Gin ma Ticwa me Pwony-nyi Cobo
1. Jehovah mono neno ticwa me pwony-nyi nining, dok dano gitye ka jolone nining?
1 Lok pa Lubanga poro Lukricitayo ma gitye ka tiyo tic pa Jehovah ki mony ma gitye ka dorre ki yomcwiny inge loyo lweny. (2 Kor. 2:14-16) Ka watero ngec pa Lubanga bot dano, ci nongo bedo calo watye ka wango odok eceta ma ngwece kur bot Jehovah. Dano mukene giye lok me kwena maber-ri; jo mukene gikwero woko. Ento cwiny manok ma jo mapol ginyuto-ni pe tere ni nongo ticwa pe tye ka wot maber. Nen kong gin ma ticwa me pwony-nyi tye ka cobone.
2. Ticwa me pwony-nyi miniwa kare me nyuto gin ango?
2 Ilo Nying Jehovah Malo: Catan pyem ni dano gitiyo pi Jehovah pi nongo gin maber ki bote keken. (Yubu 1:9-11) Ticwa me pwony macalo Lukricitayo miniwa kare me nyuto ni minewa bot Lubanga obedo gin ma a ki i cwinywa. Lutit kwena mapol gimedde ameda ki lubo cik me pwonyo kacel ki loko dano me doko lulub Yecu kadi bed ni nongo gitye ki peko mapol i kwogi, nyo dano ginyuto cwiny manok. Jehovah cwinye bedo yom adada i kom jo ma gikanyo peko ma kit man!—Car. 27:11.
3. Pingo pire tek ni omyero wamedde ameda ki yaro nying Lubanga ki yubbe?
3 Ticwa me pwony-nyi bene tye ka konyo cobbe pa yub pa Lubanga. Ma mako nino ma tye ka bino me jwero lobo pa Catan-ni, Jehovah wacci: ‘Rok ducu gibingeyo ni an aye a Jehovah.’ (Ejek. 39:7) Wek rok ducu gunge lok man, lutic pa Lubanga omyero gumedde ameda ki yaro nyinge ki yubbe “bot rok ducu ki kaka ki leb-gu ki jo mapatpat ducu.”—Yabo. 14:6, 7.
4. Ngolo kop bicung i kom tito pi kwena maber-ri nining?
4 Gin ma Ngolo Kop Bicung Iye: Ngolo kop bene bicung i kom tito pi kwena maber-ri. Lakwena Paulo owaco ni Kricito Yecu biculo kwor i kom “jo ma pe ngeyo Lubanga, ki i kom jo ma pe gilubo lok me kwena maber i kom Rwotwa Yecu.” (2 Tec. 1:8, 9) Kibingolo kop i kom dano ma lubbe ki kit ma nongo gin gujolo kwede lok me kwena maber-ri. Man pud dong miyo tic man bedo gin ma pire tek bot lutic pa Lubanga ya! Omyero pe waweku tito lok me kwena me Ker-ri wek pe wabedu ki alii me remo i wiwa.—Tic 20:26, 27.
5. Wan wanyuto kica pa Lubanga i ticwa me pwony nining?
5 Yellewa me konyo jiraniwa wek gunong cwak pa Lubanga nyuto kica pa Jehovah. (1 Tem. 2:3, 4) Wabedo kadok cen bot dano kare ki kare me cuko cwinygi me yenyo Jehovah ma kare pud tye pien wangeyo ni jami timme ma kelo aloka loka i kwogi kare ki kare. Ka watimo meno ci nongo wanyuto “kica madwong pa Lubangawa,” ma “pe mito ni ngat mo orweny woko matwal, ento mito ni jo ducu guo i ningut.”—Luka 1:78; 2 Pet. 3:9.
6. Tiyo tic pi Jehovah ki mit kom konyowa me bedo kun nongo wagwokke nining?
6 Konyowa Bene: Tiyo tic pa Jehovah ki mit kom gwokkewa bene. Konyowa me ‘keto cwinywa i nino pa Jehovah’ dok gwokowa ki i cilo ma a ki tim maraco me yub me kare-ni. (2 Pet. 3:11-14; Tito 2:11, 12) Pi meno dong ‘wacungu matek ma pe wayenge, kun wamedde bene ki tic pa Rwot nino ducu,’ ma nongo wangeyo ni yellewa i tic man macalo Lukricitayo pe bibedo me nono.—1 Kor. 15:58.