Dong Dironi me Leyo Lok ki Dano
1. Lok ma tye i Baibul ango ma wabinenone, dok pingo?
1 Pwony ma lakwena Paulo opwonyo i ot me woro pa Lujudaya i Antiokia me lobo Picidia, kit macalo kicoyo i Tic pa Lukwena 13:16-41, obedo lanen maber botwa i kit me leyo lok ki dano. Paulo kong oniang tam ma tye i cwiny jo ma giwinye ki dok yo me kwogi, ka dong opwonyo i yo ma rwatte kwedgi. Ka watye ka neno lok man, omyero watamu i kom kit ma watwero tic kwede ki lanen-ni i ticwa me pwony.
2. Gin ango ma wapwonyo ki i kit ma Paulo ocako kwede pwonye?
2 Yeny Lok ma Wun Weng Wuye Iye: Kadi bed ni pwony pa Paulo onongo ojenge i kom kit ma Yecu ocobo kwede yub pa Lubanga, ento Paulo pe ocako pwonye ki lok meno. En oloko i kom jami ma en kacel ki Lujudaya onongo giye iye—lok ma dok i kom tekwaro pa Lujudaya. (Tic 13:16-22) I kit yo acelli, wan bene watwero gudo cwiny jo mukene ka ce wayenyo lok ma nongo wan kacel ki gin waye iye. Omyero wati ki lapeny i yo me diro ka dong wawiny lok ma gin waco me wek wange lok ma tye i cwinygi. Man weko wangeyo ngo ma gin tero calo gin ma pire tek.
3. Pingo onongo tek bot jo ma gitye ka winyo lok pa Paulo me ye ni Yecu aye obedo Meciya ma onongo kiciko pire-ni?
3 I kare ma Paulo tye ka lok i kom tekwaro pa Lujudaya, en opoyo wi jo ma onongo gitye ka winye i kom cikke pa Lubanga me cwalo Lalar ma onongo bia ki i doggola pa Daudi. Ento, Lujudaya mapol onongo gitye ka kuro ngat mo ma obedo oteka lweny ma onongo bilarogi ki i aroma me loc pa Jo Roma ka ilo rokgi i rwom ma lamal ma kato rok ducu. Gin onongo gingeyo labongo akalakala mo ni ludito dini pa Lujudaya me Jerucalem gukwero Yecu dok gumiye bot luloc me Roma ci gunekke woko. Dong Paulo mono onongo twero weko gin ye ni en Ngati eni aye obedo Meciya ma kiciko pire-ni nining?
4. Paulo oloko ki diro bot Lujudaya nining?
4 Lok Kit me Pwony-nyi i Yo ma Rwatte: I kare ma Paulo ongeyo tam pa jo ma gubedo ka winye, en otiyo ki Ginacoya me leyo lok kwedgi i kom gin ma gin onongo dong guye woko iye. Me lapore, en onyuto ni Yecu obedo lakwar Daudi dok ni Jon Labatija ma onongo jo mapol giye ni obedo lanebi pa Lubanga-ni bene onongo omoko lok meno. (Tic 13:23-25) Paulo onyuto ni tic pa lutela dini me kwero Yecu ki ngolo to i wiye-ni ‘ocobo gin ma Lunebi guloko yam con.’ (Tic 13:26-28) Medo i kom meno, en bene otito ni kicero Yecu ki i kin jo muto dok ni dano mogo guneno ki wanggi, en bene onyuto Ginacoya mapat pat ma ocobbe i cer pa Yecu.—Tic 13:29-37.
5. (a) Paulo oloko kit me cako lokke i kare ma en tye ka lok ki jo Grik nining? (b) I yo ango ma wan watwero lubo kwede lanen pa Paulo ka watye ka miyo caden ki dano i wang ticwa?
5 Ki tung cel doki, i kare ma en onongo tye ka lok ki jo me Grik i wi got me Areopago i Atene, Paulo dok ocako lokke i yo mapat. (Tic 17:22-31) Ento, en oloko i kom en lok acel-li, dok i kabedo aryo-ni, pwonye okelo adwogi mabeco. (Tic 13:42, 43; 17:34) I kit yo acel-li i kare-ni, ka watemme me yenyo lok ma wan kacel ki jo ma giwinyowa waye iye, ki ka wacako lok i yo ma nongo rwatte ki kit me kwo ki tam pa jo ma giwinyowa, ci man biweko kwena ma wan wapwonyo-ni gudo cwinygi.