Kony Jo Mukene Wek ‘Gulub Pwony ki Cwinygi Ducu’

1. Gin ango ma Jehovah mito ki bot jo ma giwore?

¹ Bedo ki winy pire tek tutwal i miyo worowa bot Jehovah i yo ma en cwako. (Nwo. 12:28; 1 Pet. 1:14-16) Lubanga dong cok ngolo kop i kom “jo ma pe ngeyo Lubanga, ki i kom jo ma pe gilubo lok me kwena maber.” (2 Tec. 1:8) Dong wan watwero konyo jo mukene me lubo pwony ma tye i lok pa Lubanga ‘ki cwinygi ducu’ nining?—Rom. 6:17.

2. Pingo pire tek me konyo jo mukene wek gudong niyegi?

² Miyo Kony me Dongo Niye Kacel ki Mar: Ginacoya nyuto ni bedo ki winy kubbe ki bedo ki niye. Lakwena Paulo oloko i kom ‘cik ma Lubanga ma pe to yam omiyo wek dano gulub niye.’ (Rom. 16:26) Buk pa Jo Ibru cura 11 nyuto lapor mapol mapat pat me niye, ma polgi onyuto kit ma jo mogo gubedo katimo kwede gin ma Jehovah mito. (Ibru 11:7, 8, 17) Ki tungcel, bedo labongo winy bene kubbe ki bedo labongo niye. (Jon 3:36; Ibru 3:18, 19) Dong omyero waket tek me medo dirowa me tic ki Lok pa Lubanga wek omi wakony jo mukene me bedo ki niye ma miyo gidoko luwiny.—2 Tem. 2:15; Yak. 2:14, 17.

3. (a) Bedo ki winy kubbe ki mar nining? (b) Watwero konyo lutino kwan me Baibul me dongo margi i kom Jehovah nining?

³ Bedo ki winy bene kubbe ki maro Lubanga. (Nwo. 5:10; 11:1, 22; 30:16) Buk pa 1 Jon 5:3, waco ni: ‘Pien maro Lubanga en aye obedo gwoko cikke. Dok cikke pe nurowa.’ Watwero konyo lutino kwan me Baibul nining wek gudong margi i kom Jehovah? I kare me kwanwu, nong yo mo ma itwero dongo kwede margi i kom kit Jehovah. Nyut botgi kit ma in imaro kwede Lubanga. Konygi wek gutam yo ango ma gin gitwero dongo kwede watgi ki Jehovah. Makato ducu, mar ma watye kwede i kom Jehovah bimiyo wan kacel ki jo mukene walubo cikke ki cwinywa ducu.—Mat. 22:37.

4. (a) Pingo lanen ma wanyuto pire tek? (b) Ngo ma myero watim wek wabed jo ma ‘luwiny ki cwinywa ducu’?

⁴ Lanen ma Wanyuto: Nyuto lanen maber obedo gin ma pire tek ma romo miyo dano giwinyo lok me kwena maber ma watito. Ento mitte ni omyero waket tek me bedo jo ma ‘luwiny ki cwinywa ducu.’ (1 Luker. 3:9; Car. 4:23) Dong man kwako gin ango? Myero ipit cwinyi ki kwano Baibul kare ducu kacel ki cito i cokke. (Jab. 1:1, 2; Ibru 10:24, 25) Bed kacel ki jo ma gitye ki cwiny me woro me ada. (Car. 13:20) Bed bene ki miti me wot i tic me pwony ki cwiny me konyo dano ma gitye i wang ticwu. Leg Jehovah wek omi ibed ki cwiny maber. (Jab. 86:11) Gwokke ki jami ma romo balo cwinyi calo galo wang me tim gero ki tim me tarwang. Tim jami ma miyo inyiko cok bot Lubanga ki dok bene ma dongo watwu kwede.—Yak. 4:7, 8.

5. Jo ma luwiny gitye ka nongo mot nining?

⁵ Jehovah oniango jone me kare macon ni ka onongo gugwoko cikke ci onongo gibinongo mot mapol. (Nwo. 28:1, 2) I kare man bene, Jehovah tye ka miyo mot mapol bot ‘jo ma giwinye macalo ngat ma laloc.’ (Tic. 5:32) Pi meno, watiyu ki pwony kacel ki lanen maber ma wanyuto me konyo jo mukene wek gin bene gudok jo ma luwiny ki cwinygi ducu.