Pwony ma Tero Dano i Kwo
1 Neno kit ma wang dano yabbe kwede ka gitye ka niang lok ada ma a ki Lok pa Lubanga pud dong kelo botwa yomcwiny ya! Tito ngec pa Lubanga ki yubbe pi dano bot jo mukene kelo yomcwiny madit. Pwony ma kit man terogi i kwo ma pe tum.—Jon 17:3.
2 Gin Mumiyo Ngec Man Loyo Mukene-ni: I kare-ni kimiyo pwony i yo mo keken ma twere dok kipwonyo jami mapol mapat pat. (Latit. 12:12) Ento kadi bed ni ngec magi pigi tego, pe kitwero porogi ki ngec me “tic madit me twero pa Lubanga.” (Tic 2:11) Ngec ma kipwonyo i lobo-ni tika dong okelo dano cok ki Lacwec ki dok me ngeyo yubbe? Tika bene okonyo dano me niang gin ma timme ka danowa me amara oto nyo me ngeyo tyen lok ma omiyo peko tye mapol? Tika omiyo gen bot dano? Tika okonyo me yubo ber bedo me i ot? Pe. Pwony ma a ki bot Lubanga keken aye twero miyowa lagam me lapeny ma pigi tego ma dok i kom kwo.
3 Pwony ma a ki bot Lubanga tye ki gin mo ma pe kitwero nongone i pwony me lobo-ni—yubo kit pa dano me bedo maber. Ka jo ma jolo Lok pa Lubanga guketo lokke i tic, ci jwayo apokapoka me rangi del kom, me rok, wa ki me lobo woko ki i cwinygi. (Ibru 4:12) Pwony man oloko kwo pa jo mogo ma yam gimaro tim gero me ‘ruko kit manyen.’ (Kol. 3:9-11; Mika 4:1-3) Medo i kom meno, pwony pa Lubanga okonyo dano milion mapol me weko tim mogo ma pe yomo cwiny Lubanga ma nongo dong omoto woko i kwogi.—1 Kor. 6:9-11.
4 Gin ma Omiyo Mitte pi Oyot i Kare-ni: Lapwonywa Madit miyo waniang ngo ma karewa-ni tye ka nyutone. Lok me ngolo kop mere ma lunebi gucoyo loko i kom jami ma tye ka timme i kare-ni, ma omyero kitit pire i lobo ducu. (Yabo. 14:6, 7) Kricito dong tye ka loc i polo, dini goba me lobo-ni ducu dong kicok jwerogi woko, dok Ker pa Lubanga tye atera me jwero ter gamente ducu me lobo-ni. (Dan. 2:44; Yabo. 11:15; 17:16) Pi meno, mitte pi oyot ni dano omyero gumine ite loc pa Kabaka manyen pa Lubanga ma dong ocako loc woko-ni, me a woko ki i Babilon Madit, ki me lwongo nying Jehovah ki niye. (Jab. 2:11, 12; Rom. 10:13; Yabo. 18:4) Mito dong watiyu matek me pwonyo dano ki ngec ma terogi i kwo.