/05 pot 1.
Wuyubbe Kacel
◼ Nyut ki latin kwan ka ma en twero nongo iye tam ma kimiyo me nyuto bukkewa.
◼ Konye wek onge yo maber me lok ki dano me wang ticwu.
◼ Cuk cwinye me tic ki Baibul i ticce me pwony.
◼ Bedu kaporo kit me pwony kacel. Tit bote kit ma myero oti kwede ki ryeko me gamo lapeny ma kipenyo. Wotu Kacel ka Pwony
◼ Wek en onen kit ma in icako kwede pwony kun nongo itimo kit ma nongo wun wuyubo kwede-ni.
◼ Omyero itam i kom kit dano ango ma en obedo, ki kero me niango ma latin kwan-ni tye kwede. Kare mukene ber iwek en olok gin mo manok keken ci tum.
◼ Kony latit kwena manyen me keto yub me cito i tic me pwony.
Bute me 11: Konyo Lutit Kwena Manyen Wek Gudok Cen ka Lim
Yub me dok cen ka lim cakke i nino me lok ki dano moni-ni tyen mukwongo. Cuk cwiny latit kwena manyen-ni me bedo ki miti i kom jo ma en oloko kwedgi. Pwonye me ngeyo kit me nongo tam kun nongo winyo kit ma gin giloko kwede.—km-AC 7/05 pot 1.
Yubbe me Dok Cen ka Lim
◼ Nenu gin ma latit kwena manyen-ni ocoyo piny, ci nyutte kit me yero lok mo i kom Ker-ri ma bikelo miti bot ngat ma en oloko kwede-ni.
◼ Wuyub lapor mo ma wukwanyo ki i paragraf acel ki i buk mo ma kiyubo me kwano Baibul kun wukwanyo tyeng acel ki i iye.
◼ Wuyub bene lapeny mo ma wubipenyone i agikki ma weko wudok cen me nyamone i nino ma lacen. Dok Cen Kit ma Wucikke Kwede
◼ Cuk cwiny latit kwena manyen-ni me dok cen ka limo jo ma nongo gunyuto miti.
◼ Kony latit kwena manyen-ni me niang ber pa dok cen ka limo kadi wa jo ma nongogi tek.
◼ Pwony latit kwena manyen-ni wek onge kit me moko cikke me dok cen ka lim dok bene konye me ngeyo ber pa dok cen.
Bute me 12: Konyo Lutino Kwanwa me Cako Pwony ki Kwano Baibul ki Dano
Poro Yecu ki miyo lanen maber i ticci me pwony obedo gin ma pire tek. Ka latin kwanni neno ticci maber me pwony, ci en biniang ni tyen lok ma miyo kidok cen ka lim obedo me cako kwano Baibul ki dano.—km-AC 8/05 pot 1.
Kwano Baibul ki Dano
◼ Tit bot latin kwan ni ka wacako kwan ki dano, pe ber me tito yub ma mako kwan-ni woko matut.
◼ Pol kare ber me nyuto kit ma kikwano kwede ki kwano paragraf acel nyo aryo mo i buk ma nongo wumito kwanone-ni.
◼ Wutem poro tam ma kimiyo me cako kwano Baibul ki dano kacel.—km-AC 8/05 pot. 8; km 1/02 pot. 6.
Pwonyo Lutino Kwan me Doko Lupwonye
◼ Cuk cwiny lutino kwan me donyo i Cukul me Tiokraci.
◼ Yub yub me wot kacel ki latin kwan-ni ka ibicito ka kwano Baibul ki ngat mo, wek en bene olok manok i kom ginacoya nyo i kom paragraf ka wutye ka kwan.